निर्गमन 26

¹ “बाक निवासस्थान इन साटी हत्त पळदागोळ माळसुसेत; ईव निवळुस्द महीन मलमल देल माळ्द नीळा, जांभळा, अदिक क्याचांद रंग इन कपळा अन ईरूल, अदिक ईऊर दा यावारा कुशल कारीगर से करूबगोळ्द कढ़ाई माळसुसेत.

² ऊंद ऊंद पळदागोळ्द लंबाई आट्ठावीस कय अदिक चौळाई नाक कय इन ईरूल: सप्पा पळदागोळ ऊंदा नाप इनव ईरूल.

³ अईद पळदागोळ आबुर दाबुर देल जुळ्सकु ईरूल; अदिक बाक जो अईद पळदागोळ ईत्ताव अव भी आबुर दाबुर देल जुळ्सकु ईरूल.

⁴ अदिक यल ईव येढ्ढु पळदागोळ जोळ्सकु आगुल अल इन येढ्ढु किनारा मा नीळा नीळा फन्दागोळ हचुसेत.

⁵ येढ्ढु किनारा दा पचास पचास फन्दागोळ हिंग हचुसेत कि अव आमने-सामने ईरूल.”

⁶ अदिक व्हान्ना नव पचास आकळागोळ माळसुसेत; अदिक पळदागोळी ईवा आकळागोळ देल हिंग जोळसुसेत कि निवासस्थान मिलुसकु ऊंद आगेगुल.

⁷ “बाक निवास इन म्याकुच तम्बु उन क्याल्सा कोळोर साटी मर्री इन चुट्टी इन हनुन पळदागोळ माळसुसेत.

⁸ ऊंद ऊंद पळदा अन लंबाई तीस कय अदिक चौळाई नाक कय इन ईरूल; हनुन इन हनुन पळदागोळ ऊंदा नाप इनव ईरूल.

⁹ अदिक अईद पळदा अलग अदिक बाक आर पळदागोळ अलग जोळसुसेत, अदिक छटवा पळदा अक तम्बु उन मुंद मुरूकु येढ्ढ माळ बुळेत.

¹⁰ अदिक नी पचास आकळागोळ आ पळदागोळ किनारा दा जो व्हार्या टु मिसळुसकु आदीत अदिक पचास अच आकळागोळ दुसरा दिकळोद पळदा अन किनारा दा जो व्हार्या टु मिसळुसकु आदीत माळसुसेत.

¹¹ अदिक पीतळा अन पचास आकळागोळ माळेत, अदिक आकळागोळी फन्दागोळ दा हचकु तम्बु उक हिंग जोळसुसेत कि अव मिलुसकु ऊंद आगेगुल.

¹² अदिक तम्बु उन पळदागोळ्द हिलगुसतेला भाग, मतलब जो आर्धा पट ईत्तीत, अद निवास इन हिंदळा भाग दी लटकुस्त ईरूल.

¹³ अदिक तम्बु उन पळदागोळ्द लंबाई दा टु कय तीम ईत्त, अदिक कय तीम आत्त निवास इन मुच्चोर साटी अदुर्द येढ्ढु दी लटकुस्त ईरूल.”

¹⁴ बाक तम्बु उन साटी क्याचांद रंग देल रंगुस्द म्यांडागोळ्द तोगुल इन ऊंद होदोद अदिक अदुर म्याकुच सूइसगोळ तोगुल इन भी ऊंद होदोद माळसुसेत.

¹⁵ “बाक निवास इक निदरूसोर साटी बबूल इन हुळ्लीगोळ्द तख्तागोळ माळसुसेत.

¹⁶ ऊंद ऊंद तख्ता अन लंबाई हत्त कय अदिक चौळाई दिळ कय इन ईरूल.

¹⁷ ऊंद ऊंद तख्ता दा आबुर दाबुर से जोळ्सद येढ्ढ येढ्ढ चूली ईरूल; निवास इन सप्पा तख्तागोळी ईदा प्रकार देल माळसुसेत.

¹⁸ निवास इन साटी जो तख्तागोळ नी माळसुस्या अऊर दा टु ईप्पत तख्तागोळ रा दक्षिण दिकळोद साटी ईरूल;

¹⁹ अदिक ईप्पत तख्तागोळ ल्यालमा बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा अदुर चूलीगोळ साटी येढ्ढ येढ्ढ कुर्चीगोळ.

