1 Timoteo 2

1 Jè kjoa̱ xi ìsa̱ ‘ñó mochjeén, k’oa̱á s’ín tìbìnèânò nga titsi’batjiò ngats’iì xi̱ta̱, ti̱nókjoa̱t’aàâlà Nainá, tìtsi’baâlà Nainá, tjiìâlà kjo̱ndaà i̱t’aà ts’e̱ ngats’iì xi̱ta̱ xi tjín nga tíjtsa i̱sò’nde. 2 Mochjeénâné nga kítsi’batjiá xi xi̱ta̱xá ítjòn títsa̱jna ko̱ ngats’iì xi kjo̱tíxoma tjíya tsja méâne nga ’nchán ki̱tsa̱jnaâná ti̱koa̱ ta̱fì ta̱fì si̱jchá yijoâná ti̱koa̱ jcha̱xkoán Nainá ko̱ jcha̱xkoán kjoa̱ xi ndaà tjín. 3 K’e̱ nga k’oa̱s’ín s’e̱én ndaà tjín koa̱ ndaà sasénâla̱ Nainá xi ochrjekátjìâná kjo̱’in. 4 Nainá, jè xi mejènâla̱ nga ngats’iì xi̱ta̱ ki̱tjokàjiìn kjo̱’in ti̱koa̱ si̱jiìnâla̱ kós’ín tjín xi kjoa̱kixi̱. 5 Tà jngoò ma Nainá; ti̱koa̱á tà jngoò ma xi̱ta̱ xi chja̱tjìâná i̱t’aà ts’e̱ Nainá, jè xi̱ta̱ xi Jesucristo ‘mì. 6 K’e̱ nga kichìya na̱chrjeinâla̱ Nainá, Jesucristo kitsjaà kjo̱tjò yijoâla̱ nga k’en méâne nga ko̱chjítjìâne ngats’iì xi̱ta̱ nga ma ki̱tjokàjiìn kjo̱’in. K’oa̱á s’ín kis’iìn nga kisijiìn yijeâla̱ xi̱ta̱. 7 ‘A̱án kjònga̱tsja xá jè nga ‘a̱n tsibíxáyaâna Cristo nga kichjàya ‘én ndaàâla̱ ti̱koa̱ kokoòyaâla̱ jñà xi mìtsà xi̱ta̱ judío nga ko̱kjeiínâla̱ i̱t’aà ts’e̱ Cristo ti̱koa̱ skoe̱ xi kjoa̱kixi̱. ‘Ãn kixi̱í xi tìxanâlè, mìtsà ‘én ndiso. 8 I̱t’aà ts’e̱ xi̱ta̱ x’i̱n, mejènâna k’e̱ nga chja̱t’aàâla̱ Nainá ni̱ta̱ ñánda i̱’nde títsa̱jna, tsjeè kàtasíkítsa̱jna ini̱ma̱âla̱ k’e̱ nga skímiìtje̱nâla̱ tsja Nainá. Kì kjoa̱jti tíjiìn ini̱ma̱âla̱, koa̱ kì nchikjaánâkjoòâjèn. 9 Ti̱koa̱ jñà íchjín, jè nikje xi ndaà ok’ìnâla̱ kàtakjá. Kì nikje chjí ókjá. Kì ta̱xki̱ sí’ñójno sko̱ ko̱ yijoâla̱ tsojmì xi ‘ñó chjí koni ki̱cha̱ oro ko̱ perla. Chiba chiba kàtíndaà yijoâla̱ méâne nga mì xi̱ta̱ skótsejènâjnoâne. 10 Ta̱ sa̱á xá xi ndaà tjín kàtas’ín koni s’ín ok’ìnâla̱ jñà íchjín xi beèxkón Nainá. 11 Jñà íchjín jyò kàtìtsa̱jna k’e̱ nga skóta’yà ‘énâla̱ Nainá; kàta’nchréñijonâla̱ jè xi okóya. 12 ‘A̱n, mìkiì tsjaà’nde nga jñà íchjín ko̱tìxomaâla̱ xi xi̱ta̱ x’i̱n koa̱ ko̱kòyaâla̱. Ãchjín, jyò kàtìtsa̱jna. 13 Koií kjoa̱âla̱ jè Nainá ítjòn tsibíndaà Adán, i̱skan tsibíndaà Eva. 14 Mìtsà jè Adán xi kichona̱cha̱nâla̱; jè Eva xi chjo̱ónâla̱. K’oa̱á s’ín komàâne nga kisakò jéâla̱. 15 Ta̱nga, jñà íchjín, tsà si̱ìkitasòn koni s’ín mejènâla̱ Nainá nga s’e̱âla̱ i̱xti, ki̱tjokàjiín kjo̱’in. Mochjeénâné nga ndaà ko̱kjeiínâla̱ i̱t’aà ts’e̱ Cristo, nga s’e̱âla̱ kjoa̱tjòcha, nga tsjeè kítsa̱jnako̱ Nainá koa̱ ndaà si̱ìjchá yijoâla̱.