निर्गमन 25

¹ यहोवा मूसा से अंदुन,

² “इस्त्राएलीगोळ से ईद अनेत कि नान साटी भेंट तरूल यास तान इच्छा देल कोळोद चाहास्यार आ सप्पा मुंदुर से नान भेंट ताकोमेत.

³ अदिक याता वस्तुगोळ्द भेंट आंदुर से ताकोमोद आद अव ईव हुव; मतलब व्हान्ना, बेळ्ली, पीतळ,

⁴ नीळा, जांभळा अदिक क्याचांद रंग इन कपळा, महीन मलमल कपळा, मर्री इन चुट्टी,

⁵ क्याचांद रंग देल रंग्सकु म्यांडागोळ्द तोगुल, सूइसगोळ्द तोगुल, बबूल इन हुळ्ली,

⁶ ऊजुळ इन साटी याण्‍णा, अभिषेक इन याण्णा साटी अदिक सुगन्धित लुबान साटी सुगन्धद्रव्य,

⁷ एपोद अदिक चपरास इन साटी सुलैमानी कल्ल, अदिक जळुसोर साटी मणि.

⁸ अदिक आंदुर नान साटी ऊंद पवित्रस्थान माळुल कि ना आंदुर बीच दा निवास माळाईन.

⁹ जो येनारा ना नीनी तोर्सतीन, मतलब निवासस्थान अदिक अदुर सप्पा सामान इन नमुना, अदुर्दा हिसाब देल नीव लॉकुर अदरी माळेतीर.”

¹⁰ “बबूल इन हुळ्ली इन ऊंद सन्दुक माळकु आगुल; अदुर लंबाई ढाई कय, अदिक चौळाई अदिक ऊचाई दिळ दिळ कय ईरूल.

¹¹ अदिक अदरी शुद्ध व्हान्ना देल बुळ्क अदिक व्हार्या मळुसेतीर, अदिक सन्दुक इन म्याकुच नाकु दी व्हान्ना अन पट्टी बनुसेतीर.

¹² अदिक व्हान्ना अन नाक कळागोळ घळुसकु अदुर नाकु कालगोळ मा, ऊंद दी येढ्ढ कळा अदिक दुसरा दी भी येढ्ढ कळा हचुसेतीर.

¹³ बाक बबूल इन हुळ्ली इन कोलगोळ माळसुसेतीर, अदिक अवरी भी व्हान्ना देल मळुसेतीर.

¹⁴ अदिक कोलगोळी सन्दुक इन येढ्ढु दीकळव कळागोळ दा हाकेतीर, यदुर देल अऊर शक्ति देल सन्दुक नेगुकु आगुल.

¹⁵ अव कोलगोळ सन्दुक इन कळागोळ दा हतकु ईरूल; अदिक अदुर देल अलग माळकु आगबाळुल.

¹⁶ अदिक जो गवाही इन चिट्टी ना नीनी कोळाईन अदरी अदा सन्दुक दा ईटेत.”

¹⁷ “बाक शुद्ध व्हान्ना अन ऊंद प्रायश्चित इन झाकनी माळसुसेतीर, अदुर्द लंबाई ढाई कय, अदिक चौळाई दिळ कय ईरूल.

¹⁸ अदिक व्हान्ना मळुसकु येढ्ढ करूब माळसुसकु प्रायश्चित इन झाकनी इन येढ्ढु क्वाना मा हचुसेत.

¹⁹ ऊंद करूब ऊंद क्वाना मा अदिक दुसरा करूब दुसरा क्वाना मा हचुसेत; अदिक करूबगोळी अदिक प्रायश्चित इन झाकनी इक ऊंदा तुकळा देल माळकु अदुर्द येढ्ढु क्वाना मा हचुसेत.

²⁰ आ करूबगोळ्द पंख म्याकुच टु हिंग फैलुस्कु बनसुल कि प्रायश्चित इन झाकनी अऊर देल मुचकु ईरूल, अदिक अऊर मार्रगोळ आमने-सामने अदिक प्रायश्चित इन झाकनी दी ईरूल.

²¹ अदिक प्रायश्चित इन झाकनी इक सन्दुक इन म्याकुच हचुसेत; अदिक जो गवाही इन चिट्टी ना नीनी कोळाईन अदरी सन्दुक इन बुळ्क ईटेत.”

