Romanos 2

1 K’oa̱á maâne, ngaji̱, ni̱ta̱ yá xi̱ta̱âne ji̱, nga jé onèâla̱ xingui̱i, mìkiì ko̱ma ko̱si̱koi̱i yijoâlè nga nguixko̱n Nainá. K’e̱ nga jé tìbìnèâla̱ xi̱ta̱ xingui̱i, ti̱koa̱á ngaji̱, ti̱ji tìbìnèâla̱ jé yijoâlè nga k’oa̱ ti̱s’ín ’nì. 2 Ta̱nga ‘yaâná nga kixi̱ s’ín Nainá k’e̱ nga tsjáâla̱ kjo̱’in jñà xi̱ta̱ xi koa̱ tjín jé xi ótsji. 3 Ngaji̱ xi kjo̱’in bìnèâla̱ xi̱ta̱ xi kj’ei̱í, ¿méâne koa̱ s’ín nìkítsjeènâne nga jcha̱t’aàâlè kjo̱’in xi tsjá Nainá? Nga ji̱ k’oa̱á ti̱s’ín ’nì. 4 ¿A mì tíjiìnâlè nga nachrjekàngui jè kjo̱ndaàâla̱ Nainá nga tjínâla̱ kjo̱jetakòn koa̱ tjínâla̱ kjoa̱tsejta? ¿A mì tíjiìnâlè nga jè kjo̱ndaàâla̱ Nainá tíkoñaâné nga si̱kájnoi jéâlè nga mì ti̱ jé ki̱nchátsjiâne? 5 Nga tájaàjiìn tjín ini̱ma̱âlè nga mìkiì nìkájnoi jéâlè, ìsa̱á tse kjo̱’in tìbìnèâla̱ yijoâlè xi tsjáâlè Nainá jè na̱chrjein k’e̱ nga kjoi̱íko̱ kjoa̱jtiâla̱ nga jcha̱âla̱ kós’ín kixi̱ koi̱ìndaàjiìn Nainá nga tsjáâla̱ kjo̱’in jñà xi̱ta̱. 6 Nainá tsjáâla̱ chjíâla̱ mé kjoa̱ xi kis’iìn nga jngoò ìjngoò xi̱ta̱. 7 Tsjáâla̱ kjoa̱binachon ni̱ta̱ mé na̱chrjeinâne jñà xi̱ta̱ xi nchihótsji kjoa̱jeya, ko̱ nchihótsji nga jcha̱xkón, ko̱ nchihótsji nga kítsa̱jnakon ni̱ta̱ mé na̱chrjeinâne ján ngajmiì. Koií kjoa̱âla̱ nga ndaà tjín kjoa̱ xi nchis’ín nga kjit’aà na̱chrjein. 8 Ta̱nga Nainá nga ko̱ kjoa̱jtiâla̱ tsjáâla̱ kjo̱’in jñà xi̱ta̱ xi kondra̱ fìâla̱ nga mìkiì ’nchréñijon xi kjoa̱ kixi̱. Tà kjoa̱ nchi̱kón fìtji̱nguiâla̱. 9 Tseé kjoa̱ s’e̱âla̱ ko̱ tseé kjo̱’in s’e̱âla̱ ngats’iì xi̱ta̱ xi ch’o s’ín, mats’ia̱ko̱ ítjònâne jñà xi̱ta̱ judío, ti̱koa̱á ko̱ xi ta̱xki̱ xi̱ta̱ xi mìtsà xi̱ta̱ judío. 10 Ta̱nga jñà xi̱ta̱ xi ndaà s’ín, tjoéâla̱ kjoa̱jeya, ndaà jcha̱xkón, ti̱koa̱á s’e̱éâla̱ kjoa̱’nchán ini̱ma̱âla̱, mats’ia̱ko̱ ítjònâne jñà xi̱ta̱ judío, ti̱koa̱á ko̱ xi ta̱xki̱ xi̱ta̱ xi mìtsà xi̱ta̱ judío. 