Англунимос ла люмако 23
VLA1 Э Сарра прожудя шэл биш ефта бэрша.
2 Вой муля андо Кирьят-Арба (када исы Хевроно), андэ пхув Ханаано, и о Авраамо авиля тэ грижойпэ тай тэ ровэл палай Сарра.
3 Тунче о Авраамо отжыля катар э мули ромни тай пхэндя лэ хетеенди:
4 — Мэ машкара тумэндэ сым авря пхуятар. Битинэн манди котор пхув важ о прахомос, соп мэ тэ прахой ла муля.
5 Э хетея пхэндэ лэ Авраамости:
6 — Хулай, ашун, ту — Дэвлэско рай сан машкара амэндэ. Прахосар теря муля по майлашо амаро прахомаско тхан. Ни екх амэндар на отпхэнэна тути о прахомаско тхан, соп тэ прахос теря муля.
7 Тунче о Авраамо ущиля тай тэлиля лэ манушэнди кодыла пхуяти, лэ хетеенди.
8 Вов пхэндя лэнди: — Сар кай тумэ камэн, соп мэ тэ прахой мэрня муля, тунче ашунэн ман тай помангэн важ мандэ лэ Эфронос, лэ Цохаростерэ шавэс,
9 соп вов тэ битинэл манди э пещера Махпела. Вой сыни по бряго пэ лэстери мал. Мэк битинэл ла манди важэ лащи цэмин, сар прахомаско тхан.
10 О хетеё о Эфроно бэшэлас машкара пэстерэ мануша тай пхэнэл лэ Авраамости англа саворэ хетея, савэ авилэ каринг лэ форостерэ вудара.
11 Вов пхэндя: — Най, мэрно хулай, ашун ман. Мэ отдав тути э мал тай э пещера, сави исы пэр латэ. Мэ отдав тути кадя англа мэрнэ мануша. Прахосар теря муля.
12 О Авраамо упалэ тэлиля лэ манушэнди кодыла пхуяти
13 тай пхэндя лэ Эфроности англа лэндэ: — Ашун жэ и ту ман, мангав тут. Мэ потинава ла маляти цэмин. Лэ мандар ла, соп мэ тэ прахой котэ ла муля.
14 О Эфроно пхэндя лэ Авраамости:
15 — Ашун ман, мэрно рай: цэмин ла пхуяти штаршэла шэкеля рупэса — када со бут важ тутэ чи важ мандэ? Прахосар теря муля.
16 О Авраамо допхэндяпэ лэ Эфроноса тай потиндя лэсти э цэмин важ э мал, сави вов пхэндя англай хетея: штаршэла шэкеля рупэса, сар онгичэлпэ машкара э битинимаря.
17 Кадя лэ Эфроности мал андо Махпела пашай Мамрэ, э мал тай э пещера пэр латэ, тай саворэ кашта па брягуря ла маляти ся ашылэ
18 лэ Авраамостерэ англа саворэ хетея, савэ авилэ каринг лэ форостерэ вудара.
19 Пала када о Авраамо прахосардя пэстеря ромня ла Сарра андэ пещера пэ мал Махпела пашай Мамрэ (кай сын Хевроно), андэ пхув Ханаано.
20 Кадя э мал тай э пещера пэр латэ лэ хетеендар ашылэ лэ Авраамостерэ, сар прахомаско тхан.