²² ना अदुर म्याकुच ईतकु नीन से मुलाकात माळतोगाईन; अदिक इस्त्राएलीगोळ्द साटी यास आग्यागोळ नानी नीनी कोळोद बिद्दीत, आ सप्पा अन बारा दा प्रायश्चित इन झाकनी इन म्याकुच टु अदिक आ करूबगोळ्द न्याड्या दा टु, जो गवाही इन चिट्टी इन सन्दुक मा ईत्ताव, नीन से मातकात हेळतोगाईन.

²³ “बाक बबूल इन हुळ्ली इन ऊंद मेज माळसुसेत; अदुर लंबाई येढ्ढ कय, चौळाई ऊंद कय, अदिक ऊचाई दिळ कय ईरूल.

²⁴ अदरी शुद्ध व्हान्ना देल मळसुसेत, अदिक अदुर नाकु दी व्हान्ना अन ऊंद पट्टी माळसुसेत.

²⁵ अदिक अदुर नाकु दी नाक बेळ्ल चौळा ऊंद पटरी माळसुसेत, अदिक ई पटरी इन नाकु दी व्हान्ना अन ऊंद पट्टी माळसुसेत.

²⁶ अदिक व्हान्ना नव नाक कळा माळसुसकु मेज इन आ नाकु क्वाना दा हचुसेत जो अदुर्द नाकु कालगोळ दा ईत्ताव.

²⁷ अव कळागोळ पटरी इन हात्ती का ईरूल, अदिक मेज नेगोर साटी कोलगोळ ईटेत.

²⁸ कोलगोळी बबूल इन हुळ्ली देल माळसुसकु व्हान्ना देल मळसुसेत, अदिक मेज अऊर देला नेगुकु आगुल.

²⁹ अदिक अऊर परात अदिक धूपदान, अदिक मग्गागोळ अदिक रीचुसव कटोरीगोळ, सप्पा शुद्ध व्हान्ना अन माळसुसेत.

³⁰ अदिक मेज मा नान मुंद भेंट इन रोट्टीगोळ हमेशा ईटतोगेत.”

³¹ “बाक शुद्ध व्हान्ना अन ऊंद दिवट माळसुसेत. ईद दिवट घळुस्द व्हान्ना देल बन्सकु ईरूल; अदुर्द पुष्पकोष, गाठ अदिक फूल, सप्पा ऊंदा तुकळा अन बन्सकु ईरूल;

³² अदिक अदुर किनारागोळ देल आर डगाली होळुल, मुर डगालीगोळ रा दिवट इन ऊंद दी टु अदिक मुर डगालीगोळ अदुर दुसरा दी टु होटकु ईरूल;

³³ ऊंद ऊंद डगाली दा बादाम इन फूल इन घाई मुर मुर पुष्पकोष, ऊंद ऊंद गाठ, अदिक ऊंद ऊंद फूल ईरूल; दिवट दा टु होळ्द आरू डगालीगोळ्द ईदा आकार या रूप ईरूल;

³⁴ अदिक दिवट इन डण्डी दा बादाम इन फूल इन घाई नाक पुष्पकोष तान तान गाठ अदिक फूल समेत ईरूल;

³⁵ अदिक दिवट दा टु होळ्द आरू डगालीगोळ दा टु येढ्ढ येढ्ढ डगालीगोळ्द ल्यालमा ऊंद ऊंद गाठ ईरूल, अव दिवट समेत ऊंदा तुकळा अन बन्सकु ईरूल.

³⁶ अऊर्द गाठगोळ अदिक डगालीगोळ, सप्पा दिवट समेत ऊंदा तुकळा अन ईरूल, शुद्ध व्हान्ना मळुसकु पुरा दिवट ऊंदा तुकळा अन माळसुसेत.

³⁷ अदिक येळ दिंग्या माळसुसेत; अदिक दिंग्या होताक्कु आगुल कि अव दिवट इन मुंद ऊजुळ कोळुल.

³⁸ अदुर्द चिमटा अदिक ताटी सप्पा शुद्ध व्हान्ना अन ईरूल.

³⁹ अद सप्पा ई पुरा सामान समेत चौतीस किलो तीम शुद्ध व्हान्ना अन बनसुल.

⁴⁰ अदिक सावधान ईतकु ई सप्पा वस्तुगोळी आ नमुना अन घाई माळसुसेत, जो नीनी ई पहाळी मा तोर्सकु आग्याद.”