²⁰ निवास इन दुसरा दी, मतलब उत्तर दिकळोद साटी ईप्पत तख्तागोळ माळसुसेत;

²¹ अदिक अऊर साटी बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा येढ्ढ येढ्ढ कुर्चीगोळ ईरूल.

²² निवास इन हिंदळा भाग दी, मतलब पश्चिम दिकळोद साटी आर तख्तागोळ माळसुसेत.

²³ अदिक हिंदळा भाग दा निवास इन क्वानागोळ साटी येढ्ढ तख्तागोळ माळसुसेत;

²⁴ अदिक ईव ल्यालमा टु येढ्ढ येढ्ढ भाग इनव ईरूल, अदिक येढ्ढु भाग म्याकुच इन क्वाना ताका ऊंद ऊंद कळा दा मिलुसकु आगुल; येढ्ढु तख्तागोळ्द ईदा रूप ईरूल; ईद येढ्ढु क्वाना अन साटी ईरूल.”

²⁵ अदिक येठ्ठ तख्तागोळ ईरूल, अदिक अऊर्द बेळ्ली इन सॉळा कुर्चीगोळ ईरूल; मतलब ऊंद ऊंद तख्ता अन ल्यालमा येढ्ढ येढ्ढ कुर्चीगोळ ईरूल.

²⁶ “बाक बबूल इन हुळ्ली इन बेंडागोळ माळसुसेत, मतलब निवास इन ऊंद दिकळोद तख्तागोळ साटी अईद,

²⁷ अदिक निवास इन दुसरा दिकळोद तख्तागोळ साटी अईद बेंडागोळ, अदिक निवास इन जो भाग पश्चिम दी हिंदळा भाग दा ईत्तीत, अदुर साटी अईद बेंडागोळ माळसुसेत.

²⁸ न्याड्यागोळ्द बेंडा जो तख्तागोळ्द न्याड्या दा ईत्तीत अद तम्बु उन ऊंद क्वाना टु दुसरा क्वाना ताका पोहचुसुल.

²⁹ बाक तख्तागोळी व्हान्ना देल मळसुसेत, अदिक अऊर्द कळागोळ जो बेंडागोळ्द मान्नोद क्याल्सा कोट्टाव अवरी भी व्हान्ना देल माळसुसेत; अदिक बेंडागोळी भी व्हान्ना देल मळसुसेत.

³⁰ अदिक निवास इक ईदा रिति देल निदरूसेत ह्यांग ई पहाळ मा नीनी तोर्सकु आग्याद.”

³¹ “बाक नीळा, जांभळा अदिक क्याचांद रंग इन अदिक महीन मलमल इन ऊंद न्याड्यागोळ्द पळदा माळसुसेत; यदुर मा कुशल कारीगर उन द्वारा करूब कढ़ाई माळकु आगुल.

³² अदिक अदरी व्हान्ना देल मळुस्द बबूल इन नाक खम्भागोळ मा हिलगुसेत, ईऊर्द आकळागोळ व्हान्ना नव ईरूल, अदिक ईव बेळ्ली इन नाक कुर्चीगोळ मा निदुरकु ईरूल.

³³ अदिक न्याड्यागोळ्द पळदा अक आकळागोळ्द ल्यालमा हिलगुसकु, अदुर आळ दा गवाही इन चिट्टी इन सन्दुक अंदर तरेत, ई प्रकार अद न्याड्यागोळ्द पळदा नीम साटी पवित्रस्थान इक परम पवित्रस्थान दा ब्यार्र माळकु ईरूल.

³⁴ बाक परम पवित्रस्थान दा गवाही इन चिट्टी इन सन्दुक उन म्याकुच प्रायश्चित इन झाकनी इक ईटेत.

³⁵ अदिक आ पळदा अन व्हार्या निवास इन उत्तर दी मेज ईटेत; अदिक दक्षिण दी मेज इन मुंद दीवट ईटेत.

³⁶ बाक तम्बु उन दरवाजा अन साटी नीळा, जांभळा अदिक क्याचांद रंग इन अदिक महीन मलमल सुक्ष्म सनी इन कपळा अन कढ़ाई इन क्याल्सा माळ्द ऊंद पळदा माळसुसेत.

³⁷ अदिक ई पळदा अन साटी बबूल इन अईद खम्भागोळ माळसुसेत, अदिक अवरी व्हान्ना देल मळसुसेत; अऊर कळागोळ व्हान्ना नव ईरूल, अदिक अऊर साटी पीतळा अन अईद कुर्चीगोळ ढाल्सकु माळसुसेत.”