Matyu 23

1 Ei kÊn, Jisas ndi, wamp minal morung nimba kÊn, elim nga kitip kÊni wu nimbÊ kÊn, kundpa nimba mel, “Mi Ik mbo wu mbÊ kÊn, Perisi wu na mbÊ, Moses nga koⱡ ila molk mi ik mbo endÊtÊng. 3 Wote, enim ik kundÊk, nÊng mbÊ, kum tek pilÊi! Wote, uⱡ eing mel, iti nÊtÊi! Ei nambuⱡ emel, en enim, wote uⱡ etmin ei mel iti natÊtmÊn. 4 Perisi na, mi ik mbo wu mbÊ ndi, mel mbun itmbÊⱡ tÊk, wamp mi ui nÊk, wote en enim ndi, tÊk rÊpndi napÊndÊrmÊn. 5 En enim nga uⱡ etmin mbÊ, wamp mbÊ ndi, kandÊk neing nÊk etmin. Got nga ik mong mbÊ, mon rok, mÊi ombil ila pendÊk, ki oⱡa mondÊk, wote muⱡ roⱡ mbÊ nuim kan ila rumbÊⱡ nga mba, met kÊmp puⱡ ila purum mbÊ, kandÊk neing nÊk etmin. 6 Wote, rÊng ou mat karmin ei kÊn muna, manga wingti mbila puk, rat pol kuimbal mint muⱡing ei nga kai pilik, wote rÊng rarÊp kona na, wamp molk etmin mbila, en enim, ‘Ik Mbo Wu,’ mbÊ, nÊk tÊk ou nduk, rawe iteing nÊk pÊtmÊn. 8 Ei kÊn, enim kundÊk, ‘Ik Mbo Wu,’ ni nÊneing. Ei nambuⱡ emel, enim wu ÊngÊn ÊngÊn kÊⱡ, enim nga ik mbo wu tenda ei morum. 9 Ya mÊi kona ila enim ndi, wu ti kundÊk, ‘Wuta,’ ni nÊnÊi! Ei nambuⱡ emel, enim nga tipanÊm wu tenda ei, oⱡa muⱡ ila morum. 10 Muna nim, ‘Ik Mbo Wu,’ ei, ni nÊnÊi! Ei nambuⱡ emel, nim nga ik mbo wu tenda ei, oⱡa muⱡ ila morum ei Kraist. 11 Ei kÊn, enim nga rÊk ting ila wu nuim kuimbal ti moⱡum ndam, elim mepa mana omba, kongun wu raⱡpa muⱡangga! 12 Wamp nam ti ndi, elim nuim muⱡimp nimba pilpa, em wamp ti, Got ndi, mepa mana omba. Wote wamp ti, elim nga orunga mepa mana omba moⱡum wamp ei, Got ndi, etpa wamp nuim mondÊmba. 13 “Enim kun kai rÊl wu Perisi wu na, mi ik mbo wu na mbÊ, mbun mindil nuing an! Enim ndi, wamp mbÊ, Got nga wamp tÊpa mumuk rui uⱡ ila rukrÊng ping ormÊn mbÊ, mi pendÊtmÊn. Wote, en enim kep, ila rukÊr pi nÊping ei nga, mbin nÊk ormÊn wamp mbÊ, mon ku nÊtmin. [ 14 “Enim kun kai rÊl wu Perisi na, mi ik mbo wu na mbÊ mindil nuing an! Ei nambuⱡ emel, enim amp wiya na mbÊ nga manga mbÊ, kÊndÊp nok tÊk, wote uⱡ etmin mbÊ kamblik pendÊk, atinga roⱡ mbÊ rok etmin. I etmin uⱡ ila, Got ndi, enim mindil mam ti ngumba.] 15 Enim kun kai rÊl Perisi wu na, mi ik mbo wu na mbÊ nga mindil nuing an! Ei nambuⱡ emel, ik mbo wu tenda ti endÊk, enim nga kitip kÊni wu runding ei nga nu komnga mbÊ, puⱡa rok kurÊk angÊndÊrmÊn. Wote, ti kandÊk tilingina omba, enim nga kitip kÊni wu rarum. Wote, enim etmin uⱡ mbÊ etpa, wote wu ei, ndip kona ila mba mindil nomba. Wote, enim nuing ei mel mon, mindil mam ti nomba. 