1 Pedro 3

1 K’oa̱á ti̱s’ín tjín i̱t’aà tsa̱jòn xi íchjín ‘mìânò, nangui titsa̱jnaâlà x’i̱nânò, méâne jñà xi̱ta̱ x’i̱nânò tsà tjín i’nga xi mìkiì mokjeiínâla̱ ‘énâla̱ Nainá, ko̱kjeiínâla̱, na̱s’ín mìkiì ki̱nókjoa̱ko̱o kjoa̱ ts’e̱ Nainá. K’e̱ nga skoe̱xkonânò nga ndaà titsa̱nìjchá yijoânò ti̱koa̱á si̱ìkjatjìyaáâla̱ yijoâla̱. 2 Skótsejènânò nga tsjeè titsa̱nìjchá yijoânò nga ndaà yaxkón Nainá. 3 Ko̱ kì tà i̱sò’ngaâla̱ yijoânò ‘ñó ndaà bíndaà, nga ‘ñó ndaà bí’ñó tsja̱ skoò, nga ndáto̱n chjí nìkjeén xi nguì oro, nga jñà nikje x’ióânò ‘ñó xkón kjoàn. 4 Majìn, jè xi nchrobájiìn ini̱ma̱ânò xi ndaà síkatsejènânò, jèâné xi mìkiì bits’on, jè ini̱ma̱ xi indaàkjoa̱ ko̱ xi ’nchán tíjna. Jè xi ‘ñó tse chjíâla̱ nga nguixko̱n Nainá. 5 Nga sa̱ kjòtseé, jñà íchjín xi ndaà kijtseèxkón Nainá nga kiskoòñàâla̱, k’oa̱á s’ín ndaà tsatsejèn nga nangui tsibìtsa̱jnaâla̱ x’i̱nâla̱. 6 K’oa̱á s’ín kis’iìn Sara nga kisìkitasònâla̱ Abraham. K’oa̱á maâne nga ndaà kijtseèxkón nga jè xi Na̱’èn tíjna. Jñò, tsà ndaà ’nè ko̱ tsà nìmé kjo̱xkón tjínânò, tje̱âla̱ Saraá ma. 7 Jñò xi x’i̱n ‘mìânò, ndaà ti̱tsa̱jnako̱o jñà íchjínânò nga ndaà kàtachi̱yaânò nga ìsa̱á indaàkjoa̱. Ndaà jcha̱xkón íchjínânò nga ngásòn tjoéânò jè kjo̱ndaàâla̱ Nainá, jè kjoa̱binachon xi jè Nainá jye tjíndaàâla̱ nga tsjáânò. K’oa̱á s’ín t’e̱en méâne k’e̱ nga nokjoàt’aàâlà Nainá, ni̱mé si̱ìjtiânò. 8 Nga yije kjoa̱ koi, ngats’ioò, ta jngoò kjo̱hítsjeèn kàtas’eânò; ti̱jetakòn xinguio̱o; tjòcha t’e̱en xinguio̱o nga ’ndsè chiba; chahi̱ma̱a xinguio̱o; i̱ma̱ kjoa̱ t’e̱en. 9 Tsà yá xi ch’o síko̱ânò, kì k’oa̱á ti̱s’ín ’nè ngajoânò. Tsà yá xi ‘on chja̱jnoânò, kì k’oa̱á ti̱s’ín nokjoàjno ngajoâlà. Jñò, ta̱ sa̱á ti̱jét’aàâlà Nainá nga kàtasíchikonât’in; nga jyeé ‘yaà nga koií xá kinokjoáânò nga Nainá si̱ìchikonât’inânò. 10 Nga: Jè xi mejènâla̱ nga tsja s’eâla̱ nga tíjnakon, nga mejènâla̱ skoe̱ na̱chrjein xi ndaà, kàtasíkinda̱ ni̱je̱nâla̱ nga mì ch’o ki̱chja̱; ko̱ kàtasíkinda̱ tso’ba, nga mì ‘én ndiso ki̱chja̱. 11 Ti̱nchat’aàxìnâlà kjoa̱ xi ch’o tjín; ndaà t’e̱en. ‘Nchán titsa̱jnako̱o xinguio̱o ni̱ta̱ mé kjoa̱ xi tjínânò. 