إِزهِّيذنْ 27

1 أَزهّذْ ن ذَاوُوذْ. سِيذِي ذ ثَافَاوْثْ إِنُو ذ ؤُسنْجمْ إِنُو، وِي زِي غَا ڭّْوذغْ؟ سِيذِي ذ لْقلْعَا إِجهْذنْ إِ ثُوذَارْثْ إِنُو، وِي زِي غَا نّْخڒْعغْ عَاذْ؟ 2 ؤُمِي غَارِي د-قَارّْبنْ إِعفَّاننْ حِيمَا أَذْ شّنْ دَّاثْ إِنُو، إِنِّي ذ أَيِي إِحصَّارنْ ذ ڒْعذْيَانْ إِنُو، نّْقَارْضنْ نِيثْنِي، وْضَانْ غَارْ ثمُّورْثْ. 3 وَاخَّا أَذْ خَافِي إِحْجمْ إِجّْ ن ڒْعسْكَارْ، ؤُڒْ إِنُو وَارْ إِتّڭّْوذْ شَا. وَاخَّا أَذْ خَافِي إِكَّارْ ؤُمنْغِي، عَاذْ نشّْ تّْغِيمِيغْ تّشْڒغْ. 4 إِشْثْ ن ڒْحَاجّثْ تَّارغْ زِي سِيذِي، ثَا أَذْ خَاسْ أَرْزُوغْ: مِينْ غَا كّغْ دَّارغْ أَذْ قِّيمغْ أَذْ زذْغغْ ذِي ثَادَّارْثْ ن سِيذِي، حِيمَا أَذْ ژَترغْ ڒضْرَافثْ ن سِيذِي، حِيمَا أَذْ بقْشغْ ذِي زَّاوشْثْ نّسْ ثَامقّْرَانْثْ. 5 مَاغَارْ نتَّا إِسّْذُورُّويْ أَيِي ذڭْ ؤُعُوشِّي نّسْ ذڭْ وَاسّْ ن ڒْغَارْ. نتَّا إِسّْڒقَّا أَيِي ذڭْ ؤُسڒْقِي ن ؤُقِيضُونْ نّسْ، نتَّا إِسّْڭعَّاذْ أَيِي خْ إِشْثْ ن ثصْضَارْثْ. 6 ڒخُّو أَذْ إِتّْوَاسّْڭعّذْ ؤُزدْجِيفْ إِنُو خْ ڒْعذْيَانْ إِنُو إِنِّي ذ أَيِي د-إِنّْضنْ، غَارْ وسْرُودّحْ ذِي ڒْبُوقْ أَذْ أَوْيغْ ثِيغَارْصَا غَارْ ؤُقِيضُونْ نّسْ، أَذْغنّْجغْ، وَاهْ، أَذْ زهّْذغْ إِ سِيذِي. 7 سڒْ غَارْ ثْمِيجَّا إِنُو، أَ سِيذِي، خْمِي غَا ڒَاغِيغْ، حِينّْ خَافِي ؤُ أَرّْ-د خَافِي. 8 زَّايكْ إِ إِسَّاوَاڒْ وُوڒْ إِنُو: “أَرْزُو خْ وُوذمْ إِنُو!” نشّْ أَرزُّوغْ خْ وُوذمْ نّشْ، أَ سِيذِي. 9 وَارْ زَّايِي تّفَّارْ ؤُذمْ نّشْ، وَارْ تّْخِييَّابْ أَمْسخَّارْ نّشْ ذڭْ وغْضَابْ. ثُوغَا شكْ ذ أَمْعَاونْ إِنُو. وَارْ ذ أَيِي تّْسمْحذْ ؤُ وَارْ ذ أَيِي تّجِّي، أَ أَربِّي ن ؤُسنْجمْ إِنُو. 10 مَاغَارْ بَابَا ذ يمَّا أَقَا سمْحنْ ذَايِي، مَاشَا سِيذِي أَذْ أَيِي إِكْسِي غَارسْ. 11 سْشنْ أَيِي أَبْرِيذْ نّشْ، أَ سِيذِي، نْذهْ أَيِي غَارْ وبْرِيذْ إِسڭّْمنْ، ذِي سِّيبّثْ ن يِينِّي ذ أَيِي إِحصَّارنْ. 12 وَارْ ذ أَيِي تّْسلّمْ غَارْ مژْرِي ذڭْ ڒعْمَارْ ن يِينِّي ذ أَيِي إِحصَّارنْ، مَاغَارْ ڒشْهُوذْ إِسّْخَارِّيقنْ كَّارنْ خَافِي، إِنِّي إِ خَافِي إِتّْسُوضنْ س ڒخْشُونثْ. 13 ؤُهْ، مَاڒَا نشّْ زعْمَا وَارْ ؤُمِينغْ أَذْ ژَترغْ ڒْخَارْ ن سِيذِي ذِي ثمُّورْثْ ن يِينِّي إِدَّارنْ! 14 رَاجَا سِيذِي، رَاجَا إِ-ث، إِڒِي ذ أَرْيَازْ، نتَّا أَذْ ذَايكْ يڭّْ ؤُڒْ، وَاهْ رَاجَا سِيذِي.