ⴰⵢⵓⴱ 36

1 ⵢⴰⵔⵏⵉ ⵉⵍⵉⵀⵓ ⴷⴻⴳ ⵡⴰⵡⴰⵍ, ⵉⵏⵏⴰ: 2 ⵚⴱⴰⵔ ⵛⵡⴰⵢⵜ ⴰⴽⵉⴷⵉ, ⵅⴻⵏⵏⵉ ⵏⴻⵛⵛ ⴰⴷ ⴰⵛ ⵙⵙⴻⵛⵏⴻⵖ, ⴰⵇⴰ ⴷⵉⵏ ⵄⴰⴷ ⵍⴻⵙⴱⴰⴱ ⴽⵜⴰⵔ ⴷⵉ ⵟⵟⵡⴻⵄ ⵏ ⵜⵎⴻⵙⵍⴰⵛⵜ ⵏ ⴰⵔⴻⴱⴱⵉ. 3 ⵏⴻⵛⵛ ⴰⴷ ⴷⴷ-ⴰⵡⵢⴻⵖ ⵜⵓⵙⵙⵏⴰ ⵉⵏⵓ ⵣⵉ ⵍⴰⴳⴳⵯⴰⵊ, ⴰⴷ ⵏⴻⵄⵎⴻⵖ ⵜⴰⵙⴻⴳⴷⴰ ⵏ ⵡⴻⵏⵏⵉ ⴷ ⴰⵢⵉ ⴷⴷ-ⵉⵅⴻⵍⵇⴻⵏ. 4 ⵎⴰⵖⴰⵔ ⵙ ⵜⵉⴷⴻⵜⵜ, ⴰⵡⴰⵍⴻⵏ ⵉⵏⵓ ⵡⴰⵔ ⴵⵉⵏ ⴷ ⵉⵅⴰⵔⵔⵉⵇⴻⵏ, ⴰⵇⴰ ⴷⴰ ⵣⵣⴰⵜⴻⴽ ⵡⴻⵏⵏⵉ ⴷ ⴱⵓ-ⵜⵓⵙⵙⵏⴰ ⵙ ⵜⵉⴷⴻⵜⵜ. 5 ⵅⵣⴰⵔ, ⴰⵔⴻⴱⴱⵉ ⵉⵎⵖⴰⵔ ⴰⵟⵟⴰⵙ, ⵎⴰⵛⴰ ⵡⴰⵔ ⵉⵙⵙⴻⵃⵇⵉⵔⵉ ⵃⴻⴷ, ⵉⵎⵖⴰⵔ ⵊⵊⵀⴻⴷ ⵏ ⵍⴻⴼⵀⴰⵎⴻⵜ ⵏⵏⴻⵙ. 6 ⴰⵄⴻⴼⴼⴰⵏ ⵡⴰⵔ ⵜ ⵉⵜⵜⴻⵊⵊⵉ ⴰⴷ ⵉⴷⴷⴰⵔ, ⵎⴰⵛⴰ ⵉ ⵉⵎⴻⵣⵍⴰⴹ ⵉⵜⵜⴰⵖ ⴰⵙⴻⵏ ⵜⴰⵙⵖⴰⵔⵜ ⵏⵙⴻⵏ. 7 ⵏⴻⵜⵜⴰ ⵡⴰⵔ ⵉⵙⵙⵃⴻⵢⵢⵉⴷ ⵜⵉⵟⵟⴰⵡⵉⵏ ⵏⵏⴻⵙ ⵅ ⵓⵎⵙⴻⴳⴳⴻⴷ, ⵎⴰⵛⴰ ⵉⵙⵙⵖⵉⵎⵉ ⵜⴻⵏ ⵉ ⵍⴻⴱⴷⴰ ⵅ ⵍⵄⴰⵔⵛ ⴰⴽ-ⴷ ⵉⵊⴻⴵⵉⴷⴻⵏ, ⵓⵛⴰ ⴰⵎⵎⵓ ⵉ ⵖⴰ ⵜⵜⵡⴰⵙⵙⵓⵄⵍⴰⵏ. 8 ⵎⴰⵍⴰ ⵜⵜⵡⴰⵡⵜⴻⵏ ⵏⵉⵜⵏⵉ ⴷⵉ ⵍⴻⴳⵢⵓⴹ, ⵜⵜⵡⴰⵃⴻⴱⴱⵙⴻⵏ ⴷⵉ ⵙⵙⵏⴰⵙⴻⵍ ⵏ ⵍⴻⵖⴱⴻⵏ, 9 ⵅⴻⵏⵏⵉ ⵉⵙⵙⵛⴻⵏ ⴰⵙⴻⵏ ⵜⵉⵎⴻⴳⴳⴰ ⵏⵙⴻⵏ ⴷ ⵉⵄⴻⴷⴷⵉⵢⴻⵏ ⵏⵙⴻⵏ, ⴰⵇⴰ ⵎⵖⴰⵔⴻⵏ ⴰⵟⵟⴰⵙ. 