12 Nga jè Na̱’ènâná tísík’aá xko̱n nga tísíkinda̱ xi xi̱ta̱ kixi̱, tíbinchá líkáâla̱ nga tí’nchréâla̱ k’e̱ nga chja̱t’aàâla̱, ta̱nga jñà xi̱ta̱ xi ch’o s’ín bí’maáâla̱ i̱sénâla̱ nga kondra̱ ts’e̱âné. 13 Jñò, tsà kjit’aà na̱chrjein nga ndaà titsa̱’nè, mì yá xi̱ta̱ xi ch’o si̱ìko̱ânò. 14 Ta̱nga mé ta ndaàânò tsà kjo̱’in titsa̱nìkjioón ta koi kjoa̱âla̱ nga kixi̱ ’nè. Ta̱nga ni̱ jngoò xi̱ta̱ tsakjoònâlà, kì binchaxkónâlà yijoânò. 15 Jè ti̱kíjna ítjòn Cristo nga jè kàtatíxomaânò ya̱ i̱jiìn ini̱ma̱ânò. Ti̱tsa̱jnandaà nga kjit’aà na̱chrjein méâne nga ko̱ma kéno̱jmíyaâlà jñà xi̱ta̱ xi sko̱nanguiyaânò i̱t’aà ts’e̱ kjoa̱ xi titsa̱chiñáâlà i̱t’aà ts’e̱ Cristo. 16 K’e̱ nga ki̱nókjoa̱a, indaàkjoa̱ t’e̱en. Cha̱xkón jñà xi kéno̱jmíyaâlà, tsjeè kàtìjna kjo̱hítsjeènânò, méâne jñà xi̱ta̱ xi ch’o chja̱jnoânò nga ndaà ’nè nga mokjeiínânò i̱t’aà ts’e̱ Cristo, ko̱sobàâla̱ nga jñò chja̱jnoânò. 17 Ãsa̱á ndaà tjín tsà ko̱s’ín mejènâla̱ Nainá nga kjo̱’in si̱kjioón k’e̱ nga ndaà ’nè, mì k’oa̱âne tsà k’e̱ nga ch’o ’nè. 18 Nga skanda jè Cristo, jngoò k’aá kisìkjeiín kjo̱’in k’e̱ nga k’en xi kjoa̱ ts’e̱ jéâná. Cristo, mìtsà jé tsohótsji; xi̱ta̱ kixi̱âné; kisìkjeiín kjo̱’in i̱t’aà ts’e̱ xi̱ta̱ xi jé tjínâla̱ méâne nga ko̱ma kji̱ko̱âná nguixko̱n Nainá. Yijoâla̱, jñà xi̱ta̱ kisìk’en, ta̱nga i̱t’aà ts’e̱ Ini̱ma̱âla̱ jaáya ìjngoò k’aâla̱. 19 Ko̱ jè Ini̱ma̱âla̱ Cristo kiì i̱’nde ñánda títsa̱jna ini̱ma̱ xi títsa̱jnaya nda̱yá nga kiìchja̱yajiìnâla̱. 20 Ini̱ma̱ koi, ts’e̱é xi̱ta̱ xi mìkiì kiì’nchréñijonâla̱ Nainá na̱chrjein ts’e̱ Noé. Nainá tseé kiskoòñà kjoa̱ k’e̱ nga Noé tsibíndaà chitso je. Ya̱ i̱ya chitso, tà jiìn maâne xi̱ta̱ xi itjokàjiìn kjo̱’in nga mìkiì k’en k’e̱ nga ts’a jtsí xkón. 21 Ko̱ jè nandá ts’e̱ jtsí xkón, jè ngayaâla̱ nandá xi maâná bautizar na̱chrjein i̱’ndei̱ nga bitjokàjñaá kjo̱’in. Ta̱nga nga maá bautizar, mìtsà yijoâná matsjeèâne, jèâné nga nìjét’aàâlá Nainá nga tsjeè kàtas’e kjo̱hítsjeènâná. Ko̱ bitjokàjñaá kjo̱’in, koií kjoa̱âla̱ nga jaáyaâla̱ Cristo, 22 ko̱ kiì mijìn ján ngajmiì nga ya̱ tíjnat’aà chrja kixi̱âla̱ Nainá. Jé tíhotíxomaâla̱ àkja̱le̱ ko̱ ini̱ma̱ xi tjínâla̱ kjo̱tíxoma ko̱ ngats’iì xi tjínâla̱ nga’ñó.