11 Nainá mìkiì faájiìn ni̱ta̱ yá xi̱ta̱âne, tà ngásòn fìko̱ yije. 12 Ngats’iì jñà xi̱ta̱ xi mìkiì tíjiìnâla̱ kó tsò kjo̱tíxoma xi kiskiì Moisés, k’e̱ nga jé ótsji, chi̱jaâné na̱s’ín mìkiì kijtseè kjo̱tíxomaâla̱ Moisés. Koa̱ jñà xi̱ta̱ xi ndaà tíjiìnâla̱ kjo̱tíxomaâla̱ Moisés, k’e̱ nga jé ótsji, k’oa̱á s’ín ko̱jtso koni s’ín tíchja̱ xi ti̱jèâne kjo̱tíxoma. 13 Jñà xi̱ta̱ xi tà ’nchréâla̱ kjo̱tíxoma xi kiskiì Moisés, mìtsà jñà xi xi̱ta̱ kixi̱ nga nguixko̱n Nainá. Jñàâné xi xi̱ta̱ kixi̱ xi síkitasòn. 14 K’e̱ nga jñà xi ta̱xki̱ xi̱ta̱ xi mìkiì tíjiìnâla̱ kós’ín tíchja̱ kjo̱tíxomaâla̱ Moisés, sà k’oa̱á tà ya̱á nchrobájiìn ini̱ma̱âla̱ nga k’oa̱s’ín s’ín koni tsò kjo̱tíxomaâla̱ Moisés, ya̱á ‘yaâla̱ nga ti̱koa̱ tjíjiìn ini̱ma̱âla̱ kjo̱tíxoma xi ts’e̱ na̱s’ín tsjìnâla̱ ts’e̱ Moisés. 15 K’e̱ nga ndaà s’ín ya̱á ‘yaâla̱ nga tíjiìn ini̱ma̱âla̱ kjoa̱ xi síjé kjo̱tíxomaâla̱ Moisés; jè ini̱ma̱âla̱ okó kjoa̱ xi ndaà tjín ko̱ xi mìkiì ndaà tjín; ti̱jèâne kjo̱hítsjeènâla̱ sà k’oa̱á óngui ko̱ sà k’oa̱á osìko̱. 16 K’oa̱á s’ín ko̱ma jè na̱chrjein k’e̱ nga Nainá koi̱ìndaàjiìn ngats’iì jé xi tjí’maâla̱ xi̱ta̱ i̱jiìn ini̱ma̱âla̱; i̱t’aà ts’e̱ Jesucristo si̱ndaàjiìn, koni tsò ‘én ndaàâla̱ Nainá xi kjoa̱ ts’e̱ Cristo xi ‘a̱n chjàya. 17 Ngaji̱ xi xi̱ta̱ judío ‘mìâlè; jè ma’ñót’aà takoìn kjo̱tíxoma xi kiskiì Moisés; ’ngaá ma takoìn i̱t’aà ts’e̱ Nainá nga si tsi̱jiâné; 18 ‘yaâné mé xi mejènâla̱ Nainá nga si̱kitasoìn; maâlè chjaàjiìn mé kjoa̱ xi nguì ndaà tjín koni s’ín okóyaâlè Kjo̱tíxoma; 19 k’oa̱á s’ín nìkítsjiìn nga tíjngoò takoìn nga ji̱ okoòâla̱ ndi̱yá kixi̱ xi̱ta̱ xi mìkiì machi̱yaâla̱ nga tíchjoà xko̱n ko̱ k’oa̱á maâlè nga ji̱ nìhiseènâla̱ xi tjíjñò kjo̱hítsjeènâla̱. 20 Ji̱, k’oa̱á s’ín nìkítsjiìn nga maâlè okoòyaâla̱ xi ta̱xki̱ xi̱ta̱ xi tsjìnâla̱ kjo̱hítsjeèn; nga maestro ‘mìâlè ts’e̱ xi̱ta̱ xi chiba maâla̱ i̱t’aà ts’e̱ Nainá; nga tjínâlè kjoa̱ chji̱ne̱ ko̱ kjoa̱ kixi̱ xi okóâlè i̱t’aà ts’e̱ Kjo̱tíxoma. 