Izehhiden 17
LTI1 Taẓaǧit n Dawud. A SIDI, seř ɣar tsegda, egg řbař i uɣuyyi inu, ewc amezzuɣ xmi ttẓaǧiɣ s iyencicen war zzaysen dd-ittekk ca řɣecc. 2 Ejj řḥeqq inu ad iffeɣ zi zzat i wudem nnec, ejj tiṭṭawin nnec ad xezzarent ɣar min iǧan iseggden. 3 Cek tqeǧbed uř inu, tarzud dayes s ǧiřet. Tjarrbed ayi, maca war tufid walu. Mařa nwiɣ ad xarrṣeɣ di ca war iḥři, war itteffiɣ zeg iyenciden inu. 4 X min tteggen iwdan, aqa necc ḥḍiɣ ixef inu zi tebridin n ayt n bu-řexcunet, ɛlaḥsab awař zeg iyencicen nnec. 5 Egg iṣuraf inu di jjurrat n iḍaren nnec, ḥima war farrɣen iḍaren inu. 6 Necc řaɣiɣ xak, minzi Cek ad xafi dd-tarred, a Arebbi, ewc ayi amezzuɣ, seř i min ɣa iniɣ. 7 Scen řeɛjayeb n tmexsiwt nnec icewwaren, Cek d wenni issenjamen inni ɣarek yarekkwařen, Cek d wenni ten issenjamen zeg yinni ittɣewwɣen s ufus nnec afusi. 8 Ḥḍa ayi am mummu n tiṭṭ nnec, snuffar ayi di tiři n wafriwen nnec 9 zeg iɛeffanen inni ixsen ad dayi ḥṣaren, inni d řɛedyan n řeɛmar inu, inni d ayi ittquwwaren. 10 Nitni bellɛen uř nsen s tadunt nsen, s uqemmum nsen ssawařen s nnfaxet. 11 Řexxu quwwaren ɛad i iṣuraf nneɣ, tiṭṭawin nsen mmuqqřent maḥend ad ayi nḍaren ɣar temmurt. 12 Netta yarwes deg weyrad nni imeẓẓren maḥend ad imezzeq taymart nnes, deg ijj n weyrad d ameẓyan i iqqimen deg imucan innuffaren. 13 Kkar, a SIDI, ruḥ msagar akides, ɣḍeř-i-t ɣar temmurt. Fekk řeɛmar inu s ssif nnec zeg uɛeffan, 14 s ufus nnec zeg iryazen, a SIDI, zeg iryazen n ddunect-a nni ɣarsen tudart-a d tasɣart nsen, inni zi tᵉttɛemmared aɛeddis nsen s řeknuz inuffaren, uřa d iḥenjiren nsen ttwayawanen, ttejjan min iceṭṭen i tarwa nsen. 15 Necc ad ẓareɣ udem nnec di tsegda, ad dewřeɣ jjiwneɣ s waddud nnec xmi dd ɣa faqeɣ.