2 Tesalonicenses 1

1 Jñò xi xi̱ta̱ na̱xa̱ndáâla̱ Nainá maà xi titsa̱jnaà ya̱ na̱xa̱ndá Tesalónica nga ya̱ titsa̱jnakjoòko̱o Nainá xi Na̱’ènâná ko̱ jè Jesucristo xi otíxomaâná, ‘a̱n xi ‘mìâna Pablo titsa̱nìhixot’aàânòje̱n ko̱ Silvano [ti̱jéâne xi ‘mì Silas] ko̱ Timoteo. 2 Nainá xi Na̱’ènâná, ko̱ jè Jesucristo xi otíxomaâná kàtatsjáânò kjo̱ndaà ko̱ kjoa̱’nchán ya̱ i̱jiìn ini̱ma̱ânò. 3 Ndí ’ndseé ko̱ tichjaá mochjeénânè nga kjit’aà na̱chrjein k’oi̱íâla̱je̱n kjo̱ndaà Nainá xi i̱t’aà tsa̱jòn. Ndaà tjín nga k’oa̱s’ín s’e̱nâje̱n, koií kjoa̱âla̱ nga na̱chrjein inchijòn ìsa̱ ndaà mokjeiínânò ko̱ ìsa̱ ndaà matsjacha xinguio̱o nga jngoò ìjngoò. 4 K’oa̱á maâne nga ndaà matsjaânaje̱n i̱t’aà tsa̱jòn; k’oa̱á s’ín bèno̱jmíâla̱je̱n jñà xi̱ta̱ na̱xa̱ndáâla̱ Cristo xi xìn nangui títsa̱jna nga jñò, ndaà mokjeiínânò ko̱ ndaà chíkjoa̱ko̱ânò na̱s’ín ‘ñó fì tji̱ngui kondra̱ânò xi̱ta̱ ko̱ na̱s’ín kjo̱’in titsa̱nìkjioón. 5 Ngats’iì kjoa̱ koi, Nainá k’oa̱á s’ín okó nga kixi̱ koi̱ìndaàjiìn; ko̱ k’oa̱á maâne nga jñò, ok’ínânò nga ya̱ ki̱tsa̱jnajiìnâlà xi̱ta̱ xi jè tíhotíxomaâla̱, nga ti̱koiâne kjoa̱âla̱ Nainá nga kjo̱’in titsa̱nìkjioón. 6 Nainá, xi̱ta̱ kixi̱âné nga tsjáâla̱ kjo̱’in jñà xi̱ta̱ xi kjo̱’in tsjáânò. 7 Ko̱ jñò xi kjo̱’in titsa̱nìkjioón, tsjáânò kjoa̱’nchán ko̱ ngaje̱n, k’e̱ nga kji̱nchrobàjen ngajmiì Jesucristo xi otíxoma, tji̱ko̱ àkja̱le̱âla̱ xi ‘ñó tse nga’ñó tjínâla̱ nga kji̱nchrobàjenâjiìn ni’ín. 8 Nainá tsjáâla̱ kjo̱’in jñà xi̱ta̱ xi mìkiì beèxkón ni̱ mìkiì síkitasòn ‘én ndaàâla̱ Nainá xi kjoa̱ ts’e̱ Jesucristo xi otíxomaâná. 9 Xi̱ta̱ koi, ‘ñó tse kjo̱’in si̱ìkjeiín ni̱ta̱ kjéâne; mì ya̱á kítsa̱jna nguixko̱n Na̱’ènâná, ko̱ mìkiì skoe̱ kjoa̱jeyaâla̱ xi ‘ñó tse nga’ñó tjínâla̱. 10 Kjoa̱ koi, k’oa̱á s’ín ko̱ma jè na̱chrjein k’e̱ nga ki̱tjojen ìjngoò k’a Na̱’ènâná méâne nga i̱t’aà ts’e̱ xi̱ta̱âla̱ jeya kíjnaâne ko̱ ngats’iì xi̱ta̱ xi mokjeiínâla̱ i̱t’aà ts’e̱, ta ko̱xkónâla̱. Ti̱koa̱á jñò ya̱á ki̱tsa̱jnaà, koií kjoa̱âla̱ nga kòkjeiínânò koni s’ín tsibèno̱jmíânòje̱n. 11 K’oa̱á maâne nga kjit’aà na̱chrjein bítsi’baâla̱je̱n Nainá i̱t’aà tsa̱jòn, méâne nga Nainá ki̱tso̱ nga ok’ìnânò nga ya̱ ki̱nókjoa̱ânò na̱xa̱ndáâla̱ nga xó k’oa̱á s’ín kiìchja̱ânò. Nga ko̱ nga’ñóâla̱ kàtasíkitasòn ngats’iì kjo̱ndaà xi jñò sasénânò ko̱ xá xi ’nè nga Na̱’ènâná ma’ñót’aà takòn. 12 K’oa̱á s’ín ko̱ma nga i̱t’aà tsa̱jòn jeya kíjna Jesucristo xi otíxomaâná. Ti̱koa̱ jè ndaà si̱ìkítsa̱jnaânò koni s’ín tjínâla̱ kjo̱ndaà jè Nainá ko̱ jè Jesucristo xi otíxomaâná.