1 Corintios 8

1 Jè kjoa̱ xi ts’e̱ yijoâla̱ cho̱ xi sík’enâla̱ xkósònâla̱ xi̱ta̱ i̱sò’nde nga tsjáâla̱ kjo̱tjò, jñò bixónânò nga ngats’iaá jyeé tjínâná kjoa̱chji̱ne̱ i̱t’aà ts’e̱ kjoa̱ koi. Kixi̱í kjoa̱, ta̱nga k’e̱ nga tjínâná kjoa̱chji̱ne̱, ma’ngaá takoán. Ta̱nga k’e̱ nga tjínâná jè kjo̱tsjacha, ìsa̱á ndaà ‘biìâlá nga’ñó xinguia̱á. 2 Tsà tjín i’nga xi̱ta̱ xi tsò nga ndaà machi̱yaâla̱, chijaá ìsa̱âla̱; kj’eè kiì beè yije koni s’ín tjínèâla̱ nga skoe̱. 3 Jngoò xi̱ta̱ xi matsjakeè Nainá, jè Nainá ndaà beèxkon. 4 K’oa̱á xanânò kó s’ín tjín, tsà ma chine yijoâla̱ cho̱ xi ya̱ biyaàt’aàâla̱ jñà xkósòn. Tíjiìnâná nga jñà xkósòn xi tjín i̱ i̱sò’nde, ni̱mé nga’ñó tjínâla̱. Nga ta jngoò maâne xi Nainá. 5 Jñà xi̱ta̱, k’oa̱á s’ín síkítsjeèn nga kjìn ma nainá xi tjín ján ngajmiì ko̱ i̱t’aà nangui. (Kixi̱í kjoa̱ i̱t’aà ts’e̱ xi̱ta̱ koi, kjìn ma xi nainá ko̱ na̱’ènâná tsòâla̱.) 6 Ta̱nga jñá, ‘yaâná nga ta jngoò maâne Nainá xi Na̱’ènâná nga i̱t’aà ts’e̱é inchrobàâne ni̱ta̱ mé xi tjín. Jñá, koií xá tjínâná nga si̱kitasoán xáâla̱. Ti̱koa̱á ta jngoò maâne xi otíxomaâná, jè Jesucristo; nga i̱t’aà ts’e̱é nga’ñóâla̱ kisindaà yije ni̱ta̱ mé xi tjín ko̱ ti̱koa̱á jñá, i̱t’aà ts’e̱é titsa̱jnakoaán. 7 Ta̱nga mìtsà ngats’iì xi̱ta̱ tíjiìnâla̱ kjoa̱ koi. Tjín i’nga xi̱ta̱ ’ndseé xi jye k’oa̱s’ín kjò’ngaâla̱ kjoa̱ ts’e̱ xkósòn k’e̱ nga ti̱kj’eè mokjeiínâla̱. Ta̱nga i̱’ndei̱, k’e̱ nga kine yijoâla̱ cho̱ xi ya̱ biyaàt’aàâla̱ jñà xkósòn, k’oa̱á s’ín síkítsjeèn nga jñà nchibeèxkón xkósòn xi nainá tsòâla̱ xi̱ta̱ i̱sò’nde. Nga jò tjín kjo̱hítsjeènâla̱, k’oa̱á s’ín fìyaâla̱ nga jé ótsji nguixko̱n Nainá. 8 Jñò bixónânó nga jñà tsojmì xi ma chine, mìtsà koi kjoa̱âla̱ nga ìsa̱ ndaà skoétjòâná Nainá. Tsà ki̱chiaá mìtsà ìsa̱ ndaà ki̱tsa̱jnaá ko̱ tsà mìkiì ki̱chiaá mìtsà ìsa̱ ch’o ki̱tsa̱jnaá nga nguixko̱n Nainá. 9 Kixi̱í kjoa̱, tjí’ndeâná ni̱ta̱ mé xi chji̱ne̱é. Ta̱nga jñá jchósònâlá yijoâná nga mì k’oa̱á tjín xi chji̱ne̱é méâne jñà xi̱ta̱ ’ndseé xi indaàjiìn tjín kjo̱hítsjeènâla̱ mì jé sa̱kòâla̱. 10 Tsà tjín jngoò xi̱ta̱ xinguio̱o xi tsò nga tjínâla̱ kjo̱hítsjeèn nga ma chine ni̱ta̱ mé yijoâne, ko̱ ya̱á fì kakjèn ya̱ i̱’nde ñánda yaxkón xkósòn; tsà koi na̱chrjeinâla ya̱ skoe̱ jngoò ’ndsé xi indaàjiìn tjín kjo̱hítsjeènâla̱ nga ya̱ tíkjèn. Jè xi̱ta̱ ’ndsé, k’oa̱á ti̱s’ín s’i̱in. 11 Kjo̱hítsjeènâla̱ xi̱ta̱ jè nga tsò nga maá chine yije ni̱ta̱ méâne, koií kjoa̱âla̱ nga kjo̱’in si̱ìkjeiín jè ’ndsè xi indaàjiìn tjín kjo̱hítsjeènâla̱ xi Cristo k’en nga̱jo̱âla̱. 12 K’e̱ nga jé binchaàtsjioò xi kondra̱ ts’e̱ xi̱ta̱ ’ndseé nga nìkits’ónâjñoò kjo̱hítsjeènâla̱ xi indaàjiìn tjín, jé binchaàtsjioò xi kondra̱ ts’e̱ Cristo. 13 ‘A̱n, tsà ta koií kjoa̱âla̱ ts’e̱ tsojmì xi kíne̱e nga jé sa̱kòâla̱ jè ’ndsè, ti̱koa̱áâne, jngoò k’a mì ti̱ kiì skíne̱âna yijo, méâne nga mì jé sakóâla̱ ’ndsè.