1 Pita 5

1 Na ndi, manga wingti rÊp wu mbÊ kÊn, ik ei mel nÊmp mundunt. Na kongun tenda ei nga etÊp mor. Na nga mong raⱡ ndi, Kraist mindil nurum uⱡ mbÊ kÊndÊr, wote ui tila elim nga rÊⱡang kai omba mot nÊm ila, na ruk ting ila muⱡimp ku. Ei nga, na enim kÊn ik ei mel nÊmp ekit ndup nÊnt. 2 Enim sipsip rÊp wu mbÊ mel molk, Got nga wamp enim nga ki ila tinditim mbÊ, elim nga numan pÊtÊm ei mel, pila kila nÊk rÊp itÊi! Kongun etÊk kÊn, mel ti timin nÊk, iti nÊtÊi mon! Uⱡ ei kelik, numan kai pendÊk, kongun ei itmin nÊk itÊi. 3 Enim wu nuim mel ralk, Got nga wamp enim nga ki ila tinditim kÊⱡ, tÊk mana nduk kÊni nÊkÊnÊi! Ei mon! Enim ndi, wamp mbÊ uⱡ iting mbÊ mel, enim uⱡ mbÊ, kuimbal molk etÊk, ora ndangina iteing. 4 Wote Sipsip RÊp Wu Nuim Mumuk ei, wote omba, pena ila pem ei kÊn, enim mbi ou tangina, wote wu nuim mumuk mbÊ nga peng wÊna tÊpa pakÊmba ei, ping nui nanÊmba. 5 Uⱡ ei mel ku, enim wu kang wu mbÊ ndi pilik, enim nga rÊp wu mbÊ nga mana orunga muⱡÊi! Enim ndi, en enim nga mul orunga mana nduk, ti ndi ti nga kongun kindmant indÊi! Got nga ik kat rorung kÊⱡ ndi, ei mel nÊtÊm, “Got ndi, numan meka rui kandÊk tÊtmin wamp mbÊ, ropa mana ndurum, wote numan koma ti kandÊk tÊtmin wamp mbÊ, elim ndi, kont kuⱡpa poⱡ tÊtÊm,” nÊtÊm. 6 Enim ndi, en enim nga numan orunga mana nduk, Got nga ki ronduⱡ petÊm ei nga mana orunga muⱡÊi! Ei nga, elim nga ui kai pem tila enim oⱡa tÊmba. 7 Enim nga numan ou ndupa pÊnmin uⱡ mbÊ, Got elim kÊn nguk ruk ndÊi. Nambuⱡ emel, elim ndi, enim rÊp etÊm. 8 Enim nga numan orunga, tÊk kun mundÊk, tÊk mendÊk pilik mint muⱡÊi! Enim nga el rui wu Seitan ei, wamp mat kandÊp tÊp nuimp nimba, kui laiyon na ni mel, kuimp mepa andpa mint morum. 9 Enim nga mondpa pili orunga ronduⱡ pangga molk, el rui wu kit ei, rok ekit ndÊi! Nambuⱡ emel, enim pÊnmÊn ei, mondpa pili wamp mat, mÊi kÊmp mbila pora, mbun mindil enim tÊnmin ei nga, kandÊk tÊk ku mormin. 10 Wamp pol ti uⱡ mbÊ, Got elim kÊn tetÊm. Elim ndi, enim wi ropa, Kraist kÊn ruk titim ei ndi, enim rÊⱡang kai uⱡ nga kÊnt nga kont tetÊm ei, teing nimba itim. Ei nga, enim ui onunga kÊⱡ ila, mindil nangina, wote enim etpa kai mondpa, tÊpa kun mundpa, etpa ronduⱡ mundÊmba. 11 Got kÊn uⱡ ronduⱡ pi mbÊ nga minal, uⱡ nga kÊnt nga tepa mint purum! Ei kupa. 12 Sailas, na ndi tÊp, na nga ÊngÊn kai mondÊr nÊmp pÊt ei ndi, na tÊpa rapundÊⱡnga, mon koⱡmung kÊⱡ rop, enim kÊn ngont. Na nga numan ei ndi, enim nÊmp ronduⱡ ngump, wote nÊmp ekit ndup kÊn, ik nÊnt mbÊ, Got nga wamp poⱡ tÊpa kont kurum uⱡ kupa ei. Got nga wamp poⱡ ti uⱡ nÊnt ila, ronduⱡ mundÊk muⱡÊi! 13 Bapilon kona ila rapa tenda wamp kÊⱡ, Got ndi, enim kÊn tÊpa kup etpa mbi ropa titim ei ndi, enim rawe ik kai mbÊ nimba mundnÊm. Wote, na nga kangÊm kang Mak ndi, rawe ik kai mbÊ nimba mundnÊm ku. 14 Ana aiyamÊn mbÊ kÊn pora, rawe etÊk, ik kai mbÊ nÊk mondpa pili wamp nga, wamp numan ngui uⱡ ei etÊk muⱡÊi! Enim Kraist kÊn mormin wamp mbÊ, moⱡpa kundi uⱡ mbÊ, enim kÊn kan piyangga!