10 ⵢⴰⵔⴻⵣⵣⴻⵎ ⴰⵎⴻⵣⵣⵓⵖ ⵏⵙⴻⵏ ⵉ ⵓⵡⴻⴱⴱⴻⵅ, ⵉⵇⵇⴰⵔ ⴰⵙⴻⵏ ⴰⴷ ⴷⴷ-ⴷⴻⵡⵍⴻⵏ ⵣⵉ ⵍⵎⵓⵄⵚⵉⵢⵢⴻⵜ ⵏⵙⴻⵏ. 11 ⵎⴰⵍⴰ ⵙⵍⵉⵏ ⵓ ⵙⴻⵅⵅⴰⵔⴻⵏ ⴰⵙ, ⴰⴷ ⵙⵙⵇⴻⴼⵍⴻⵏ ⴷⴻⴳ ⵡⴻⴼⵍⴰⵃ ⵓⵙⵙⴰⵏ ⵏⵙⴻⵏ ⵓ ⴷⵉ ⵣⵣⵀⴰⵔ ⵉⵙⴻⴳⴳⵯⵓⵙⴰ ⵏⵙⴻⵏ. 12 ⵎⴰⵛⴰ ⵎⴰⵍⴰ ⵡⴰⵔ ⵙⵍⵉⵏ, ⴰⴷ ⵜⵜⵡⴰⵀⴻⵍⵍⴽⴻⵏ ⵙ ⵍⴰⵏⵙⴰ, ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ ⴰⵎ ⵡⴰⵔ ⵖⴰⵔⵙⴻⵏ ⵜⴻⴵⵉ ⴱⵓ ⵜⵓⵙⵙⵏⴰ. 13 ⵏⵉⵜⵏⵉ ⵉⵏⵏⵉ ⵉⵙⵙⵏⵉⵄⵎⵉⵍⴻⵏ ⴷⴻⴳ ⵡⵓⵍ ⵏⵙⴻⵏ, ⵜⵜⵙⴻⵜⵜⴰⴼⴻⵏ ⴰⵖⴹⴰⴱ, ⵡⴰⵔ ⵜᵉⵜⵜⴰⵔⴻⵏ ⴰⵄⴰⵡⴻⵏ ⵎⴰⵍⴰ ⵏⴻⵜⵜⴰ ⵉⵛⴰⵔⴼ ⵉ-ⵜⴻⵏ. 14 ⵍⴻⵄⵎⴰⵔ ⵏⵙⴻⵏ ⴰⴷ ⵉⵎⵎⴻⵜ ⵓⵎⵉ ⵏⵉⵜⵏⵉ ⵄⴰⴷ ⴷⵉ ⵜⴻⵎⵥⵉ, ⵎⴰⵖⴰⵔ ⴷⴷⴰⵔⴻⵏ ⵊⴰⵔ ⵉⵎⴻⵜⵍⴻⵢⵢⴻⵏ. 15 ⴰⴷ ⵉⴼⴻⴽⴽ ⴰⵎⴻⵣⵍⵓⴹ ⴷⵉ ⵍⴻⵖⴱⴻⵏ ⵏⵏⴻⵙ, ⴷⵉ ⴷⴷⴻⴵ ⴰⴷ ⵢⴰⵔⵣⴻⵎ ⴰⵎⴻⵣⵣⵓⵖ ⵏⵙⴻⵏ. 16 ⴰⵎⵎⵓ ⵉ ⵖⴰ ⵉⵄⴰⵔⵔⴻⵏ ⵓⵍⴰ ⴷ ⵛⴻⴽ ⵣⴻⴳ ⵡⵓⴹⵓⴼ ⵏ ⵍⴻⵃⵚⴰⵔⴻⵜ, ⵖⴰⵔ ⵜⵜⴰⵙⵉⵄ ⵎⴰⵏⵉ ⵡⴰⵔ ⵉⵜⵜⵉⵍⵉ ⵄⴰⴷ ⵓⵏⴻⴷⵇⴻⴼ, ⵎⴰⵏⵉ ⵉ ⵖⴰ ⵜⵉⵍⵉ ⵟⵟⴰⴱⵍⴰ ⵏⵏⴻⵛ ⵜⴻⵛⵛⵓⵔ ⵙ ⵎⴰⵛⵛⴰ ⵉ ⴷⴰⵢⴻⵙ ⵜⴰⴷⵓⵏⵜ. 