21 Ji̱ xi maâlè okoòyaâla̱ xi̱ta̱ xi kj’ei̱í, ¿méâne mìkiì okoòyaâla̱ xi ti̱ yijo tsi̱jiâne? Ji̱ k’oa̱á s’ín nokjoàyi nga mìkiì ma si̱chijé; ji̱, ¿méâne nìchijéâne? 22 Ji̱, k’oa̱á si nga mìkiì ndaà tjín nga kjoa̱ chijngui s’i̱in xi̱ta̱; ji̱, ¿méâne nga k’oa̱ ti̱s’ín ’nèâne? Ji̱, k’oa̱á si nga jtichiì xkósòn; ¿méâne nga i̱ngo̱ bitjaàs’enâne nga nìchijí tsojmìâla̱ xkósòn? 23 Ji̱, ’ngaá takoìn nga ndaà tíjiìnâlè kjoa̱ ts’e̱ kjo̱tíxoma ta̱nga, ¿a mìtsà tìnachrjekàngui Nainá nga mìkiì nìkitasònâla̱ koni s’ín tíchja̱ kjo̱tíxoma? 24 K’oa̱á s’ín tíchja̱ Xo̱jo̱nâla̱ Nainá nga tsò: “Kjoa̱ tsa̱jònânò xi xi̱ta̱ judío ‘mìânò nga chja̱jnoâla̱ Nainá jñà xi ta̱xki̱ xi̱ta̱." 25 Tsà ndaà si̱kitasoìn kjo̱tíxoma xi kiskiì Moisés, jè kjoa̱ ts’e̱ circuncisión nga tjít’aà chi̱ba̱âlè, chjíâla̱âné; ta̱nga tsà mìkiì si̱kitasoìn, k’oa̱á ngayaâla̱ koni tsà mìkiì tjít’aà chi̱ba̱âlè. 26 Jñà xi mìtsà xi̱ta̱ judío, na̱s’ín mìkiì tjít’aà chi̱ba̱âla̱ koni xi̱ta̱ judío, ta̱nga tsà kixi̱ síkitasòn kjo̱tíxoma ts’e̱ Moisés, Nainá skoétjòâné koni tsà tjít’aà chi̱ba̱âla̱. 27 Jñà xi̱ta̱ xi síkitasòn kjo̱tíxoma ts’e̱ Moisés, na̱s’ín mìkiì tjít’aà chi̱ba̱âla̱ yijoâla̱, jñà koi̱ìndaàjiìnânò nga mìkiì nìkitasòn na̱s’ín tjít’aà chi̱ba̱ânò, na̱s’ín tjínânò xo̱jo̱n ts’e̱ kjo̱tíxomaâla̱ Nainá. 28 Jngoò xi xi̱ta̱ judío, mìtsà tà jè nga ndaà ‘yaâla̱ kjoa̱ xi s’ín; koa̱ jngoò xi̱ta̱ xi tjít’aà chi̱ba̱âla̱ kjoa̱ ts’e̱ circuncisión, mìtsà tà jè xi mochjeén nga tjít’aà chi̱ba̱âla̱ i̱sò’nga yijoâla̱. 29 Jè xi nguì xi̱ta̱ judío, jè xi chjíâla̱ koni s’ín tjín i̱jiìn ini̱ma̱âla̱. Ko̱ jè xi nguì tjít’aà chi̱ba̱âla̱, jè xi chjíâla̱ koni s’ín tjít’aà chi̱ba̱âla̱ ya̱ i̱jiìn ini̱ma̱âla̱. Kjoa̱ koi, mìtsà ts’e̱ kjo̱tíxoma xi xo̱jo̱n tjít’aà; ts’e̱é Ini̱ma̱ Tsjeèâla̱ Nainá. Jñà xi k’oa̱s’ín síkitasòn, Nainá ndaà chja̱ xi i̱t’aà ts’e̱, na̱s’ín mìkiì ndaà chja̱ xi̱ta̱ xi kj’ei̱í.