Romanos 12

1 K’oa̱á maâne ’ndsè, nga tse kjo̱hi̱ma̱takòn tjínâla̱ Nainá xi i̱t’aà tsa̱ján, ‘a̱n bìtsi’bàânò nga k’oa̱s’ín ti̱nga̱tsja yijoânò i̱t’aà ts’e̱ Nainá koni jngoò kjo̱tjò xi tíjnakon, xi tsjeè tjín, xi ndaà sasénâla̱ Nainá; nga nguì ko̱ ini̱ma̱ânò ko̱ kjo̱hítsjeènânò jeya si̱kíjna Nainá. 2 Kì k’oa̱s’ín onguíko̱ yijoânò koni s’ín tjín kjo̱tíxomaâla̱ i̱sò’nde. Ti̱xi̱tse̱ya kjo̱hítsjeènânò nga kàtatjìyaânò koni s’ín titsa̱nìjchá yijoânò méâne nga jcha̱ânò mé xi mejènâla̱ Nainá i̱t’aà tsa̱jòn, jñà kjoa̱ xi ndaà tjín, xi nguì tjíkixi̱, xi jè ndaà sasénâla̱. 3 I̱t’aà ts’e̱ xá xi ‘a̱n kitjoé kjo̱tjòâna, k’oa̱á xanânò nga jngoò ìjngoò, kì ’nga onguíko̱o kjo̱hítsjeènânò koni s’ín tjínèâla̱ nga si̱kítsjeèn; tà saà ndaà ti̱kítsjeèn koni s’ín ok’ìnâla̱ kjo̱ndaà xi kitsjaàânò Nainá k’e̱ nga kòkjeiínânò i̱t’aà ts’e̱ Cristo. 4 Koni s’ín tjín yijoâná nga kjìn sko̱ya tjínâla̱ ta̱nga ka̱kj’ei̱í ka̱kj’ei̱í xá tjínâla̱ nga ìjngoò ìjngoò sko̱ya. 5 K’oa̱á s’ín ma i̱t’aà tsa̱ján nga kjìn maâná, ta̱nga xi i̱t’aà ts’e̱ Cristo tà jngoò maâná nga ìjngoò ìjngoá; k’oa̱á s’ín ki̱ndo̱ba̱’ñoá xinguia̱á koni s’ín kitsobà’ñó xíkjín yijoâná. 6 Koni s’ín kjòmejènâla̱ Nainá jye kitsjaàâná xá xi s’e̱én nga jngoò ìjngoá. Jngoò xi̱ta̱, tsà jè xá kitjoéâla̱ nga xi̱ta̱ ki̱chja̱yajiìnâla̱, k’oa̱á s’ín kàtasíkjeén koni s’ín mokjeiínâla̱. 7 Tsà jè xá kitjoéâla̱ nga xi̱ta̱ ko̱si̱ko̱, k’oa̱á s’ín kàtasíkjeén nga ndaà kàtasìko̱ xi̱ta̱. O xi jè xá kitjoéâla̱ nga ko̱kòya, k’oa̱s’ín kàtasíkjeén nga ndaà kàtakóya. 8 Jè xi kitjoéâla̱ xá nga si̱ìjehikon xi̱ta̱, k’oa̱s’ín kàtas’ín. Jè xi maâla̱ sìka’bí tsojmì, nguì ko̱ó ini̱ma̱âla̱ kàtasíka’bí; jè xi xá ítjòn kjònga̱tsja, ndaà kàtasíkitasòn; jè xi síchját’aàâla̱ jñà xi̱ta̱ i̱ma̱, ko̱ó kjo̱tsjaâla̱ kàtasíchját’aàâla̱. 9 Nguì ko̱ó ini̱ma̱ânó ti̱tsjacha xinguio̱o. Ti̱jticha kjoa̱ xi ch’o tjín. Koií tanguítji̱nguiâlà kjoa̱ xi ndaà tjín. 10 Ko̱ó kjo̱tsjaânò ti̱tsjacha xinguio̱o nga ’ndsè chiba. Ãsa̱ ndaà jcha̱xkón xi̱ta̱ xinguio̱o xi i’nga; jñà ti̱kítsa̱jna ítjòn nga jngoò ìjngoò. 11 Kì ts’eè ’nè xi xá ts’e̱ Nainá. Nguì ko̱ó ini̱ma̱ânò ti̱xáâlà Na̱’ènâná. 12 Tsja teâlá takòn jè kjoa̱ xi chiñàâlà. Ko̱ ini̱ma̱ânò kàtachíkjoa̱ko̱ânò kjo̱’in xi titsa̱nìkjioón. Na̱chrjein nchijòn tìtsi’baâlà Nainá. 13 Tjiìâlà mé xi mochjeénâla̱ jñà xi̱ta̱ tsjeèâla̱ Cristo. Chjoétjò xi̱ta̱ xi bijchó ya̱ ni’yaânò. 14 Ti̱jét’aàâla̱ Nainá nga kàtasíchikonât’in jñà xi̱ta̱ xi ch’o síko̱ânò; kì k’oa̱á s’ín nìjét’aàâlà nga kjo̱’in tsjáâla̱. 15 Ti̱tsjako̱o jñà xi̱ta̱ xi tsja tjínâla̱. Chìhindáyako̱o jñà xi nchikjindáya. 16 Tà jngoò t’e̱en kjo̱hítsjeènânò. Kì ’nga ikon ’nè yijoânò, ya̱ tsjahijtako̱o jñà xi̱ta̱ i̱ma̱. Kì ‘ñó chji̱ne̱ nachrjenguioò yijoânò. 17 Jñà xi̱ta̱ xi ch’o síko̱ânò, kì ch’o nìko̱o ngajoânò. Kjit’aà na̱chrjein ndaà t’e̱en nga nguixko̱n ngats’iì xi̱ta̱. 18 Skanda ñánda sakó’ndeânò, jñò tjínèânò nga ’nchán titsa̱jnako̱o ngats’iì xi̱ta̱. 19 Ndí ’ndsè xi matsjake̱ânò, k’e̱ nga mé xi mat’ioòn, kì jñò ’nè ngajoânò. Tsja Nainá ti̱kíjnaya kjoa̱ânò méâne nga jè tsjáâne kjo̱’in. K’oa̱á s’ín tíchja̱ Xo̱jo̱nâla̱ Nainá nga tsò: “Tsò Na̱’ènâná: ‘A̱án oko̱âna nga kìndaàjiìnâla̱ xi̱ta̱, ‘a̱án tsjaâla̱ chjíâla̱." 20 K’oa̱á maâne, tsà jè kondra̱âlè, tsà tsjìn tsojmì xi kine, ji̱í tjiìâla̱; tsà xíndáâla̱, tjiìâla̱ nandá nga kàt’iì. K’e̱ nga koa̱ si̱koi̱i, ko̱sobà tì’biìâla̱ kondra̱âlè, chi̱ba̱âla̱ ko̱hinì i̱sénâla̱ koni xá’í. 21 Jè kjoa̱ xi ch’o tjín, kì jè síkijneânò; ti̱koa̱áâne jè kàtitasòn xi kjo̱ndaà, méâne nga si̱kijneâlà kjoa̱ xi ch’o tjín.