إِزهِّيذنْ 67

1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ إِفِيڒَانْ. أَزهّذْ. إِزْڒِي. 2 أَذْ خَانغْ إِحِينّْ أَربِّي. نتَّا إِتّجَّا ؤُذمْ نّسْ أَذْ خَانغْ يَارْغْ - سِيلَاهْ - 3 مَاحنْذْ أَذْ سّْننْ أَبْرِيذْ نّشْ خْ ثمُّورْثْ، أَذْ سّْننْ أَسنْجمْ نّشْ جَارْ مَارَّا ڒڭْنُوسْ! 4 ڒڭْنُوسْ أَذْ شكْ قَاذَانْ، أَ أَربِّي، مَارَّا ڒڭْنُوسْ أَذْ شكْ قَاذَانْ. 5 ڒڭْنُوسْ أَذْ فَارْحنْ، أَذْ سْڒِيوڒْونْ، مَاغَارْ شكْ أَذْ ثْحكْمذْ خْ ڒڭْنُوسْ نِيشَانْ، شكْ أَذْ ثسُّويُورذْ شُّوعُوبْ خْ ثمُّورْثْ - سِيلَاهْ - 6 ڒڭْنُوسْ أَذْ شكْ قَاذَانْ، أَ أَربِّي، مَارَّا ڒڭْنُوسْ أَذْ شكْ قَاذَانْ. 7 ثَامُّورْثْ ثتِّيشْ ڒْغِيدْجثْ نّسْ. أَربِّي، أَربِّي نّغْ، أَذْ أَنغْ إِبَاركْ. 8 أَربِّي أَذْ أَنغْ إِبَاركْ ؤُ مَارَّا ثِينڭُّورَا ن ثمُّورْثْ أَذْ زَّايسْ ڭّْوذنْثْ.