1 Tesalonicenses 3

1 K’e̱ nga mì ti̱ kiì komà kichìkjoa̱ ìsa̱ânaje̱n nga mejènânaje̱n si̱jiìnânaje̱n kó s’ín titsa̱jnaà ján Tesalónica, k’oa̱á komàâne nga kichibàyaânaje̱n nga kinìkasénâje̱n jè ’ndsè Timoteo, ko̱ ngaje̱n ya̱á tsitsa̱jnaâje̱n Atenas. 2 Kinìkasénâje̱n jè ’ndseé Timoteo, chi̱’ndaâla̱ Naináâné nga ti̱koa̱á chja̱ya ‘én ndaàâla̱ Nainá xi kjoa̱ ts’e̱ Cristo koni ngaje̱n. Koií xá kiìkonânò méâne nga kàtatsjáâìsaânò nga’ñó nga ìsa̱ ‘ñó ndaà kixi̱ ki̱tsa̱jnaà koni s’ín mokjeiínânò, 3 méâne nga ni̱jngoò xi si̱hindaàâne kjoa̱ ts’e̱ kjo̱’in xi titsa̱nìkjioón. Jñò, jyeé ndaà tíjiìnânò nga k’oa̱á s’ín tjínèâla̱ nga ko̱s’ín ko̱mat’iaán. 4 K’e̱ nga ti̱sa̱ ya̱ titsa̱jnako̱ânòje̱n, k’oa̱á ki’mìânòje̱n nga kjo̱’iín s’e̱âná. I̱’ndei̱, jyeé titsa̱’yaà nga k’oa̱á s’ín tímat’ioòn. 5 Koií kjoa̱âla̱ nga mì ti̱ kiì kiskoòñà kjoa̱âna; kisìkasén Timoteo nga mejènâna skoeè kós’ín titsa̱jnako̱o jè ‘én xi mokjeiínânò. Tìmakájnoâna tsà jye kiskoòna̱cha̱nânò jè xi̱ta̱ nei̱í. Tsà koií na̱chrjeinâla, xá xi ki’nèâje̱n, tsà ta kichijàâné. 6 I̱’ndei̱, jè Timoteo jyeé j’iìâne nga kiì Tesalónica; ndaà tsò o̱kixi̱ xi ‘yaânaje̱n i̱t’aà tsa̱jòn koni s’ín mokjeiínânò ko̱ nga tjínânò kjo̱tsjacha. K’oa̱á s’ín tsibéno̱jmíânaje̱n nga kjit’aà na̱chrjein tsjaá maânò nga nìkítsjeènânáje̱n. Ti̱koa̱á mejènânò nga jcha̱xkoònânáje̱n koni ngaje̱n ti̱koa̱á mejènânaje̱n jcha̱xkoònânòje̱n. 7 K’oa̱á maâne ndí ’ndsè ko̱ ndí tichjaá, na̱s’ín kjo̱’in ko̱ kjoa̱ kondra̱ titsa̱jnajiìnâje̱n, k’e̱ nga kina’yàâje̱n i̱t’aà tsa̱jòn nga ‘ñó ndaà mokjeiínânò i̱t’aà ts’e̱ Cristo, ti̱koa̱á ngaje̱n, ‘ñó ndaà kjòtsjaânaje̱n. 8 K’e̱ nga kina’yàâje̱n nga kixi̱ onguít’aàâlà Na̱’ènâná, ngaje̱n jyeé mì ti̱ mé makájnoânaje̱n. 9 Ngaje̱n, ‘ñó tse kjo̱tsja tjínânaje̱n nga nguixko̱n Nainá xi kjoa̱ tsa̱jòn skanda mìâla kiì kjoe̱het’aà na̱chrjein nga k’oi̱âla̱je̱n kjo̱ndaà Nainá. 10 Ko̱ na̱chrjein ko̱ ni̱tje̱n nokjoàt’aàâla̱je̱n Nainá méâne nga tsjá’ndeâne nga ko̱ma ko̱nguíchoònânòje̱n. Ti̱koa̱ ko̱ma ko̱kòyaâìsaânòje̱n méâne nga ko̱jngoòâne ‘én xi chijat’aàânò koni s’ín mokjeiínânò. 11 Mejènânaje̱n nga ti̱jèâne Na̱’ènâná xi Nainá ko̱ jè Jesucristo xi otíxomaâná, kàtatsjá’ndeânaje̱n nga ko̱ma ko̱nguíchoònânòje̱n. 12 Jè kjo̱tsjachaâla̱ Na̱’énâná ìsa̱ ndaà kàtasijiìn ini̱ma̱ânò, méâne nga ìsa̱ ndaà ko̱tsjachaânò xinguio̱o ko̱ ngats’iì xi̱ta̱ xi kj’ei̱í, koni ngaje̱n, ndaà matsjachaânòje̱n. 13 Jè Na̱’ènâná kàtatsjáâla̱ nga’ñó ini̱ma̱ânò méâne nga ni̱mé jé sa̱kòt’aàânò ko̱ tsjeè ki̱tsa̱jnaà nga nguixko̱n Nainá xi Na̱’ènâná k’e̱ nga kjoi̱í ìjngoò k’aâne Jesucristo xi otíxomaâná nga tji̱ko̱ ngats’iì xi ya̱ chja̱âne.