रोमियों 10

¹ हे वार्टुरा अदिक आकतींगेरा, नान मन इन अभिलाषा अदिक आंदुर साटी परमेश्वर से नान प्रार्थना आद कि आंदरी उद्धार सिक्‍कुल.

² यतिकी ना ई मात देल गवाही कोळतीन आंदुर परमेश्वर दा मगन ईरतार, लेकीन आंदुर भक्ति खरा ग्यान मा आधारित हैलेच.

³ यतिकी आंदुर परमेश्वर उन न्यायीपन देल अनजान आगकु, अदिक तान न्यायीपन स्थापित माळोद कोशिश माळकु, परमेश्वर उन न्यायीपन इन हात्‍ती आगीदील.

⁴ मसीह व्यवस्था अन अन्त माळदुन कि हर ऊंद जो विश्वास माळतान परमेश्वर उन साटी न्यायी आगुल.

⁵ यतिकी मूसा ईद लिखस्यान कि जो मंळसा आ न्यायीपन मा जो व्यवस्था देल आद, नळुतान, आव अदुर देला जित्‍ता ईत्‍तान.

⁶ लेकीन जो न्यायीपन विश्वास देल आद, अदुर बारा दा शास्त्र ईद अनतद, “नी तान मन दा ईद अनबाळेत कि, मसीह अक ईळ्सकु तरोरसाटी स्वर्ग मा याव येर्‍यान?” मतलब मसीह अक ल्यालमा तरोरसाटी,

⁷ या “मसीह अक सोत्‍तुर दा टु जित्‍ता माळकु म्याकुच तरोरसाटी अधोलोक दा याव ईळदान?” मतलब मसीह अक सोत्‍तुर बाद्दा म्याकुच ओयोर साटी.

⁸ लेकीन अद येन अनतद? ईद कि “वचन नीन हाती आद, नीन बाय दा अदिक नीन मन दा आद,” ईद अदा विश्वास इन वचन हुन, जो नाव प्रचार माळतेव,

⁹ कि अगर नी तान बाय देल यीशु उक प्रभु जान्सकु अंगीकार माळ्या, अदिक तान मन देल विश्वास माळ्या कि परमेश्वर आऊक सोत्‍तुर दा टु जित्‍ता माळदुन, रा नीन जरूर उद्धार आदीत.

¹⁰ यतिकी विश्वास माळदुर देल नाव परमेश्वर उन सांगुळ सही संबंध दा बरतेव अदिक बाय देल कबुल माळदुर देल नामी मुक्ति सिकतद.

¹¹ यतिकी पवित्रशास्त्र ईद अनतद, “जो यावारा आऊन मा विश्वास माळतान आव लज्जित आगतीदील.”

¹² यहूदीगोळ अदिक गैरयहूदीगोळ दा येनु फरक हैलेच, इदुरसाटी कि आव परमेश्वर सप्पा मुंदुर प्रभु हुन अदिक आव सप्पा मुंदुरी बहूतायत देल आशिषीत माळतान जो आऊक कारूतार.

¹³ यतिकी शास्त्र दा लिख्सकु आद, “जो यावारा प्रभु उक मदत साटी कारूतान, आव ऊळ्सकु आदान.”

¹⁴ लेकीन यार मा आंदुर विश्वास माळीदील, आंदुर आऊक ह्यांग मदत साटी कारदान? अदिक यार संदेश केळीदील आऊन मा ह्यांग विश्वास माळ्यार? अदिक प्रचारक बिना ह्यांग केळ्यार?

¹⁵ अदिक अगर संदेश केळसावाळेर कळुकु आगतीदील, रा ह्यांग प्रचार माळ्यार? ह्यांग शास्त्र दा लिख्सकु आद, “आंदुर काल येन सुहावना आव, जो खुशखबरी हुडुकु बरतार!”

¹⁶ लेकीन सप्पा मुंदुर आ खुशखबरी मा किव हचीदिल: यशायाह अनतान, “हे प्रभु, याव नाम समाचार मा विश्वास माळ्यान?”

¹⁷ इदुरसाटी विश्वास संदेश इन केळदुर देल अदिक संदेश मसीह अन वचन देल आगतद.

¹⁸ लेकीन ना अनतीन, येन आंदुर केळीदील? केळोद रा जरूरी आद; यतिकी शास्त्र दा लिख्सकु आद, “आंदुर स्वर सप्पा पृथ्वी मा, अदिक आंदुर वचन दुनिया अन आखरी ताका पोहचुसेग्याव.”

¹⁹ ना मात्‍त अनतीन, येन इस्त्राएली ईला जानसोर? पयले रा मूसा अनतान, “ना आंदुर द्वारा जो लॉकुर ईला, नीम मन दा जलन उपजुसाईन; ना ऊंद मूळ लॉकुर द्वारा नीमी सिट्ट तोर्साईन.”

²⁰ बाक यशायाह हापाळ हिम्मत इन सांगुळ अनतान, “जो नानी ईला ढुंढसोर, आंदरी ना सिक्‍केदीन; अदिक जो नानी केळतोगोर भी ईला, आंदुर मा ना प्रगट आगेदीन.”

²¹ लेकीन इस्त्राएल इन बारा दा आव ईद अनतान, “ना पुरा दिन तान कय ऊंद आग्या ईला मानसावाळेर अदिक झगळा माळावाळेर लॉकुर दी पसरूस्कु ईत्‍तीन.”