१ तीमुथियुस 1

¹ नामव उद्धारकर्ता परमेश्वर अदिक नाम्द आशा अन आधार मसीह यीशु उन आग्या देल मसीह यीशु उन प्रेरित पौलुस उन दी टु,

² तीमुथियुस उन हेसुर जो विश्वास दा नानव खरा पार आन. आप्प परमेश्वर, अदिक नामव प्रभु यीशु मसीह अन दी टु नीनी अनुग्रह, अदिक दया अदिक शांती सिकतेला ईरूल.

³ ह्यांग ना मकिदुनिया अक होगतेला नीनी समझुसीदीन, कि इफिसुस दा ईतकु थ्वाळासा लॉकुरी आग्या कोळुल कि ख्वाटा सिद्धांतगोळ शिक्षा कोळबाळुल,

⁴ आंदरी अन पुरातन काल्पनिक कात्‍तागोळ अदिक अनन्त वंशावलीगोळ मा मन हचबाळी, यदुर देल विवाद आगताव, इव परमेश्वर उन कार्य ईला, जो विश्वास इन द्वारा आव आन.

⁵ आग्या अन उद्देश ईद आद कि शुद्ध मन अदिक वळ्लीद विवेक, प्यार अदिक कपट रहित विश्वास इन द्वारा बरतद.

⁶ इवरी बिटकु थ्वाळासा लॉकुर बेकार मातगोळ दी भटकुसेग्यार.

⁷ अदिक आंदुर व्यवस्था अन गुरु रा आगोद चाहसतार, लेकीन जो मातगोळ अनतार अदिक यवरी मजबूती देल माताळतार, आंदरी सम्सालेव भी.

⁸ लेकीन नाव जान्सतेव कि अगर यावारा व्यवस्था अक उचित रीति देल क्याल्सा दा तंदान रा अद भला आद.

⁹ नाव ईद भी जान्सतेव कि व्यवस्था लॉकुर साटी ईला लेकीन व्यवस्था अक ईला मान्सावाळेर, विद्रोह, परमेश्वर उन अनादर माळावाळेर, पापीगोळ, अपवित्र अदिक न्यायी मंळसागोळ, मोय आप्प उन घात माळावाळेर, हत्या माळावाळेर,

¹⁰ व्यभिचारीगोळ, गंळ्स गामिगोळ, गुलाम उक मारावाळेर, ख्वाटा माताळावाळेर, अदिक ख्वाटा गवाही तीनावाळेर, अदिक इंदुर्द अतिरिक्त खरा सिद्धांतगोळ शिक्षा अन विरोधीगोळ साटी ठहरूसकु आग्याद.

¹¹ ईद खुशखबरी महिमामय परमेश्वर यार हात्‍ती सप्पा आशीषगोळ आव अदिक आऊन द्वारा नानी सौप्सकु आग्याद.

¹² ना तान प्रभु यीशु मसीह अन्द याव नानी सामर्थ्य कोटान, धन्यवाद माळतीन कि आव नानी विश्वासलायक सम्सकु तान स्यावा अन्द साटी ठहरूसदुन.

¹³ ना रा पयले अपमान माळावाळा, अदिक सतुसावाळा, अदिक हिंसा माळावाळा ईरीन; तरी भी नान मा दया आत, यतिकी ना अविश्वास इन दशा दा बिना सोच समझुस्कु ई क्याल्सागोळ माळीदीन.

¹⁴ अदिक नाम प्रभु उन अनुग्रह आ विश्वास अदिक प्यार इन सांगुळ जो मसीह यीशु दा आद, हापाळ इदुर देल आत.

¹⁵ ईद मात खरा अदिक हर प्रकार देल मानसोद लायक आद कि मसीह यीशु पापीगोळ उद्धार माळोर साटी दुनिया दा बंदुन, यारदा सब से बेकार पापी ना आईन.

¹⁶ लेकीन नान मा इदुरसाटी दया आत कि ना सब से बेकार पापी नान दा यीशु मसीह तान पुरा सहनशीलता तोरसुल, कि जो लॉकुर आऊन मा अनन्त जीवन साटी विश्वास माळ्यार आंदुर साटी ना ऊंद आदर्श बनसाईन.

¹⁷ ईग अनन्त राजा मतलब अविनाशी, अदृश्य, ऊंद मात्र परमेश्वर उन आदर अदिक महिमा हमेशा हमेशा आगतेला ईरूल. आमीन.

¹⁸ हे नान पारा तीमुथियुस, आ भविष्यवाणीगोळ अनुसार जो पयले नीन बारा दा माळकु आगीदव, ना ईद आग्या कोळतीन कि नी अऊर्द अनुसार वळ्लीद लळाई माळतेला ईर,

¹⁹ अदिक विश्वास अदिक आ वळ्लीद विवेक इक हुडुकु ईट, यदुर्द इनकार माळदुर कारण यास मुंदुर्द विश्वास रूपी जहाज मुळकेत.

²⁰ आंदुर दा टु उच हुमिनयुस अदिक सिकन्दर हुन, यारी ना शैतान उक कोट्ट बुटीन कि आंदुर परमेश्वर उन अपमान माळोद कलु बाळुल.