Англунимос ла люмако 22
VLA1 Прожыля сави-то время, тай о Дэл закамля тэ продикхэл патямос лэ Авраамоско. Вов пхэндя лэсти: — Авраамо! — Мэ катэ, — пхэндя о Авраамо.
2 О Дэл пхэндя: — Лэ терэ екхэ шавэс лэ Исаакос, савэс ту камэс, тай жа каринг э пхув Мориа, ан лэс котэ андэ жэртва тай спхабар лэс по плай, пэ саво Мэ тути сыкавава.
3 Пэ авэр дес кати кай э тэсара о Авраамо ущиля, стходя э зэн по осло, ля пэса дуен бутярнэн тай лэ Исаакос, пошындярдя э кашта важ э яг важ э жэртва и жыля каринг кодыва тхан, пала саво пхэндя лэсти о Дэл.
4 По трито дес о Авраамо вазгля э якха и додихкля дэ дурал кодыва тхан.
5 Вов пхэндя лэ бутярнэнди: — Ашэнпэ катэ лэ ослоса, ай амэ лэ шаворэса жаса инчя тэлюваса лэ Дэвлэсти, ай тунче рисайваса тумэндэ.
6 О Авраамо ля э кашта важ э яг важ э жэртва и стходя лэн по думо лэ Исаакости, ай екжэно андярэлас э яг тай э шури, и вонэ дуйжэнэ жылэтар андо дром.
7 О Исаако пхэндя пэсти дадэсти лэ Авраамости: — Дадэ! — Со, мэрно шаво? — пхэндя о Авраамо. — Амэндэ исы э яг тай э кашт, — пхэндя о Исаако. — Ай кай жэ о бакроро важ э жэртва?
8 О Авраамо пхэндя: — О Дэл Екжэно аракхэла Пэсти бакрорэс важ э жэртва, мэрно шаво. Вонэ дужэнэ жылэ майдур.
9 Кала вонэ дожылэ каринг о тхан, пала саво пхэндя лэсти о Дэл, о Авраамо стердя котэ жэртвенико и стходя пэр лэстэ э кашта. Вов спхангля пэстерэ шавэс лэ Исаакос тай стходя лэс по жэртвенико упрал пай кашта.
10 Вов процырдя о васт тай ля э шури, соп тэ зашынэн пэстерэ шавэс.
11 Ай о Янголо лэ РАЕСКО узвисайля лэстэ па нэбо: — Авраамо! Авраамо! — Мэ катэ, — пхэндя вов.
12 — На ваздэ о васт по шаворо, — пхэндя Вов, — на тер лэса нисо. Мэ акана ганав, со ту дарас лэ Дэвлэстар, пала кода со ту на тынгосардян важ Мандэ терэ шавэс, терэ екхэс шавэс.
13 О Авраамо вазгля э якха и додикхля бакрэс, саво запхандиляпэ лэ рогонэнца андо бур. Вов жыля, ля лэ бакрэс тай андя лэс андэ жэртва пхабаримаса пала шаво.
14 О Авраамо дя алав колэ тханэсти Яхва-Ирэ , пала кода и екхатар пхэнэн: «По плай лэ РАЕСКО аракхэлапэ».
15 О Янголо лэ РАЕСКО узвисайля каринг о Авраамо па нэбо инке екхвар
16 и пхэндя: — Кадя пхэнэл о Дэл: солахав Екжэно Пэса, сар ту стердян када тай на тынгосардян важ Мандэ терэ екхэ шавэс,
17 Мэ чячэс бахталисарава тут тай стерава терэ бэятонэн фартэ бут, сар э чергая по нэбо, сар о чишай пэ пхув катар э море, и терэ бэяцэ залэна э форуря пэстерэ ворогонэнди.
18 Пала кода со ту патян Манди, саворэ мануша пэ пхув лэна бахталисардэ па терэ бэяцэ.
19 Тунче о Авраамо рисайля каринг пэстерэ бутярнэ, тай екхтанэ жылэтар андэ Вирсавия. О Авраамо ашыляпэ тэ жувэл андэ Вирсавия.
20 Прожыля время, и лэ Авраамости пхэндэ: — Э Милка, ашыля дэй, андя шавэн терэ пхралэсти лэ Нахорости:
21 лэ Уцос, лэ англунос, лэ Бузос, лэсти пхралэс, лэ Кемуилос, лэ Арамостерэ дадэс,
22 лэ Кеседос, лэ Хазос, лэ Пилдашос, лэ Идлафос тай лэ Бетуилос.
23 О Бетуило ашыля дад ла Ревэкако. Калэн охто шавэн э Милка андя лэ Авраамостерэ пхралэсти лэ Нахорости.
24 Лэсти копэльница-ромни Реума андя лэсти шавэн: лэ Тавахос, лэ Гахамос, Тахашос тай Маахас.