إِزهِّيذنْ 26

1 أَزهّذْ ن ذَاوُوذْ. أَغْ أَيِي ثَاسْغَارْثْ إِنُو، أَ سِيذِي، مَاغَارْ نشّْ ڭُّورغْ ذِي ڒصْفَايثْ إِنُو. نشّْ تّشْڒغْ خْ سِيذِي، وَارْ تّفْرِيغغْ شَا. 2 قدْجبْ أَيِي، أَ سِيذِي، جَارّبْ أَيِي، سصْفَا ثِيژَّاڒْ إِنُو ذ وُوڒْ إِنُو. 3 مِينْزِي ثَامخْسِيوْثْ نّشْ إِشوَّارنْ أَقَا-ت زَّاثْ إِ ثِيطَّاوِينْ إِنُو، نشّْ ڭُّورغْ ذِي ثِيذتّْ نّشْ. 4 نشّْ وَارْ تّْغِيمِيغْ أَكْ-ذ إِرْيَازنْ وَارْ إِسكّْوِينْ، وَارْ تّْمُونغْ أَكْ-ذ يِينِّي إِشمّْثنْ. 5 نشّْ شَارّْهغْ أَڭْرَاوْ ن ثَارْوَا ن ڒهْرَامْ، وَارْ تّْغِيمِيغْ أَكْ-ذ إِعفَّاننْ. 6 نشّْ سِّيرِيذغْ إِفَاسّنْ إِنُو أَمْ وَارْ ذَايِي ڒْعِيبْ، تّنّْضغْ إِ ؤُعَالْطَارْ نّشْ، ڒْمذْبحْ نّشْ ن وشْمَاضْ، أَ سِيذِي، 7 مَاحنْذْ أَذْ سّْڭعّْذغْ ثْمِيجَّا ثشُّورْ س ؤُقَاذِي، مَاحنْذْ أَذْ بَارّْحغْ س مَارَّا لْمُوعْجِيزَاثْ نّشْ. 8 أَ سِيذِي، نشّْ تّخْسغْ ثَازذِّيغْثْ ن ثَادَّارْثْ نّشْ، ؤُڒَا ذ أَمْشَانْ ن ثْزذِّيغْثْ ن ؤُعُودْجِي نّشْ. 9 وَارْ سْمُونَا ڒعْمَارْ إِنُو أَكْ-ذ إِمذْنَابْ، ؤُڒَا ذ ثُوذَارْثْ إِنُو غَارْ إِرْيَازنْ إِ إِسَّازَّاڒنْ إِذَامّنْ. 10 إِنِّي غَارْ إِدْجَا إِفَاسّنْ نْسنْ شُّورنْ س ثُوعفّْنَا، أَفُوسْ نْسنْ أَفُوسِي إِشُّورْ س ڒْغشّْ. 11 نشّْ ڭُّورغْ ذِي ڒصْفَايثْ إِنُو، فْذِي أَيِي ؤُ حِينّْ خَافِي. 12 أَضَارْ إِنُو إِبدّْ خْ ثمُّورْثْ إِوَاطَانْ. نشّْ أَذْ بَارْكغْ سِيذِي ذِي ثْمسْمُونِينْ.