16 “Enim mong ti wu mat ndi, mat ki amÊnmÊn ei nga, na kont enim ei ka! Enim ndi, ‘Wamp ik mbo ei mel endÊtmin. Wamp ti ndi, mi tepa, Got kÊn mel ti nguimp nimba, manga wingti ou ei, mbi tem ndam, mi tepa nÊtÊm ik ei nga muⱡ ti mon. Muna manga wingti ila ku gol morum ei nga ti, mbi tepa angÊndpa, elim nga mi ik ei, ronduⱡ pangga nim ndam, elim itimp nim mi ik ei mel etpa muⱡ indangga,’ nÊtmin. 17 Enim mong ti, wu kekilip mbÊ ye! Mel nant ei mel muⱡ? Gol ei mel muⱡ muna, manga wingti ei ndi, ku gol ei etpa Wingti randrum uⱡ ei muⱡ? 18 Enim ik ti mbo endÊk, ‘Wamp ti ndi, elim nga nÊnt ik ei, ronduⱡ pangga nimba rat pol wingti ei, mbi tem ndam, elim nga mi tem ik ei nga ronduⱡ ti mon. Muna rat pol wingti ila gem ngui mel ti, tem ei nga mbi tepa, elim nga ik ei, ronduⱡ pangga nimba nim ndam, elim itimp nimba mi tepa nim ik ei, etpa muⱡ indangga!’ nÊtmÊn. 19 Enim mong ti wu mbÊ ye! Uⱡ nant ei uⱡ muⱡ? Rat pol Wingti ila gem ngui mel ei telmina, wingti rarum uⱡ ei ronduⱡ muna, gem ngormÊn ei ronduⱡ? 20 Ei kÊn, wamp nam ti ndi, rat pol wingti ila mi tepa ik ti nim ndam, rat pol wingti ei kÊn, oⱡa pol ila mel gem mbÊ kÊn, pÊkÊ mi tetÊm. Wote, wamp nam ti ndi, manga wingti ei kÊn, mi tepa ik ti nim ndam, manga wingti ila mukÊr tetÊm mel mbÊ kÊn, wote Got manga Puⱡ Wu ila morum ei kÊn, mi tepa nÊtÊm. 22 Wote, wamp nam ti ndi, oⱡa muⱡ kona ei kÊn, mi tepa ik ti, nÊmp ronduⱡ mundimp nimba mbi tem ndam, wamp ei, Got nga rÊpndi pol morum kona ei kÊn, wote Got elim kÊn kunda mi tetÊm. 23 “Enim kun kai rÊl Perisi wu na, mi ik mbo wu na mbÊ nga, na kont enim ei ka! Nambuⱡ emel, pana enim kim mbÊ nga kÊmp tÊk ki ti, gu nduk, Got kÊn gem nguimin nÊk ekit tÊk tÊndÊtmin. Wote, ya mi ik peng mbÊ, tÊk pei mundÊrmÊn. Ik mbÊ, wamp kÊn ik kupa ni uⱡ na, mÊn kan mundi uⱡ na, mondpa pili uⱡ na, kÊⱡ pep rui narÊrmin. Ya mi ik peng kÊⱡ pep rokÊn mel, wote mi ik kat wak rui nÊri. 24 Enim mong ti, rÊp wu mbÊ ye! Enim nga nu ming ila oⱡma ei petÊm nÊk tÊk mundÊrmÊn. Wote, kng kamel ei, pendÊk normin uⱡ ei pili napÊtmin. 25 “Enim kun kai rÊl Perisi wu na, ik mbo wu na mbÊ nga, na kont enim ei ka! Nambuⱡ emel, enim nga ming kap mbÊ ekit orunga, ⱡumÊi rok kai etmin. Wote, ming rukÊr orunga na mbÊ, punt mong kandÊk tÊk etmin uⱡ mbÊ nga ⱡar minal morum. 26 Enim mong ti Perisi wu mbÊ ye! Enim ming rukÊr orunga, unt kuimp tek ⱡumÊi rangina kÊn, wote ekit orunga mbÊ, kunda eng numba! 