ⴰⵢⵓⴱ 35

1 ⵢⴰⵔⵔⴰ-ⴷⴷ ⵉⵍⵉⵀⵓ, ⵉⵏⵏⴰ: 2 ⵎⴰ ⵉⵜⵜⵖⵉⵍ ⴰⵛ ⴰⵢⴰ ⵏⵉⵛⴰⵏ, ⴰⵇⴰ ⵜⴻⵇⵇⴰⵔⴻⴷ: ‘ⵜⴰⵙⴻⴳⴷⴰ ⵉⵏⵓ ⴽⵜⴰⵔ ⵅ ⵜⴻⵏⵏⵉ ⵏ ⴰⵔⴻⴱⴱⵉ’? 3 ⵎⴰⵖⴰⵔ ⵜⴻⵏⵏⵉⴷ: ‘ⵎⴰⵏ ⵍⴻⴼⴹⴻⵍ ⵖⴰⵔⴻⴽ? ⵎⵉⵏ ⴷ ⴰⵢⵉ ⴷⴷ ⵖⴰ ⵉⴽⴽⴰⵔⴻⵏ ⴰⵇⴰ ⵏⴻⵛⵛ ⵡⴰⵔ ⵜⵜⴻⴳⴳⴻⵖ ⴷⴷⵏⵓⴱ?’ 4 ⴰⴷ ⵅⴰⴽ ⴷⴷ-ⴰⵔⵔⴻⵖ, ⵓⵍⴰ ⵅ ⵉⵎⴻⴷⴷⵓⴽⴽⴰⵍ ⵏⵏⴻⵛ ⴰⴽⵉⴷⴻⴽ. 5 ⵅⵣⴰⵔ ⴰⵊⴻⵏⵏⴰ, ⵓ ⵅⵣⴰⵔ, ⵃⴻⴽⴽⴰⵔ ⵉⵙⴻⵢⵏⵓⵜⴻⵏ ⵜⵉⵡⴰ ⵏⵏⴻⵛ ⵇⴰⵄ! 6 ⵎⴰⵍⴰ ⵜⴻⵅⴹⵉⴷ, ⵎⵉⵏ ⵉ ⴷ ⴰⵙ ⵜᵉⵜⵜⴻⴳⴳⴻⴷ ⵙ ⵎⴰⵏ ⴰⵢⴰ? ⵎⴰⵍⴰ ⵉⵄⴻⴷⴷⵉⵢⴻⵏ ⵏⵏⴻⵛ ⴷ ⴰⵟⵟⴰⵙ, ⵎⵉⵏ ⵣⵣⴰⵢⴻⵙ ⵉ ⴷ ⴰⵙ ⵉ ⵖⴰ ⵜⴰⵡⵢⴻⴷ? 7 ⵎⴰⵍⴰ ⵛⴻⴽ ⴷ ⴰⵎⵙⴻⴳⴳⴻⴷ, ⵎⵉⵏ ⵉ ⴷ ⴰⵙ ⵜᵉⵜⵜⵉⵛⴻⴷ ⵙ ⵓⵢⴰ, ⵏⵉⵖ ⵎⵉⵏ ⵉⵜⵜⴻⵟⵟⴻⴼ ⵏⴻⵜⵜⴰ ⵣⴻⴳ ⵓⴼⵓⵙ ⵏⵏⴻⵛ? 8 ⴰⵇⴰ ⵜⵓⵄⴻⴼⴼⵏⴰ ⵏⵏⴻⵛ ⵜⵍⴻⵇⵇⴻⴼ ⴰⵔⵢⴰⵣ ⴰⵎ ⵛⴻⴽ ⵡⴰⵀⴰ, ⵓ ⵜⴰⵙⴻⴳⴷⴰ ⵏⵏⴻⵛ ⵜᵉⵜⵜⵉⵍⵉ ⴷⵉ ⵟⵟⵡⴻⵄ ⵏ ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⵡⴰⵀⴰ. 9 ⵙⵖⵓⵢⵢⵓⵏ ⵣⴻⴳ ⵡⴰⵟⵟⴰⵙ ⵏ ⵍⴻⵃⵚⴰⵔⴰⵜ, ⵜⵜⵍⴰⵖⴰⵏ ⵖⴰⵔ ⵜⵡⵉⵣⴰ ⵣⵉ ⵙⵙⵉⴱⴱⴻⵜ ⵏ ⵓⵖⵉⵍ ⵏ ⴰⵢⵜ ⵏ ⴱⵓ-ⵚⵚⵓⵍⵟⴰ. 