إِزهِّيذنْ 37

1 ن ذَاوُوذْ. أَلِيفْ. وَارْ ثتّْوَارقّْ ثفْقحْثْ نّشْ خْ إِعفَّاننْ، وَارْ تَّاسمْ خْ يِينِّي إِتّڭّنْ ڒْغشّْ. 2 مَاغَارْ أَذْ وْضَانْ ذغْيَا أَمْ أَرْبِيعْ، أَمْ أَرْبِيعْ أَزِيزَا أَذْ سْڒَاونْ. 3 بِيثْ. تّْشڒْ خْ سِيذِي ؤُ أڭّْ ڒْخَارْ، زْذغْ ذِي ثمُّورْثْ ؤُ إِڒِي ذ أَمْثِيقِّي. 4 أَرّْ مژْرِي ذِي سِيذِي، ؤُ نتَّا أَذْ شكْ إِوْشْ مِينْ ذِي إِتّْمژْرِي وُوڒْ نّشْ. 5 ڭِيملْ. أَرّْ ثِيشْڒِي نّشْ غَارْ سِيذِي، تّْشَاڒْ خَاسْ ؤُ نتَّا أَذْ ت إِڭّْ. 6 نتَّا أَذْ إِسّضْهَارْ ثَاسڭْذَا نّشْ أَمْ ثْفَاوْثْ، ڒْْحقّْ نّشْ أَمْ يِيشعْشِيعنْ ن ثْفُوشْثْ ذِي طّْحَا ن ؤُزِيڒْ. 7 ذَالِيثْ. سُوسمْ زَّاثْ إِ سِيذِي ؤُ رَاجَا ث. وَارْ تّجِّي ثَافْقحْثْ نّشْ أَذْ ثَاسمْ خْ ونِّي إِفڒْهنْ ذڭْ وبْرِيذْ نّسْ، خْ ورْيَازْ نِّي إِتّڭّنْ ثَاحْرَايْمشْثْ. 8 هِي. أجّْ أَغْضَابْ نّشْ أَذْ يَارْسَا ؤُ أجّْ أَسْعَارْ نّشْ أَذْ إِرَاحْ. وَارْ تّجِّي ثَافْقحْثْ نّشْ أَذْ ثتّْوَاسَّارغْ. مَانْ أَيَا أَذْ يَاوِي مْغِيرْ ثُوعفّْنَا وَاهَا. 9 مَاغَارْ إِعفَّاننْ أَذْ تّْوَاثحَّانْ، مَاشَا إِنِّي إِسِّيثِيمنْ خْ سِيذِي أَذْ وَارْثنْ ثَامُّورْثْ. 10 وَاوْ. مْغِيرْ شْوَايْثْ وَاهَا ؤُشَا أَعفَّانْ وَارْ إِتّْغِيمِي عَاذْ. أَذْ ثْحكَّارذْ مْلِيحْ ومْشَانْ نّسْ، مَاشَا وَارْ ذِينْ إِتِّيڒِي عَاذْ. 11 إِمْهِيننْ أَذْ وَارْثنْ ثَامُّورْثْ، أَذْ أَرّنْ مژْرِي ذِي ڒهْنَا أَمقّْرَانْ. 12 زَايِينْ. أَعفَّانْ إِتّْخَارّصْ ذِي ثْمعْمَاتْشْ ثِيحْرَايْمِييِّينْ ضِيدّْ إِ ؤُمْسڭّذْ، إِتّْغزَّا خَاسْ ثِيغْمَاسْ. 13 سِيذِي إِنُو إِضحّشْ خَاسْ، مَاغَارْ إِتّْوَاڒَا أَقَا أَسّْ نّسْ أَذْ د-يَاسْ. 14 خِيثْ. إِعفَّاننْ جبْذنْ-د سِّيفْ ؤُ محْضنْ ڒْقوْسْ، حِيمَا أَذْغضْڒنْ ڒْمسْكِينْ ذ ؤُمزْڒُوضْ، حِيمَا أَذْ غَارْصنْ إِ يِينِّي إِڭُّورنْ ذڭْ وبْرِيذْ نْسنْ نِيشَانْ. 15 سِّيفْ نْسنْ أَذْ ثنْ إِڒْقفْ ذڭْ وُوڒْ نْسنْ، ڒقْوَاسْ نْسنْ أَذْ تّْوَارْژنْ. 16 ثِيث. ذْرُوسْ إِ غَارسْ غَارْ ؤُمْسڭّذْ، حْسنْ زڭْ ؤُفيّضْ ن وَاطَّاسْ ن إِعفَّاننْ. 17 مَاغَاڒْ إِغَادْجنْ ن إِعفَّاننْ أَذْ تّْوَارْژنْ، مَاشَا سِيذِي أَذْ إِسنّذْ إِمْسڭَّاذنْ. 18 يُوذْ. سِيذِي إِسّنْ ؤُسَّانْ ن يِينِّي إِڭُّورنْ نِيشَانْ، ثَاسْغَارْثْ نْسنْ أَذْ ثقِّيمْ إِ ڒبْذَا. 19 وَارْ تّْوَاقمِّيحنْ ذِي ڒْوقْثْ ثَاعفَّانْثْ، ذڭْ وُوسَّانْ ن ڒَاژْ أَذْ تّْوَاسّْجِيوْننْ. 20 كَافْ. مَاغَارْ إِعفَّاننْ أَذْ فْنَانْ، ڒْْعذْيَانْ ن سِيذِي أَذْ ودَّارنْ، أَذْ تّْوَاقْضَانْ أَمْ ونِّي إِدْجَانْ إِغْڒَانْ قَاعْ زڭْ إِزْمَارنْ إِقبُّوزنْ، أَذْ ضْونْ ذِي ثَايُّوثْ. 