2 Tesalonicenses 3

1 Xi fehet’aàâne ndí ’ndsè ko̱ ndí tichjaá, titsi’batjìânáje̱n méâne jè ‘énâla̱ Nainá ni̱to̱n xki̱ xi ján katijchó, ti̱koa̱ ndaà kàteèxkón jñà xi̱ta̱ xi skoétjò ‘én koni s’ín ki’nè jñò nga ndaà kiyaxkón. 2 Ti̱koa̱ titsi’batjìânáje̱n méâne nga jè Na̱’ènâná kì kiì tsjá’nde nga ch’o si̱ìko̱ânaje̱n xi̱ta̱ ts’e̱n ko̱ xi ch’o s’ín, nga mì tà ngats’iì xi̱ta̱ mokjeiínâla̱. 3 Na̱’ènâná xi̱ta̱ kixi̱âné, síkitasòn ‘énâla̱, kixi̱í si̱ìkítsa̱jnaânò ti̱koa̱ si̱ìkinda̱ânò méâne nga mì ch’o si̱ìko̱ânò jè xi̱ta̱ nei̱í. 4 Nga i̱t’aà ts’e̱ Na̱’ènâná mokjeiínânaje̱n nga titsa̱nìkitasònânò koni s’ín tìtsahotiìxomaânòje̱n ko̱ tákó k’oa̱á s’ín s’e̱enâìsa. 5 Jè Na̱’ènâná kàtasíchját’aàânò nga ko̱s’ín tjòcha jcha̱a xinguio̱o koni s’ín tjòkeè kijtseèânò Nainá; ko̱ nga kàtachíkjoa̱ko̱ânò kjo̱’in koni s’ín kichìkjoa̱ko̱âla̱ Cristo. 6 Ndí ’ndsè ko̱ ndí tichjaá, k’oa̱á s’ín bìnèânòje̱n, i̱t’aà ts’e̱ Na̱’ènâná Jesucristo, kì ti̱ ya̱ tsjahijtako̱ânò jñà xi̱ta̱ ’ndseé ko̱ tichjaá xi majìnâla̱ síxá, jñà xi mìkiì k’oa̱s’ín síkitasòn koni s’ín tjín kjoa̱ kixi̱ xi ngaje̱n kinìkatoyaânòje̱n. 7 Jñò, jyeé tíjiìnânò nga mochjeénâné nga chjínguìânáje̱n koni s’ín ki’nèâje̱n k’e̱ nga ya̱ tsitsa̱jnako̱ânòje̱n; mì jyò tsitsa̱jnaâje̱n, kinìxáânáje̱n. 8 Mìtsà ta kjo̱tjò chichiâje̱n. Ta̱ sa̱á ‘ñó kiníxáâje̱n ko̱ na̱chrjein ko̱ ni̱tje̱n kinìkijtaâje̱n yijoânaje̱n, méâne nga mì jñò si̱ìjtiânòje̱n. 9 Kinìxáânáje̱n na̱s’ín tjí’ndeânaje̱n nga si̱jéânòje̱n mé tsojmì xi mochjeénânaje̱n. Jè xi mejènânaje̱n nga chjínguìânáje̱n méâne k’oa̱ ti̱s’ín s’e̱en koni ’nèâje̱n. 10 K’e̱ nga tsitsa̱jnako̱ânòje̱n k’oa̱á s’ín ki’mìânòje̱n: Tsà jngoò xi̱ta̱ xi majìnâla̱ síxá, ti̱koa̱ mìkiì tjí’ndeâla̱ nga ko̱kje̱n. 11 Jyeé kina’yàâje̱n nga tjímajiìn i’nga xi̱ta̱ xi majìnâla̱ síxá nga tà jyò binchima, nga ta jñà chja̱jiìn chja̱’a ñánda mì jñà oko̱âla̱. 12 Jñà xi̱ta̱ koi, i̱t’aà ts’e̱ Jesucristo xi otíxomaâná, k’oa̱á s’ín bìtsi’baâla̱je̱n, ti̱koa̱ bìnèâla̱je̱n nga kàtasíxá, méâne nga kàtátsji’aâne yijoâla̱. 13 Jñò ndí ’ndsè ko̱ ndí tichjaá, kì bijtaânò nga ndaà ’nè. 14 Tsà tjín i’nga xi mìkiì síkitasòn koni tsò xo̱jo̱n jè, chítsejènâlà yáâné, kì ya̱á báhijtako̱o, méâne nga ko̱sobàâla̱. 15 Ta̱nga kì k’oa̱á s’ín nìko̱o koni jngoò xi̱ta̱ kondra̱, k’oa̱á s’ín tèno̱jmíyaâlà nga ‘én ndaà chiko̱o nga ’ndseé chibá. 16 Ti̱jèâne Na̱’ènâná xi tsjá kjoa̱’nchán, kjit’aà na̱chrjein kàtatsjáânò kjoa̱’nchán ni̱ta̱ mé kjoa̱âne. Na̱’ènâná kàtìjnako̱ânò ngats’ioò. 17 Nga jye tífehet’aà xo̱jo̱n jè, ko̱ó ndsa̱a tìkjiìânò ‘a̱n xi ‘mìâna Pablo, nga tisìhixat’aàânò. Nga̱ k’oa̱s’ín s’iaàn firmaâna̱, ko̱ k’oa̱á s’ín kjiaà. 18 Ngats’ioò, jè kàtìjnako̱ânò kjo̱ndaàâla̱ Jesucristo xi otíxomaâná.