1 Corinthians 5

1 Sorasora mo lo vano vara posposi maji mo lo toho isamim, ale posposi maji sei mo sopo te tamlohi rÌorÌoha i erÌi majinga hinia vara tea i erÌi vaia sohena, matan tamlohi matea mo lo lavi na naroun tamana, 2 ale kamim ka rÌomaulu pani rÌomimim mo sopo sati mata sava? Ha tau narÌihi tamlohi atu mo lo vai posposi atu na livuhamim. 3 Matan hina purongo vara na sopo toho peresi kamim nake, noku rÌomrÌomi mo lo toho isamim, na pete sile na talai moiso isan haratu sei mo vai posposi atu. 4 Vara ha matavuhi na hijan Moli Iesu, ale noku rÌomrÌomi i pa lo toho peresi kamim na suihan norÌa Moli Iesu, 5 ha pa sile tamlohi nike na liman Setan matan vara i komo na epena, matan vara maurina i pa juri na rani aria non Moli. 6 Nomim hapahapa mo sopo tataholo. Ka sopo levosahia vara ha tau na makomo isi na flaua, i pa vai na flaua i sosohi vevuhi? 7 Ha tau narÌihi na flaua tuai isi mo lo toho hinia, matan vara ha pa mai flaua paro, matan kamim ka flaua paro vararÌuhu. Matan la sile KrÌisto norÌa natu sipsip mata Passover, KrÌisto, enia malamalai atu mo mate matarÌa. 8 Mo rÌuhu vara rÌa matavuhi mata hanhani Passover, mo sopo peresi na flaua tuai isi mo lo toho hinia, isi atu enia posposi vaisatihi na tinapua, ale enia hina sasati, pani rÌa pa hani pereti atu mo sopo te isi hinia, pereti atu enia mauri vokevoke peresi na retivararÌuhu. 9 Na uliuli isamim moiso na noku leta vara ha pa sopo tapala peresi na tamlohi la lo vai na posposi maji, 10 na sopo rÌarami la haratu non varama la sopo tatuarÌa sei la lo vai na posposi maji, teni la haratu rÌomrÌomi harÌivi mo lo vilira, teni la haratu la lo vavanaho, teni la haratu la lo lotulotu vono. Matan, vara na lo verea sohena, ha pa malue hin varama nike vara ha erÌi toho asau hinira. 11 Pani nakerihi na lo uliuli isamim vara ha sopo pulutahi peresi tea sei mo verea vara mo vorai rasua vara mo jovi na posposi maji, teni na rÌomrÌomi harÌivi, teni mo lotulotu vono, teni mo lo hiterÌesirÌesi na tinapua, teni mo lo putu na wai rÌilangi tarea, teni mo tamlohi halu, ale ha pa sopo sakele vara ha hanhani matavuhi peresi tea vara mo sohena. 12 Matan mo sopo noku hinau vara a ari na tamlohi la sopo rasua. Pani enia nomim hinau mata ari la haratu na lolo vao kalesia. 13 God i pa ari la haratu la sopo tamlohi rasua ale mo verea mara, ‘Ha tipahi narÌihi na tamlohi hehe sasati na livuhamim!’ Deut 17.7; 19.19