إِزهِّيذنْ 39

1 إِ ؤُمقّْرَانْ ن إِمغْنَاجنْ. إِ يَاذُوثُونْ. أَزهّذْ ن ذَاوُوذْ. 2 نِّيغْ: “نشّْ أَذْ كَّارغْ أَذْ حْضِيغْ إِبْرِيذنْ إِنُو زِي دّنْبْ ن يِيڒسْ إِنُو، أَذْ طّْفغْ أَحطُّو غَارْ ؤُقمُّومْ إِنُو س إِشْثْ ن ثشْمَانْثْ، مِينْ غَا يكّْ ؤُعفَّانْ زَّاثِي." 3 نشّْ ذوْڒغْ أَمْ ويْنَاوْ، ڒحّْفغْ إِخفْ إِنُو س ؤُسغْذْ، بكْمغْ ؤُڒَا خْ ڒْخَارْ، مَاشَا ڒحْرِيقْ إِنُو ثُوغَا يَارنِّي. 4 ؤُڒْ إِنُو إِذْوڒْ إِحمَّا ذِي ذَاخڒْ إِنُو، ثتّْوَاسَّارغْ إِشْثْ ن ثْمسِّي غَارْ ؤُنِيخْسسْ إِنُو. خنِّي سِّيوْڒغْ س يِيڒسْ إِنُو: 5 “أَ سِيذِي، سْشنْ أَيِي أَنڭَّارْ إِنُو، مَانْ إِدْجَا ڒْقدّْ ن وُوسَّانْ إِنُو، حِيمَا أَذْ سّْنغْ مَامّشْ أَرخْفغْ. 6 خْزَارْ، شكْ ثَارِّيذْ ؤُسَّانْ إِنُو أَمْ يِيشْبَارنْ ن ؤُفُوسْ، ڒْْمِيجَاڒْ ن ثُوذَارْثْ إِنُو زَّاثْ إِ شكْ أَخْمِي ذ وَالُو. كُوڒْ بْنَاذمْ، مَامّشْ مَا إِبدّْ إِمْثنْ، نِيشَانْ أَمْ يِيشْثْ ن ثَايُّوثْ.” سِيلَاهْ. 7 إِوَا، بْنَاذمْ إِڭُّورْ أَمْ يِيجّْ ن ڒخْيَاڒْ، وَاهْ، أَمْ إِشْثْ ن ثَايُّوثْ أَمُّو إِ إِتّْرَاحْ إِتَّاسْ-د. نتَّا إِسّْمُونْ، وَارْ إِسِّينْ مَانْ ونْ ث إِ غَا إِكْسِينْ غَارسْ. 8 ؤُ ڒخُّو، مِينْ غَا سِّيثْمغْ، أَ سِيذِي إِنُو؟ أَقَا نشّْ تّْرَاجِيغْ شكْ! 9 فكّْ أَيِي زِي مَارَّا إِخطَّانْ إِنُو، وَارْ ذ أَيِي تّڭّْ شَا ذ ثِيسضْحَاشْ إِ ؤُبُوحَاڒِي. 10 نشّْ ذوْڒغْ أَمْ ويْنَاوْ، وَارْ أَرزّْمغْ أَقمُّومْ إِنُو، مَاغَارْ ذ شكْ إِ إِڭِّينْ أَيَا. 11 كْسِي زَّايِي جّْرِيحشْثْ نّشْ، أَقَا فنِّيغْ س ؤُطفُّو إِحصَّارنْ ن ؤُفُوسْ نّشْ. 12 مَاڒَا ثْسڭّْذذْ شَا ن ورْيَازْ س ثِييِّيثَا ذِي سِّيبّثْ ن ڒْمُوعْصِييّثْ نّسْ، خنِّي ثسّْفسْيذْ أَشوَّارْ ن وَادُّوذْ نّسْ أَمْ ثْشِينْذَا. إِوَا كُوڒْ بْنَاذمْ أَذْ إِفْنَا أَمْ يِيشْثْ ن ثَايُّوثْ. سِيلَاهْ. 13 سڒْ إِ ثْژَادْجِيثْ إِنُو، أَ سِيذِي، سْحسّْ إِ ؤُغُويِّي إِنُو. وَارْ تّبْكِيمْ غَارْ إِمطَّاونْ إِنُو، مَاغَارْ أَقَا أَيِي ذ أَبَارَّانِي، ذ أَمْعزّبْ غَاركْ، أَمْ مَارَّا ڒجْذُوذْ إِنُو. 14 سْحيّذْ خَافِي مَاحنْذْ أَذْ شعْشعغْ عَاذْ س ڒفْرَاحثْ، قْبڒْ أَذْ رَاحغْ ؤُ وَارْ ذَا تِّيڒِيغْ عَاذْ.