21 لَامِيذْ. أَعفَّانْ يَارطّڒْ، وَارْ إِتَّارِّي أَمَارْوَاسْ، مَاشَا أَمْسڭّذْ إِتّْحِينّْ، إِتِّيشْ. 22 مَاغَارْ إِنِّي زَّايسْ إِتّْوَابَارْكنْ أَذْ وَارْثنْ ثَامُّورْثْ، مَاشَا إِنِّي زَّايسْ إِتّْوَانعْڒنْ، أَذْ تّْوَاثحَّانْ. 23 مِيمْ. إِصُورَافْ ن ورْيَازْ إِجهْذنْ تّْوَاسّْمتّْننْ زِي سِيذِي، نتَّا يَارطَّا خْ وبْرِيذْ نّسْ. 24 مَاڒَا إِوْضَا، وَارْ إِتّْمنْضَارْ، مَاغَارْ سِيذِي إِوْشَا أَسْ أَفُوسْ نّسْ. 25 نُونْ. نشّْ ثُوغَا أَيِي ذ أَمژْيَانْ، ڒخُّو وْسَارغْ، مَاشَاعمَّارْصْ وَارْ ژْرِيغْ أَمْسڭّذْ إِتّْوَاجّْ، نِيغْ ثَارْوَا نّسْ أَرزُّونْ خْ وغْرُومْ. 26 أَسّْ إِكْمڒْ إِتّْحِينَّا ؤُ يَاڒطّڒْ إِ إِمزْڒَاضْ، زَّارِيعثْ نّسْ أَذْ ثِيڒِي إِ لْبَارَاكَا. 27 سَامِيخْ. حيّذْ خْ ڒْغَارْ ؤُ أڭّْ ڒْخَارْ، خنِّي أَذْ غَاركْ ثِيڒِي ثْزذِّيغْثْ إِ ڒبْذَا قَاعْ. 28 مَاغَارْ سِيذِي إِتّخْسْ ڒْحقّْ، وَارْ إِسمّحْ ذڭْ إِمْثِيقَّانْ نّسْ. عَايِينْ. أَذْ تّْوَاحْضَانْ إِ ڒبْذَا قَاعْ، مَاشَا زَّارِيعثْ ن إِعفَّاننْ أَذْ ثتّْوَاثحَّا. 29 إِمْسڭَّاذنْ أَذْ وَارْثنْ ثَامُّورْثْ، أَذْ ذَايسْ زذْغنْ إِ ڒبْذَا. 30 بِي. أَقمُّومْ ن ؤُمْسڭّذْ إِتّْبَارّحْ س ثِيغِيثْ، إِڒسْ نّسْ إِسَّاوَاڒْ س ڒْحقّْ. 31 شَّارِيعَا ن أَربِّي نّسْ ذڭْ وُوڒْ نّسْ، إِصُورَافْ نّسْ وَارْ تّفْرِيغنْ. 32 ثْسَاذِي. أَعفَّانْ إِڒبّثْ إِ ؤُمْسڭّذْ، يَارزُّو أَذْ ث إِنغْ، 33 مَاشَا سِيذِي وَارْ زَّايسْ يَارخُّو أَفُوسْ نّسْ، وَارْ خَاسْ إِحْكمْ خْمِي ث غَا إِحَاكمْ. 34 قُوفْ. سِيثِيمْ خْ سِيذِي ؤُ طّفْ ذڭْ وبْرِيذْ نّسْ. نتَّا أَذْ شكْ إِسّْڭعّذْ حِيمَا أَذْ ثْوَارْثذْ ثَامُّورْثْ. أَذْ ثْژَارذْ أَقَا إِعفَّاننْ أَذْ تّْوَاثحَّانْ. 35 رِيخْ. نشّْ ژْرِيغْ إِجّْ ن ؤُعفَّانْ ذ بُو-ڒخْشُونثْ، إِمقَّارْ أَمْ ثْشجَّارْثْ ن ثنْڭلْثْ ثَازِيزَاوْثْ. 36 أَقَا إِعْذُو، ؤُشَا خْزَارْ، وَارْ ث ثُوغِي شَا عَاذْ ذِينْ. أَرْزُوغْ خَاسْ، مَاشَا إِذْوڒْ وَارْ إِدْجِي عَاذْ. 37 شِينْ. حْضَا خْ ونِّي إِدْجَانْ إِكْمڒْ ؤُ خزَّارْ غَارْ ونِّي إِڭُّورنْ نِيشَانْ، مَاغَارْ أَنڭَّارْ ن ورْيَازْ نِّي أَذْ يِيڒِي ذ ڒهْنَا. 38 إِنِّي إِتّْعدَّانْ أَذْ تّْوَاردّْدْجنْ جْمِيعْ، مِينْ إِقِّيمنْ ن إِعفَّاننْ أَذْ إِتّْوَاثحَّا. 39 ثَافْ. أَسنْجمْ ن إِمْسڭَّاذنْ أَذْ د-يَاسْ زِي سِيذِي، أَقَا نتَّا ذ أَروْڒَا نْسنْ ذِي ڒْوقْثْ ن ڒحْصَارثْ. 40 سِيذِي أَذْ أَسنْ إِوْشْ أَفُوسْ ؤُ أَذْ ثنْ إِفكّْ. نتَّا أَذْ ثنْ إِفكّْ زڭْ إِعفَّاننْ ؤُ أَذْ ثنْ إِسّنْجمْ، مَاغَارْ نِيثْنِي أَركّْوَاڒنْ غَارسْ.