17 ⵎⴰⵛⴰ ⵛⴻⴽ ⵜⴻⵏⵏⵓⵖⴻⴷ ⴷⵉ ⵛⵛⵔⴻⵄ ⴰⴽ-ⴷ ⵓⵄⴻⴼⴼⴰⵏ, ⵎⴰⵛⴰ ⴷⴷⴻⵄⵡⴻⵜ ⴷ ⵜⴻⵏⴼⵓⵍⵜ ⵜⵜⴰⵙⴻⵏⵜ-ⵉ-ⴷⴷ ⴰⴽ-ⴷ ⵡⴰⵢⴰⵡⴰⵢⴰ. 18 ⵃⴹⴰ ⴰⵇⴰ ⴰⵙⵄⴰⵔ ⵡⴰⵔ ⵛⴻⴽ ⵉⵜⵜⵖⴰⵔⵔⵉ ⵉ ⵓⵙⵜⴻⵀⵣⵉ ⵓ ⵍⵇⴻⴷⴷ ⵏ ⴷⴷⴻⵢⵢⴻⵜ ⵡⴰⵔ ⵛⴻⴽ ⵉⵙⵙⵓⴼⴼⵓⵖ ⵣⴻⴳ ⵡⴻⴱⵔⵉⴷ. 19 ⵎⴰ ⵉⵖⵓⵢⵢⴰⵏ ⵏⵏⴻⵛ ⴰⴷ ⵛⴻⴽ ⵙⵙⴰⵔⴻⵏ ⵣⵉ ⵍⴻⵃⵚⴰⵔⴻⵜ, ⵏⵉⵖ ⵎⴰⵔⵔⴰ ⵎⵉⵏ ⵜᵉⵜⵜⴻⴳⴳⴻⴷ ⵙ ⵎⴰⵔⵔⴰ ⵜⵉⵣⴻⵎⵎⴰⵔ ⵏⵏⴻⵛ? 20 ⵡⴰⵔ ⵜⵜⵎⴻⵥⵔⵉ ⴷⵉ ⴵⵉⵍⴻⵜ, ⵅⵎⵉ ⵖⴰ ⵜⵜⵡⴰⴽⴽⵙⴻⵏ ⵍⴻⴳⵏⵓⵙ ⵣⴻⴳ ⵡⴻⵎⵛⴰⵏ ⵏⵙⴻⵏ. 21 ⵃⴹⴰ ⵉⵅⴻⴼ ⵏⵏⴻⵛ, ⵡⴰⵔ ⴳⴳⵓⵔ ⵅ ⵓⵖⴻⵣⴷⵉⵙ ⵎⴰⵏⵉ ⵉⵜⵜⵡⴰⴼⴼ ⵍⵖⴻⵛⵛ, ⴰⵇⴰ ⵛⴻⴽ ⴰⴷ ⵜⵉⵅⴷⴰⵔⴻⴷ ⴰⵢⴰ ⵅ ⵡⴰⴹⴰⵔ. 22 ⵅⵣⴰⵔ, ⴰⵔⴻⴱⴱⵉ ⵉⵙⵙⵄⵓⴵⴰ ⵙ ⵊⵊⴻⵀⴷ ⵏⵏⴻⵙ, ⵎⴰⵏ ⵡⴻⵏ ⵉⴵⴰⵏ ⴷ ⴰⵎⵙⴻⵍⵎⴰⴷ ⴰⵎ ⵏⴻⵜⵜⴰ? 23 ⵎⴰⵏ ⵡⴻⵏ ⵉ ⴷ ⴰⵙ ⵉⵙⵙⵛⴰⵏⴻⵏ ⴰⴱⵔⵉⴷ? ⵏⵉⵖ ⵎⴰⵏ ⵡⴻⵏ ⵉ ⴷ ⴰⵙ ⵉⵏⵏⴰⵏ: ‘ⵛⴻⴽ ⵜⴻⴳⴳⵉⴷ ⵍⵖⴻⵛⵛ’? 24 ⵄⵇⴻⵍ ⴰⴷ ⵜⴻⵙⵙⵄⵓⴵⵉⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ, ⵍⵅⴻⴷⵎⴻⵜ ⵏⵏⴻⵙ ⵉ ⵣⵉ ⵜⵜⵖⴻⵏⵏⴰⵊⴻⵏ ⵉⵡⴷⴰⵏ. 25 ⴽⵓⵍ ⴱⵏⴰⴷⴻⵎ ⵉⵜⵜⵡⴰⵍⴰ ⵜⵜ, ⵣⵉ ⵍⴰⴳⴳⵯⴰⵊ ⵜⵜⵡⴰⵍⴰⵏ ⵜⵜ ⵉⵡⴷⴰⵏ. 