१ तीमुथियुस 2

¹ ईग ना सब से पयले ईद आग्रह माळतीन कि विनती, प्रार्थना, निवेदन, अदिक धन्यवाद सप्पा मंळसागोळ साटी माळकु आगुल.

² राजागोळ अदिक सप्पा धोळ अधिकारीगोळ्द निमित्त इदुरसाटी कि नाव शांती अदिक चैन इन सांगुळ परमेश्वर उक आदर कोळतेला अदिक पवित्रता देल जीवन बीतुसेव

³ ईद नाम उद्धारकर्ता परमेश्वर उक वळ्लीसा हततद अदिक प्रसन्न भी माळतद,

⁴ जो ईद चाहासतान कि सप्पा मंळसागोळ ऊळ्सकु आगुल, अदिक आंदुर सच्चाई इन ग्यान इक जान्स कोमुल.

⁵ यतिकी परमेश्वर ऊंद अच आन, अदिक परमेश्वर अदिक मंळसागोळ न्याड्या दा भी ऊंद अच मध्यस्थ भी आन, मतलब मसीह यीशु जो मंळसा हुन.

⁶ यीशु नाम सप्पा मुंदरी छुटकारा कोळोर साटी तान बलिदान कोटकु आजादी कोंडुन, अदिक आऊन गवाही सही समय मा कोटकु आत.

⁷ ना सही अनतीन, ख्वाटा माताळालीन, कि ना ईदा उद्देश देल प्रचारक अदिक प्रेरित अदिक गैरयहूदीगोळ साटी खरा विश्वास इन उपदेशक ठहरूस्कु आदीन.

⁸ इदुरसाटी मंडली दा आराधना हाळाहोती ना चाहसतीन कि हर जागा मंळसा, बिना सिट्ट अदिक विवाद इन पवित्र कयगोळी नेगुकु प्रार्थना माळतोगुल.

⁹ हांग अच आर्तेर भी नम्रता अदिक खुद: नियंत्रण इन सांगुळ साधासुधा कपळागोळ देल तान तान इक सवारसुल; ना कि चुट्टी सवारसकु अदिक ना व्हान्ना अदिक मोती अदिक किमती कपळा देल,

¹⁰ लेकीन भला क्याल्सा देल, यतिकी परमेश्वर उन भक्ति माळावळतेर आर्तेरी भी ईदा वळ्लीद आद.

¹¹ आर्त इक शांतता देल अदिक पुरा हात्‍ती ता देल कलु पायजे.

¹² ना आर्तेरी ईजाजत कोळालीन कि आर्त ना शिक्षा कोळुल अदिक ना मंळसा मा अधिकार जतुसुल, लेकीन सुंगा मुंगा ईरूल.

¹³ यतिकी आदम पयले, आऊन बाद्दा हवा माळकु आदुर;

¹⁴ अदिक आदम ईला जो बहकुसकु आगीदुन, लेकीन आ आर्त हुळ जो बहकुसकु आगिदुर अदिक पापी ठहरूसदुर.

¹⁵ तरी भी आर्त इक चिकोर पैदा माळोर द्वारा उद्धार सिक्‍कीत, अगर आक संयम सांगुळ विश्वास, प्यार, अदिक पवित्रता दा संची ईरूल.