27 “Enim kun kai rÊl Perisi wu na, mi ik mbo wu na mbÊ nga, na kont enim ei ka! Nambuⱡ emel, nim wamp on kona ti, ou nduk, kai etÊk tetmin ni mel kapⱡa. Oⱡa mÊi pol ei, etÊk mon mundÊk tetmin. Wote wamp on kona rukÊr orunga mbÊ, wamp ombÊl kÊn, mel puri na mbÊ, peka ropa tetÊm ni mel kapⱡa. 28 Ei mel ku, enim nga kÊng ekit orunga wamp ndi, kÊning ei nga etÊk kai mondÊrmÊn. Wote, enim nga numan ei ik kep kÊn, uⱡ kit etmin mbÊ nga peka ropa petÊm. 29 “Enim kun kai rÊl Perisi wu na, mi ik mbo wu na mbÊ nga, na kont enim ei ka! Nambuⱡ emel, enim Painui wu mbÊ nga wamp on kona mbÊ, etÊk kai mondÊrmÊn. Wote, wamp kai mat molk korung mbÊ nga on kona mbÊ, ou ndurmÊn. 30 Wote enim ndi, nÊk mel, ‘TÊn nga anda kouwÊ kÊⱡ, unt morung ui ila, tÊn moⱡmina ndam, uⱡ ⱡawa etÊk, wote painui wu kÊⱡ, rok kondÊk etÊng uⱡ mbila, tÊn nga ki ti ila rÊk pi napÊⱡnga,’ nÊtmin. 31 I nÊnmÊn ik ei ndi, nÊk mot nduk, unt wu kit kat molk, painui wu mbÊ, rok mema oi ndurÊng wu kÊⱡ nga mema tenda kÊⱡ, en enim namin. 32 Ei kapⱡa kÊn, anda tÊpanÊmÊl kÊⱡ, puⱡ mondrung uⱡ nit ment ei, enim etÊk pora ndÊi! 33 “Enim wimbÊ kit mbÊ ye! Enim Got ndi, tÊpa ndip mam ila rukÊr ndumba ei kÊn, enim nÊng nÊk ok ping ei? 34 Ei kÊn, akup kum tÊi! Na ndi, painui wu mat kÊn, wu pilpa kungÊndi mat kÊn, ik mbo wu mat kÊn, tÊp enim kÊn mundimp. Wu mbÊ nga mat enim ndi, rok kunding. Mat nde peta ila ruing. Mat imp molk mek puk, atinga manga kel mbila mondÊk, tÊmbÊⱡ ndi ruing. Mat pep rok mek puk, kona peng mbila puk, mbila puk iting. 35 I etÊk, wu nit mul nÊmbil mbÊ, rok kunding ei nga puⱡ ei omba, enim kÊn pemba. Wu nit mul nÊmbil, Eipel rok kondrung ui ei kÊn omba, wote wu Berakaiya kangÊm Sakaraiya ni, manga wingti ei kÊn, rat pol wingti ei nga rÊk ila, rok kondÊk tetÊng ei nga uⱡ mbun ei, pÊi enim ting. 36 Enim ik kupa ei, kundÊp nÊnt. Uⱡ i etÊng kÊⱡ nga mbun ei, akup ui ila wamp kalk tÊnmÊn mbÊ kandÊk ting. 37 “Jerusalem, Jerusalem! Nim Got ndi, painui wu tÊpa mundrum mbÊ, rok kondkÊn, nombuⱡa rung wu na mbÊ, ku ndi rokÊn ku etÊn. KÊi kulda mam ei ndi, elim nga waⱡ mbÊ, pou mana orunga mondrung ei mel, na nga ki raⱡ ndi, nim nga wamp mbÊ ambÊⱡÊp rÊk timp nÊmp ent. Ei wote, nim ei ndi, mon ku nÊtÊn ei ka! 38 I etÊn uⱡ ei ndi, nim nga manga wingti ei, pi muⱡangga, kona ei wapra temba. 39 Enim ik ti kundÊp namp, akup ui ila kÊn, yant nduk molk, ping ila na kÊni nakÊndÊk, wote molk puk, ui tila, ‘Nuim ei nga mbi ila onum ei, Got ndi, memp pindangga,’ nÊng ei kÊn, mint na kÊning,’” nitim.