Izehhiden 16

1 Tira ineqcen. N Dawud. Ḥḍa xafi, a Arebbi, maɣar necc arekkwařeɣ ɣarek. 2 Řeɛmar inu tenna i SIDI: “Cek d Sidi inu, Cek d řxar inu, war din min xak yuɛřan!" 3 X imqeddasen i izeddɣen x temmurt, nitni d ayt n jjehd zi ssibbet n marra arḍa inu i daysen iǧan. 4 Tamara n yinni iḍeffaren ammu deɣya ijj n arebbi nneɣni ad ttwaktarent. Necc war ttfarriɣeɣ tawhibt nsen n useyyeb n idammen, war ttidareɣ ismawen nsen x iyencicen inu. 5 SIDI d tasɣart inu d řkas inu. Cek tᵉṭṭfed taqedduḥt inu deg ufus nnec. 6 Ifiřan n řeɛbar kkaren ayi-dd deg imucan iṣebḥen, wah, tasɣart inu aqa tusa-dd xafi mliḥ. 7 Ad barkeɣ SIDI, wenni d ayi ineṣḥen. Uřa s ǧiřet ssřemdent ayi tiẓẓař inu. 8 Tteggeɣ SIDI řebda jar tiṭṭawin inu. Umi Netta iǧa x ufus afusi inu, necc war ttefcireɣ. 9 S uya ifarreḥ uř inu, ittarciq řeɛmar inu. Wah, uřa d ddat inu ad iddar s řaman. 10 Maɣar Cek war tsemmḥed ca di řeɛmar inu di řaxart, war tᵉttarrid amtiqqi nnec ad ikiccu. 11 Cek ad ayi tessecned abrid n tudart, tyawant zi řefraḥet aqa-t zzat i wudem nnec, nniɛmat aqa atent deg ufus nnec i řebda.