26 ⵅⵣⴰⵔ, ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ, ⵡⴰⵔ ⵏⵣⴻⵎⵎⴰⵔ ⴰⴷ ⴰⵙ ⵏⴻⴼⵀⴻⵎ, ⵍⵇⴻⴷⴷ ⵏ ⵉⵙⴻⴳⴳⵯⵓⵙⴰ ⵏⵏⴻⵙ ⵡⴰⵔ ⵏⵣⴻⵎⵎⴰⵔ ⴰⴷ ⴷⴰⵢⴻⵙ ⵏⴰⵔⵣⵓ. 27 ⵎⴰⵖⴰⵔ ⵏⴻⵜⵜⴰ ⵉⵊⴻⴱⴱⴻⴷ ⵜⵓⴷⴷⵉⵎⵉⵏ ⵏ ⵡⴰⵎⴰⵏ, ⵜⵉⵏⵏⵉ ⴷⴷ-ⵉⵜⵜⵡⴰⴽⴽⵙⴻⵏ ⵣⵉ ⵜⴰⵢⵢⵓⵜ ⵅⴻⵏⵏⵉ ⴷⴻⵡⵍⴻⵏⵜ ⴷ ⴰⵏⵥⴰⵔ, 28 ⴰⵏⵥⴰⵔ ⵏⵏⵉ ⵣⵉ ⵜⵜⵏⴻⵙⵏⵉⵙⵉⵏ ⵉⵙⴻⵢⵏⵓⵜⴻⵏ, ⴰⵏⵥⴰⵔ ⵏⵏⵉ ⴷⴷ ⵉⵡⴻⵟⵟⴰⵏ ⵙ ⵓⴼⴻⵢⵢⴻⴹ ⵅ ⵉⵡⴷⴰⵏ. 29 ⵎⴰⵏ ⵡⴻⵏ ⵉⵜⵜⵃⴰⴽⴰⵏ ⵄⴻⵎⵎⴰⵔⵚ ⴷⴻⴳ ⵓⴱⴻⵣⵣⴻⵄ ⵏ ⵉⵙⴻⵢⵏⵓⵜⴻⵏ, ⵓⵍⴰ ⴷ ⵍⵃⴻⵙⵙ ⵉⵙⵙⴻⴳⴳⵡⴰⴷⴻⵏ ⵣⵉ ⵜⴻⵅⵣⴰⵏⵜ ⵏⵏⴻⵙ? 30 ⵅⵣⴰⵔ, ⵉⵜⵜⴱⴻⵣⵣⴻⵄ ⵜⴰⴼⴰⵡⵜ ⵏⵏⴻⵙ ⵜⵉⵡⴰ ⵏ ⵢⵉⵅⴻⴼ ⵏⵏⴻⵙ, ⵉⵜⵜⵍⴻⵃⵃⴰⴼ ⵣⵣⴰⵢⴻⵙ ⵟⵟⵍⵓⴼⴰ ⵢⵓⴵⵖⴻⵏ ⵇⴰⵄ ⵏ ⵍⴻⴱⵃⴰⵔ. 31 ⵎⴰⵖⴰⵔ ⵙ ⵓⵢⴰ ⵉⵜⵜⵛⴰⵔⵔⴻⵄ ⵍⴻⴳⵏⵓⵙ. ⵉⵜⵜⵉⵛⵛ ⵎⴰⵛⵛⴰ ⵙ ⵡⴰⵟⵟⴰⵙ. 32 ⵉⵜⵜⵛⵓⵔⵔⴰ ⵉⴼⴰⵙⵙⴻⵏ ⵏⵏⴻⵙ ⵙ ⵜⴼⴰⵡⵜ, ⵉⵡⴻⵚⵚⴰ ⵜⵜ ⴰⴷ ⵜⴻⵍⵇⴻⴼ ⵜⴰⵏⴷⴰⵢⵜ. 33 ⴰⴹⴰⵔⴹⴻⵃ ⵏ ⵡⴰⵙⵙⴰⵎⴻⵏ ⵉⵜⵜⴱⴰⵔⵔⴻⵃ ⵣⵣⴰⵢⴻⵙ, ⵓⵍⴰ ⴷ ⵜⴰⵃⵉⵎⴰⵔⵜ ⵜᵉⵜⵜⴱⴰⵔⵔⴻⵃ ⴰⵇⴰ ⵏⴻⵜⵜⴰ ⴰⴷ ⴷⴷ-ⵢⴰⵙ.