रोमियों 9

¹ ना मसीह दा सही अनतीन, ना ख्वाटा माताळालीन अदिक नान मन भी पवित्र आत्मा दा गवाही कोळतद

² कि नानी बळा दुख आद, अदिक नान मन हमेशा दुखी ईरतद,

³ यतिकी ना ईल ताका चाहासीन कि तान वार्टुर साटी जो मय इन भाव देल नान कुटुम्बी आर, खुद अच परमेश्वर देल श्रापित अदिक मसीह से अलग आगेगतद.

⁴ आंदुर इस्त्राएली उर, अदिक परमेश्वर उन पार उन अधिकार अदिक महिमा अदिक वादागोळ अदिक व्यवस्था अन उपहार अदिक परमेश्वर उन उपासना अदिक प्रतिग्यागोळ आंदुरवा हुव.

⁵ पुर्वज भी आंदुर्दा उर, अदिक मसीह भी मय इन भाव देल आंदुर दा टु आदुन. परमेश्वर जो सप्पा मुंदुर म्याकुच राज्य माळतान आव हमेशा हमेशा धन्य ईरूल. आमीन.

⁶ लेकीन ईद ईला कि परमेश्वर उन वचन टलसेत, इदुरसाटी कि जो इस्त्राएल इन वंश आर, आंदुर सप्पा इस्त्राएली आल्लच;

⁷ अदिक ना अब्राहम उन वंश आगोद कारण सप्पा आऊन औलाद ठहरूसदुर, लेकीन शास्त्र दा लिख्सकु आद, “इसहाक टु अच नीन वंश कहलुस्यान.”

⁸ मतलब मय इन औलाद परमेश्वर उन औलाद आल्लच, लेकीन प्रतिग्या अन औलाद वंश आळुकु आगतद.

⁹ यतिकी प्रतिग्या अन वचन ईद हुन: “ना उचित समय इन अनुसार बराईन, अदिक सारा अक पार आदान.”

¹⁰ अदिक सिर्फ ईदा ईला, लेकीन याग रिबका भी ऊंद देल मतलब नाम आप्प इसहाक देल येढ्ढ पारगोळ आदुर,

¹¹ लेकीन आकिन ऊंद चिग्द उक निवळुसोद ईद पुरा तरीका देल परमेश्वर उन खुद इन उपदेश इन परिणाम ईरोद, परमेश्वर आकिन से अंदुन, धोड्डेव स्याणेव उन स्यावा माळ्यान.

¹² ई मातगोळ परमेश्वर आंदुर जनम इन पयले अदिक आंदुर येनारा बुरा भला माळ से पयले अंदुन रा परमेश्वर उन पसंद आऊन कारदुर मा निर्भर आद, ना अदुर मा कि आंदुर येन माळदुर.

¹³ ह्यांग शास्त्र दा लिख्सकु आद, “ना याकूब से प्यार माळदीन, लेकीन एसाव उक अप्रिय जान्सदीन.”

¹⁴ इदुरसाटी नाव येन अंदेव? येन परमेश्वर उन हाती अन्याय आद? यागलु ईला.

¹⁵ यतिकी आव मूसा से अनतान, “ना याता मंळसा मा दया माळोद चाहासाईन आऊन मा अच दया माळाईन, अदिक याता मंळसा मा कृपा माळोद चाहासाईन, आऊन मा का कृपा माळाईन.”

¹⁶ इदुरसाटी ईद ना रा चाहासावाळा अन, ना मयनत माळावाळा अन लेकीन दया माळावाळा परमेश्वर मा निर्भर आद.

¹⁷ यतिकी शास्त्र दा फिरौन से अंदकु आत, “ना नीनी इदुर्दा साटी निदरूसीन कि नीन दा तान सामर्थ्य तोरसाईन, अदिक नान हेसुर इन प्रचार पुरा पृथ्वी मा आगुल.”

