Izehhiden 69

1 I umeqqran n imeɣnajen. S teɣnint n ‘Tlillicin’. N Dawud. 2 Senjem ayi, a AREBBI, maɣar aman iwḍen ayi ɣar řeɛmar inu. 3 Necc ɣebbiɣ deg ubaryuḍ yuǧeɣ, war din mani ɣa beddeɣ. Aqa-yi deg waman yuǧɣen u řḥemřet tᵉttazzeř xafi. 4 Necc uḥřeɣ s iɣuyyan, tmijja inu tebbuybeḥ, tiṭṭawin inu qḍant zeg uraji x AREBBI inu. 5 Inni d ayi icarrhen x walu ttwessɛen x ucuwwaf i iǧan x uzeǧif inu. Inni yarezzun ad ayi areddǧen, řɛedyan inu i xafi issxarriqen, dewřen jehhden. Min war ucareɣ, ittxeṣṣa ayi ad tt-i-dd-arreɣ ɛad. 6 A AREBBI, Cek tessned tubbuheřya inu, imerwusa n ddnub inu war xak ffaren. 7 Ejj inni xak issitimen, war ttseḍḥin, a Sidi inu, SIDI n řɛeskarat, ejj inni xak yarezzun, war zzayi ttwafeṭṭḥen, a AREBBI n Israil. 8 Maɣar di ṭṭweɛ nnec i kessiɣ aseḥqar, aseḍḥi iřeḥḥef i uɣembub inu. 9 Dewřeɣ d aɣrib ɣar aytma, i iḥenjiren n yemma dewřeɣ d abarrani. 10 Maɣar tusmi iqeddsen i Taddart nnec tecca ayi, aseḥqar n yinni Cek isseḥqaran iwḍa-dd xafi. 11 Necc ruɣ ɣar uẓummi n řeɛmar inu, maca aya yiwi ayi-dd ɛřam kuř aseḥqar. 12 Necc yarḍeɣ ict n txancet n wecḍan, maca dewřeɣ asen d ijj n lmatal. 13 Inni iqqimen ɣar tewwart n tendint ssawařen xafi, uřa d izřan n yinni isessen ccrab. 14 Necc maca ttᵉttareɣ ɣarek, a SIDI! Aqa din ijj n řḥař n arḍa, a AREBBI, s řemɣaret n tmexsiwt nnec icewwaren. Arr-dd xafi s usenjem nnec i dd-iffɣen zi řmanet nnec. 15 Jbed ayi-dd zeg ubaryuḍ, ejj ayi war ttɣebbiɣ, ḥima ad ttwafekkeɣ zeg inni d ayi icarrhen u zeg waman yuǧɣen. 16 War ttejji ad ayi tawi řḥemřet, war ttejji řaǧaɣ ad ayi isarḍ, ad xafi ibelleɛ wanu aqemmum nnes. 17 Arr xafi, a SIDI, maɣar tamexsiwt nnec icewwaren teṣbeḥ. Qřeb ɣari ɛlaḥṣab arreḥmet nnec ifeyyḍen. 18 War tteffar ca udem nnec x umsexxar nnec, maɣar ttwaḥṣareɣ. Arr-dd xafi daweḥda. 19 Ades ayi-dd ɣar řeɛmar inu, fekk i-t. Seṣřeḥ ayi di ssibbet n řɛedyan inu. 20 Cek tessned řɛar inu d useḍḥi inu d řefḍiḥet inu, aqa marra inni d ayi iḥeṣṣaren bedden zzatek. 21 Aseḥqar yarẓ ayi uř u necc qenḍeɣ aṭṭas. Rajiɣ aziǧez, maca walu, necc rajiɣ inni d ayi ɣa iɛezzan, maca war ufiɣ uřa d ijjen. 22 Nitni ggin ssem di macca inu, i ufadi inu ggin ayi ad sweɣ řxeǧ. 23 Ejj ṭṭabřa nsen ad tedweř d řfex, uřa d taxceft i yinni akidsen ibedden. 24 Sdarɣeř tiṭṭawin nsen, ḥima war ttwiřin ɛad, arr tijɛinnatin nsen ad ttenhezzant řebda. 25 Zeǧeɛ xasen asxeḍ nnec, ejj řḥaduq n weɣḍab nnec ad ten iřqef. 26 Ejj řmargeḥ n tzeddiɣt nsen ad idweř d řxarbet, maḥend war dayes izeddeɣ ɛad uřa d ijjen. 27 Maɣar nitni darracen x weryaz nni tuɣa tewtid Cek, s řhard nsen arnin i řeḥriq n yinni zzayek ittwařeqqfen. 28 Arr ddenb x ddenb nsen, war ten ttejji ad dd-adfen ɣar tsegda nnec. 29 Ejj i-ten ad ttwamḥan zeg Wedlis ittwanḍen n Tudart, ařami war ttwazemmamen ca ɣar imseggaden. 30 Maca necc aqa ayi di řeɣben u ttnezbareɣ. Iři ad ayi issgeɛɛed sennej usenjem nnec, a AREBBI. 31 Necc ad ṣebbḥeɣ Isem n AREBBI s yijj n yezři, s uqadi ad as ssemɣareɣ. 32 Aya ad yarḍa SIDI ktar zeg ijj n ufunas, zeg ijj n ufunas ameẓyan s waccawen d tecḍect immsebḍan. 33 Imhinen nni tt iẓrin, ad farḥen, u inni yarezzun x AREBBI, aqa uř nwem ad iddar. 34 Maɣar SIDI ittesřa ɣar imezřaḍ, war isseḥqiri ca imeḥbas nnes. 35 Ejj ijenwan d temmurt ad t ssemɣaren, řebḥur d marra min daysen ittenhezzan. 36 Maɣar AREBBI ad issenjem Ṣihyun, ad ibna ɛawed tineddam n Yahuda, uca nitni ad din zedɣen, ad tt ṭṭfen d řwart. 37 Zzariɛet n imsexxaren nnes ad tt tᵉṭṭef d tasɣart, inni ittexsen Isem nnes ad dayes zedɣen.