إِزهِّيذنْ 66

1 إِ ؤُمقّْرَانْ ن إِمغْنَاجنْ. إِزْڒِي. أَزهّذْ. ذُوقّْزمْ س ؤُسْڒِيوْڒوْ إِ أَربِّي، وَاهْ، مَارَّا ثَامُّورْثْ! 2 زهّْذمْ إِ ؤُعُودْجِي ن يِيسمْ نّسْ، سّْعُودْجْ إِ-ث إِ ؤُسمْغَارْ نّسْ. 3 إِنِيمْ إِ أَربِّي: “مَامّشْ سَّاڭّْوَاذنْثْ ثْمڭَّا نّشْ!” زِي ڒمْغَارثْ ن جّْهذْ نّشْ أَذْ خَاكْ سّْنِيعْمِيڒنْ ڒْعذْيَانْ نّشْ أَذْ أَضَارنْ إِ شكْ. 4 مَارَّا ثَامُّورْثْ، وَاهْ مَارَّا أَذْ أَشْ سجْذنْ ؤُ أَذْ زهّْذنْ، أَذْ زهّْذنْ إِ يِيسمْ نّشْ. سِيلَاهْ. 5 أَسمْ-د، خْزَارمْ ثِيمڭَّا ن أَربِّي. مِينْ إِڭَّا زَّاثْ إِ ثَارْوَا ن بْنَاذمْ أَقَا إِسَّاڭّْوَاذْ. 6 نتَّا يَارَّا ڒبْحَارْ ذ ڒْبَارْ. نِيثْنِي ژْوَانْ إِغْزَارْ خْ إِضَارنْ. ذِينِّي إِ زَّايسْ نْفَارّحْ. 7 س جّهْذْ نّسْ إِحكّمْ إِ ڒبْذَا. ثِيطَّاوِينْ نّسْ تّْعسّنْثْ خْ ڒڭْنُوسْ. غَارْومْ أَذْ مّْعَاڒَانْ إِنِّي إِتّْغوّْغنْ. سِيلَاهْ. 8 بَارْكمْ أَربِّي نّغْ، كنِّيوْ أَ ڒڭْنُوسْ، ڭّمْ أَذْ إِتّْوَاسڒْ ڒْحسّْ ن ؤُصبّحْ نّسْ. 9 نتَّا ذ ونِّي ذ أَنغْ إِتِّيشنْ ثُوذَارْثْ، ذ ونِّي وَارْ إِجِّينْ أَضَارْ نّغْ أَذْ إِفَارْغْ. 10 مِينْزِي شكْ، أَ أَربِّي، ثْقدْجْبذْ أَنغْ، شكْ ثسِّيزذْڭذْ أَنغْ أَخْمِي سِّيزْذَاڭنْ نُّوقَارْثْ. 11 شكْ ثْنذْهذْ أَنغْ ذِي ثْرَاشَّا ن ڒْفخْ. ثسَّارْسذْ خَانغْ إِجّْ ن دّْقڒْ خْ ثجْعِينَّا نّغْ. 12 شكْ ثجِّيذْ إِوْذَانْ أَذْ نْينْ خْ إِزدْجِيفنْ نّغْ، أَقَا نذْوڒْ ذِي ثْمسِّي ذ وَامَانْ، مَاشَا شكْ ثسُّوفّْغذْ أَنغْ س إِجّْ ن ڒْقدّْ إِفيّضْ. 13 نشّْ أَذْ د-أَذْفغْ غَارْ ثَادَّارْثْ نّشْ س ثْغَارْصَا ن وشْمَاضْ، أَذْ أَشْ خدْجْصغْ لْوُوعُوذْ إِنُو، 14 لْوُوعُوذْ نِّي زَّايْسنْ نطْقنْ إِينْشِيشنْ إِنُو، نِّي زَّايْسنْ إِسِّيوڒْ ؤُقمُّومْ إِنُو، ڒَْامِي ثُوغَا أَيِي ذِي ڒحْصَارثْ. 15 ثِيغَارْصَا ن وشْمَاضْ نْ ڒْمَارْ إِصحّنْ أَذْ أَشْ ثنْثْ-إِ-د-أَوْيغْ أَكْ-ذ ڒبْخُورْ ن إِشَارِّييّنْ. نشّْ أَذْ أَشْ سّْوجْذغْ إِفُونَاسنْ ذ إِغَايْضنْ. سِيلَاهْ. 16 مَارَّا كنِّيوْ إِ إِتّڭّْوْذنْ أَربِّي، أَسّتِّيوْ-د، سْڒمْ، نشّْ خْسغْ أَذْ أَومْ عَاوْذغْ مِينْ إِ ذ أَيِي إِڭَّا ذِي ڒعْمَارْ إِنُو. 17 عَاذْ إِڒَاغَا خَاسْ ؤُقمُّومْ إِنُو، خنِّي أَقَا نتَّا إِتّْوَاسّمْغَارْ سَاذُو يِيڒسْ إِنُو. 18 مْڒِي ثُوغَا نْوِيغْ ڒْمُوعْصِييّثْ ذڭْ وُوڒْ إِنُو، خنِّي أَقَا سِيذِي إِنُو وَارْ ذ أَيِي إِتّسْڒِي شَا. 19 أَربِّي مَاشَا أَقَا إِسْڒَا أَيِي، أَقَا نتَّا إِوْشَا ثَايْنِيثْ إِ ثْمِيجَّا ن ثْژَادْجِيثْ إِنُو. 20 أَذْ إِتّْوَابَاركْ أَربِّي ونِّي وَارْ إِنْضَارنْ ثَاژَادْجِيثْ إِنُو، وَارْ ذ أَيِي إِكِّيسْ ثَامخْسِيوْثْ نّسْ إِشوَّارنْ.