¹⁸ इदुरसाटी आव यार मा चाहासतान आऊन मा दया माळतान, अदिक यारी चाहासतान आऊक कठोर माळ बुळतान.

¹⁹ इदुरसाटी नीम दा टु यावारा नानी ईद अंदान, “रा बाक परमेश्वर नामी दोषी येती ठहरूसतान? याव परमेश्वर उन इच्छा अन सामना माळ सकतान?”

²⁰ हे मंळसा, नी याव हुय जो परमेश्वर उन विरोध दा माताळत्या? ऊंद घळुस्द वस्तु तान घळुसावाळा से केळ सकतद, “नी नानी हिंग येती माळ्या?”

²¹ येन कुंभार उक मुण्ण मा अधिकार हैलेच कि ऊंद अच ल्वांदा दा टु ऊंद बरतन आदर इन साटी अदिक दुसरा अक अनादर इन साटी माळ्यान?

²² परमेश्वर तान सिट्ट तोर्सली अदिक तान सामर्थ्य प्रगट माळोद इच्छा देल सिट्ट इन बरतनगोळ्द, जो विनाश इन साटी तयार माळकु आगीदव, बळा धीरज देल सहन माळदुन;

²³ अदिक दया अन बरतनगोळ मा, यवरी आव महिमा अन साटी पयले टु तयार माळदुन, तान महिमा अन धन इक प्रगट माळोद इच्छा माळदुन?

²⁴ मतलब नाम मा यारी आव ना सिर्फ यहूदीगोळ दा टु, उलटा गैरयहूदीगोळ दा टु भी कारदुन.

²⁵ ह्यांग आव होशे अन किताब दा भी अनतान, “जो नान लॉकुर ईला ईरोर, आंदरी ना तान लॉकुर अनाईन; अदिक याता लॉकुर मा प्यार ईला ईरोद, आंदरी प्रिय अनाईन.

²⁶ अदिक हिंग आदीत कि याता जागा दा आंदुर से ईद अनकु आगीत कि नीव नान लॉकुर आल्लच, अदा जागा आंदुर जित्‍ता परमेश्वर उन औलाद अंदकु आदार.”

²⁷ अदिक यशायाह इस्त्राएल इन बारा दा कारूकु अनतान, “चाहे इस्त्राएल इन औलादगोळ गिनती समुद्र अन धुळा अन बराबर ईरूल, तरी भी आंदुर दा टु थ्वाळासा अच ऊळ्सकु आदार.

²⁸ यतिकी प्रभु तान वचन पृथ्वी मा पुरा माळकु, राटनेरी अदरी सिद्ध माळ्यान.”

²⁹ ह्यांग यशायाह पयले भी अंदिदुन, “अगर सेनागोळ प्रभु नाम साटी येनारा वंश बिळालुन, रा नाव सदोम उन घाई आगेगायदेव, अदिक गमोरा अन सदृश ठहरूसायदेव.”

³⁰ इदुरसाटी नाव येन अंदेव? ईद कि गैरयहूदीगोळ जो न्यायीपन इन खोज ईला माळतोगोर, न्यायीपन हाशील माळदुर मतलब आ न्यायीपन इक विश्वास देल हाशील माळ्यार;

³¹ लेकीन इस्त्राएली, जो न्यायीपन इन व्यवस्था अन खोज माळतोगोर आ व्यवस्था ताका पोहचुसीदील.

³² यदुर साटी? इदुरसाटी कि आंदुर विश्वास देल ईला, लेकीन कर्मगोळ देल अदुर खोज माळतोगोर. आंदुर आ ठोकर इन कल्ल मा ठोकर तिंदुर,

³³ ह्यांग पवित्रशास्त्र दा लिख्सकु आद, “नोळी, ना सिय्योन दा ऊंद चट्टान ईटतीन, अदिक जो परमेश्वर उन वचन मा विश्वास माळ्यान आव लज्जित आगतीदील.”