1 Timoteo 3

1 ‘Ãn jè, nguì ‘én kixi̱âné: Tsà tjín jngoò xi̱ta̱ xi mejènâla̱ xá nga na̱xa̱ndáâla̱ Nainá si̱ìkinda̱, ‘ñó ndaà tjín xá xi mejènâla̱. 2 Jè xi̱ta̱ xi si̱ìkinda̱ na̱xa̱ndáâla̱ Nainá mochjeénâné nga ndaà s’i̱in méâne nga mì yá xi ch’o ki̱tso̱âla̱. Jngoò chjo̱ón s’e̱âla̱; jngoò xi̱ta̱ xi indaà tjín ikon; xi̱ta̱ xi ndaà kosònâla̱ yijoâla̱; xi̱ta̱ xi yaxkón nga ndaà tísíjchá yijoâla̱; xi ndaà sís’inâla̱ xi̱ta̱ xi bijchókon; xi̱ta̱ xi ndaà maâla̱ okóya; 3 xi mìtsà xi̱ta̱ ch’i̱; xi mìtsà xi̱ta̱ kjaánâko̱; xi mìtsà to̱n chijé kjòtsjakeè. Jè xi̱ta̱ xi mochjeén xi ndaà xi̱ta̱, xi mìtsà kjoa̱siì sís’inâla̱, xi mìtsà to̱n kájnoâla̱. 4 Mochjeénâné nga ndaà kjo̱tíxomaâla̱ xi̱ta̱ ni’yaâla̱; ndaà si̱ìkixi̱ i̱xtiâla̱ méâne nga s’e̱âla̱ kjo̱xkón i̱xti ti̱koa̱ si̱ìkitasòn koni s’ín tsò xi̱ta̱ jchíngaâla̱. 5 Tsà mìkiì maâla̱ otíxomaâla̱ xi̱ta̱ ni’yaâla̱, ¿kó s’ín ko̱ma si̱ìkinda̱ xi̱ta̱ na̱xa̱ndáâla̱ Cristo? 6 Jè xi síkinda̱ xi̱ta̱ na̱xa̱ndáâla̱ Nainá jè xi mochjeén xi kjòtseé kòkjeiínâla̱, méâne nga mì ’nga ikon ko̱maâne nga mì kjo̱’in s’e̱âla̱ koni komàt’in xi̱ta̱ nei̱í. 7 Mochjeénâné nga ndaà si̱ìjchá yijoâla̱ méâne nga skoe̱xkónâne jñà xi̱ta̱ xi mìkiì mokjeiínâla̱ i̱t’aà ts’e̱ Cristo nga mì ch’o kíjna, nga mì jè xi̱ta̱ nei̱í si̱ìkijneâla̱. 8 K’oa̱á ti̱s’ín tjín ts’e̱ xi̱ta̱ xi si̱ìkitasòn xá nga si̱ìchját’aàâla̱ xi̱ta̱ na̱xa̱ndáâla̱ Nainá, jñà mochjeén xi̱ta̱ xi yaxkón nga ndaà nchisíjchá yijoâla̱. Mìkiì ko̱ma si̱ìkjatjìyaâla̱ ‘én xi chja̱. Mìkiì ko̱ma xán koa̱hijtako̱. Mìkiì ko̱ma to̱n chijé ko̱tsjakeè. 9 Mochjeénâné nga ndaà kàtafìt’aàâla̱ kjoa̱tjí’ma xi jye tsakó Nainá koni s’ín mokjeiínâná i̱t’aà ts’e̱ Cristo. Ti̱koa̱ mochjeénâné nga tsjeè kàtasíkítsa̱jna kjo̱hítsjeènâla̱. 10 Jñà xi̱ta̱ xi si̱ìkitasòn xá nga si̱ìchját’aàâla̱ xi̱ta̱ na̱xa̱ndáâla̱ Nainá, ítjòn kàtachìt’aà tsà ni̱mé kjoa̱ tjínâla̱, i̱kjoàn, k’e̱é kàtasíkitasòn. 11 K’oa̱á ti̱s’ín tjín ts’e̱ íchjín; mochjeénâné nga yaxkón nga ndaà nchisíjchá yijoâla̱. Mì ‘én ndiso ki̱chja̱. Indaà k’oe̱è ikon. Ndaà si̱ìkitasòn yije ni̱ta̱ mé kjoa̱âne. 12 Jè xi̱ta̱ xi síkitasòn xá nga síchját’aàâla̱ xi̱ta̱ na̱xa̱ndáâla̱ Nainá, mochjeénâné nga tà jngoò chjo̱ón s’e̱âla̱. Ndaà kàtatíxomaâla̱ i̱xtiâla̱ ko̱ xi̱ta̱ ni’yaâla̱. 13 Jñà xi̱ta̱ xi ndaà si̱ìkitasòn xá koi, ìsa̱ ndaà jcha̱xkón koa̱ ìsa̱ ‘ñó ndaà s’e̱ ikon koni s’ín mokjeiínâla̱ i̱t’aà ts’e̱ Cristo Jesús. 14 Mejènâna nga kjíkon ni̱to̱nâlè, ta̱nga tsà koií na̱chrjeinâla̱ ko̱chrjeinâyaâna, k’oa̱á maâne tìkjiìâlè xo̱jo̱n jè 15 méâne nga jcha̱âne kós’ín ki̱tsa̱jnakoa̱á xi̱ta̱ xinguia̱á ya̱ i̱jiìn na̱xa̱ndáâla̱ Cristo xi tíjnakon. Jè na̱xa̱ndáâla̱ Cristo tjíya tsja ‘én kixi̱âla̱ Nainá. 16 Nguì ‘én kixi̱âné nga ‘ñó jeya jè kjoa̱’maâla̱ Nainá xi jye tsakó koni s’ín yaxkoán Nainá: Nainá, xi̱ta̱á komà nga j’iì i̱ i̱sò’nde; i̱t’aà ts’e̱ Ini̱ma̱ Tsjeèâla̱ ki’yaâla̱ nga tjínâla̱ kjoa̱kixi̱; jñà àkja̱le̱ kijtseèâné; ‘énâla̱ kinokjoàyajiìnâla̱ ngats’iì xi mìtsà xi̱ta̱ judío; nga tíjtsa i̱sò’nde kòkjeiínâla̱ xi̱ta̱ i̱t’aà ts’e̱ Cristo; jeya kitjoétjòâne ján ngajmiì.