إِزهِّيذنْ 38

1 أَزهّذْ ن ذَاوُوذْ. إِ ڒِيذَارثْ. 2 أَ سِيذِي، وَارْ ذ أَيِي تّْعَاقَابْ ذڭْ ؤُذُوقّزْ ن وغْضَابْ نّشْ، وَارْ ذ أَيِي تّْودَّابْ س وسْعَارْ نّشْ. 3 مَاغَارْ فْڒِيثْشَاثْ نْ ڒْقوْسْ نّشْ ؤُذْفنْثْ ذَايِي، أَفُوسْ نّشْ إِتّْزيَّارْ خَافِي. 4 وَارْ ذِينْ إِقِّيمْ مِينْ إِدْجَانْ إِكمّْڒنْ ذِي أَرِّيمثْ إِنُو زڭْ وسْخضْ نّشْ، وَارْ إِقِّيمْ مِينْ إِصحّنْ ذڭْ إِغْسَانْ إِنُو زِي سِّيبّثْ ن دّنْبْ إِنُو. 5 مَاغَارْ ڒْمُوعْصِييَّاثْ إِنُو ڭعّْذنْثْ أَيِي غَارْ ؤُزدْجِيفْ إِنُو، ذقّْڒنْثْ خَافِي أَمْ يِيجّْ ن دّْقڒْ إِمْغَارْ أَطَّاسْ. 6 إِيزِّيمنْ إِنُو ذَايْسنْ أَرِّيحثْ، ڭيّْحنْ س ثُوبُّوهڒْيَا إِنُو. 7 ذوْڒغْ قوْسغْ، ذوْڒغْغنْسغْ أَڒْ طَّارْفْ. أَسّْ مَارَّا ڭُّورغْ ذڭْ وَارُّوضْ ن وشْضَانْ ذ أَبَارْشَانْ. 8 مَاغَارْ تَّاشِيغْ ثِيجْعِينَّاثِينْ إِنُو أَرْغِينْثْ س ثْمسِّي مَارَّا، وَارْ ذِينْ إِقِّيمْ مِينْ إِدْجَانْ إِكمّْڒنْ ذِي أَرِّيمثْ إِنُو. 9 نشّْ جمّْذغْ ؤُ تّْوَاغضْڒغْ قَاعْ، سْغُويُّوغْ س زّْهِيرْ ن وُوڒْ إِنُو. 10 أَ سِيذِي إِنُو، مَارَّا مِينْ ذِي غَارِي مژْرِي أَقَا-ث زَّاثكْ، أَوعّضْ إِنُو وَارْ زَّايكْ إِتّْنُوفَّارْ. 11 ؤُڒْ إِنُو إِدّنْذُونْ، مَارَّا جّهْذْ إِفّغْ أَيِي، ؤُڒَا ذ ثَافَاوْثْ ثفّغْ زِي ثِيطَّاوِينْ إِنُو، وَاهْ ؤُڒَا ذ نِيثنْثِي وَارْ غَارِي بدّنْثْ عَاذْ. 12 إِمْعِيزّنْ إِنُو ذ إِمدُّوكَّاڒْ إِنُو بدّنْ أَرنْذَاذْ إِنُو غَارْ جّْرِيحشْثْ إِنُو، ؤُڒَا ذ إِنِّي إِ ذ أَيِي يُوذْسنْ تَّاڭّْوجنْ خَافِي. 13 إِنِّي يَارزُّونْ أَذْ كّْسنْ ثُوذَارْثْ إِنُو، نذْينْ أَيِي ڒفْخُوخْ، إِنِّي يَارزُّونْ أَذْ أَيِي ڭّنْ ڒْغَارْ، سَّاوَاڒنْ أَمْ مّژْرنْ أَذْ أَردّْدْجنْ، نِيثْنِي شڒْغنْ س ڒْغشّْ أَسّْ مَارَّا. 14 مَاشَا نشّْ تّڭّغْ إِخفْ إِنُو أَخْمِي ذ أَذهْشُورْ، أَمْ ويْنَاوْ نِّي وَارْ يَارزّْمنْ أَقمُّومْ نّسْ. 15 نشّْ أَمْ ورْيَازْ وَارْ إِتّسْڒِينْ، ونِّي وَارْ غَارْ إِدْجِي ثْوَارِّيثْ زڭْ ؤُقمُّومْ نّسْ. 16 مَاغَارْ تّْرَاجِيغْ شكْ، أَ سِيذِي، شكْ أَذْ د-ثَارِّيذْ، أَ سِيذِي إِنُو، أَ أَربِّي إِنُو! 17 مَاغَارْ نِّيغْ: “أجّْ إِ-ثنْ وَارْ خَافِي فَارّْحنْ، خْمِي غَا فَارْغنْ إِضَارنْ إِنُو، أجّْ إِ-ثنْ وَارْ سّمْغَارَانْ إِخفْ نْسنْ خَافِي. 18 مَاغَارْ نشّْ أَقَا أَذْ نْقَارْضغْ، ڒحْرِيقْ إِنُو أَقَا-ث ڒبْذَا زَّاثِي. 19 مَاغَارْ سَّارْڭْبغْ أَشْ ڒْمُوعْصِييّثْ إِنُو، أَقَا تّْوَاحصَّارغْ زِي دّنْبْ إِنُو. 20 ڒْعذْيَانْ إِنُو دَّارنْ، أَقَا أَثنْ س جّهْذْ، أَطَّاسْ دْجَانْ إِنِّي ذ أَيِي إِشَارّْهنْ بْڒَا سِّيبّثْ. 21 إِنِّي إِتَّارَّانْ ڒْخَارْ س ڒْغَارْ سّْبدّنْ إِخفْ نْسنْ ضِيدّْ إِنُو، ؤُمِي نشّْ أَرزُّوغْ خْ مِينْ إِصبْحنْ. 22 وَارْ ذَايِي سمّحْ، أَ سِيذِي، أَربِّي إِنُو، وَارْ خَافِي تَّاڭّْوجْ. 23 ذغْيثْ حِيمَا أَذْ أَيِي ثوْشِيذْ أَفُوسْ، أَ سِيذِي إِنُو، أَسنْجمْ إِنُو.