10 ⵎⴰⵛⴰ ⵓⵍⴰ ⴷ ⵉⵊⵊⴻⵏ ⵉⵇⵇⴰⵔ: ‘ⵎⴰⵏⵉ ⵉⴵⴰ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ, ⵡⴻⵏⵏⵉ ⵉⵜⵜⵉⵛⴻⵏ ⵉⵣⵍⴰⵏ ⵏ ⵓⵚⴻⴱⴱⴻⵃ ⴷⵉ ⴵⵉⵍⴻⵜ, 11 ⵡⴻⵏⵏⵉ ⴷ ⴰⵏⴻⵖ ⵉⵙⵙⴻⵍⵎⴰⴷⴻⵏ ⵙ ⵍⵎⴰⵍ ⵏ ⵜⴻⵎⵎⵓⵔⵜ, ⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⴻⴳⴳⴻⵏ ⴷ ⵉⵎⵉⵖⵉⵙⴻⵏ ⵙ ⵉⵊⴹⴰⴹ ⵏ ⵓⵊⴻⵏⵏⴰ?’ 12 ⴷⵉⵏⵏⵉ ⵙⵖⵓⵢⵢⵓⵏ ⵏⵉⵜⵏⵉ, ⵎⴰⵛⴰ ⵏⴻⵜⵜⴰ ⵡⴰⵔ ⴷⴷ-ⵉⵜⵜⴰⵔⵔⵉ, ⵣⵉ ⵙⵙⵉⴱⴱⴻⵜ ⵏ ⵏⵏⴼⴰⵅⴻⵜ ⵏ ⵉⵄⴻⴼⴼⴰⵏⴻⵏ. 13 ⵙ ⵜⵉⴷⴻⵜⵜ, ⴰⵔⴻⴱⴱⵉ ⵡⴰⵔ ⵉⵜⵜⴻⵙⵍⵉ ⵖⴰⵔ ⵉⵖⵓⵢⵢⴰⵏ ⵉⴱⴻⵟⵟⵍⴻⵏ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⵡⴰⵔ ⴽⵉⴷⴻⵙ ⵉⵍⴻⵀⵀⵉ. 14 ⵡⴰⵅⵅⴰ ⵛⴻⴽ ⵜⴻⵇⵇⴰⵔⴻⴷ, ⴰⵇⴰ ⵛⴻⴽ ⵡⴰⵔ ⵜ ⵜᵉⵜⵜⵡⵉⵍⵉⴷ, ⵜᵉⵜⵜⵖⵉⵎⴰ ⵜⵎⴻⵙⵍⴰⵛⵜ ⵄⴰⴷ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ. ⵔⴰⵊⴰ ⵜ ⵅⴻⵏⵏⵉ. 15 ⵎⴰⵍⴰ ⵍⴻⵅⵅⵓ ⴰⵅⴻⵢⵢⴻⵇ ⵏⵏⴻⵙ ⵡⴰⵔ ⵉⵛⵛⵉⵜ ⵄⴰⴷ, ⵎⴰ ⵅⴻⵏⵏⵉ ⵏⴻⵜⵜⴰ ⵡⴰⵔ ⵉⵙⵙⵉⵏ ⵅ ⵓⵄⴻⴷⴷⵉ ⵉⵎⵖⴰⵔ? 16 ⴰⵢⵓⴱ ⵉⵛⴰⵔⵔⴻⴳ ⴰⵇⴻⵎⵎⵓⵎ ⵏⵏⴻⵙ ⴱⴰⵟⴻⵍ, ⵉⵜⵜⴻⴳⴳ ⴰⵡⴰⵍⴻⵏ ⵉⵎⴻⵇⵇⵔⴰⵏⴻⵏ ⵏⵀⵍⴰ ⵜⵓⵙⵙⵏⴰ.