ማዝሙረ ማፃፋ 59

1 አቤት ታ ፆሳዉ፥ ታ ሞርከታፐ ታና አሻ፤ ታ ቦላ ደንደይሳታፐ ታና ናጋ። 2 ኢታ ኦይሳታፐ ታና አሻ፤ ሱ ጉስያ አሳታፐ ታና አሻ። 3 አቤት ጎዳዉ፥ ኤንቲ ታና ዎናዉ ዙግድ ናገይሳ በአ። አቤት ጎዳዉ፥ ታ ናቁዋ ግሾ ዎይኮ ታ ናጋራ ግሾ ግዶናሽን ጮ ታ ቦላ ቶቦሶና። 4 ታ አይ ባላካ ኦና ታና ቆሀናዉ ጊግዶሶና፤ ሄሳ በአ፤ ታና ማዳናዉ ደንዳ። 5 አቤት ኡባፈ ዎልቃማ ፆሳዉ፥ ጎዳዉ፥ እስራኤለ ፆሳዉ፥ ካዎተታ ኡባ ፕርዳናዉ ባርካ፤ ኢታ ኦይሳታ ማሮፓ። ሳላሀ 6 ኤንቲ ካታማ ግዶን ዩይሸ ፔእድ፥ ካና ላውሸ ስሞሶና። 7 ኤንታ ዶናፐ ከየይሳ በአ፤ ኤንታ እንፃርሳይ ማሻ መላ፤ አስ ኤንታና ስኤይሳ ቆፖኮና። 8 ሽን አቤት ጎዳዉ፥ ነ ኤንታ ቦላ ሚጫሳ፤ ካዎተታ ኡባ ለቅሳሳ። 9 ፆሳዉ፥ ነ ታ ሚፃ ግድያ ግሾ፥ ታ ነ ዎልቃን አማነታይስ። 10 ታ ፆሳይ ባ ሲቁዋን ታኮ ያና፤ ታ ፆሳይ ታ ሞርከታ ፆነተ ታና በሳና። 11 ታ አሳት ዶጎና መላ ነ ኤንታ ዎፓ። አቤት ጎዳዉ፥ ኑ ጎንዳልያዉ፥ ነ ዎልቃን ኤንታ ላላነ ካዉሻ። 12 ኤንታ ዶናፐ ከይያ ናጋራ ግሾ ኤንታ እንፃርሳፈ ፑልትያ ቃላ ግሾ፥ ባንታ ኦቶሩዋን ኦይከቶ፤ ኤንታ ባደነ ዎርዱዋ ግሾ፥ 13 ነ ሀንቁዋን ኤንታ ይሳ፤ ኤንታ ኩመ ድጋ። ሄሳን ፆሳይ ያይቆባ ዘረ ሃረይሳነ ሳኣ ጋፃ ጋካናዉ ሃረይስ ኤረታና። ሳላሀ 14 ኤንቲ ካታማ ግዶን ዩይሸ ፔእድ፥ ካና ላውሸ ስሞሶና። 15 ኤንቲ ምያባ ደማናዉ ቶይላቶሶና፤ ካሎና አትዳ ላውያ ካና ግዶሶና። 16 ሽን ታኒ ነ ዎልቃ ሳባና፤ ዎንታ ነ ሲቁዋ የፃና። ኔኒ ታዉ ታ ዋይያ ጋላስ፥ ታ ባቃታ አትያ በሰነ ሚፃ። 17 አቤት ታዉ ዎልቃ ግድዳ ፆሳዉ፥ ታ ነና ሳባና። ታ ቆሰታዳ አትያ በሳይነ ሲቁዋ ታና በሲያ ፆሳይ ነና።