1 Peter 2

1 Matan haratu, ha tau narÌihi na posposi vaisatihi na tinapua tari, posposi halu tari, tapnetano, rÌomusuri peresi na retirÌerÌen tari, 2 ale sohena pipi matea mo pa vora, ha pa marÌohu matan wai susu vararÌuhu atu Tanumen God mo lo silea, matan vara hinia, ha pa ulua na mauri rÌuhu sei ka juri hinia, 3 vara vararÌuhu ka inu rongorongo na rÌomrÌuhu non Moli moiso, 4 ale ka lo mai isan KrÌisto. Enia natu, vatu atu mo mauri, tamlohi la tipahia, pani God mo virÌonia, mo rÌuhurÌuhu jea, 5 kamim sohena, ka sohena vatu sei la mauri, God mo voro kamim sohena iman Tanume Tapu matea, matan vara ha pa vao prÌis tapu matea mata sile na silesilea sei God mo avulahi hinira hin Iesu KrÌisto. 6 Matan Retitapu mo lo verea vara, ‘Ka hitea, enau na lo tau na vatu matea hin Zion, enia tapulo pulo vatu sei na virÌonia, mo rÌuhurÌuhu jea, ale sava tamlohi mo tau na nona rasua hinia, rÌomina i pa sopo erÌi jovi hin te pongi matana.’ Isa 28.16 7 Ale matan haratu, isamim ka lo rasua, enia mo rÌuhurÌuhu jea, pani isan la haratu la sopo rasua, Retiulia mo lo verea vara, ‘Vatu atu tamlohi voro ima la tipahia, enia mo mai tapulo pulo vatu mata ima.’ Psa 118.22 8 Ale, ‘Tamlohi la pa tialahalaha hinia, enia vatu mata vai na tamlohi la jovi hinia.’ Isa 8.14 La tialahalaha hinia matan la sopo oloolo na nona reti, la jovi sohen haratu matan God mo taua sohena matara moiso. 9 Pani kamim vao tamlohi matea God mo virÌoni kamim isana vao tamlohi tinatinapua, ka vao prÌis matea la supe, ka vao tamlohi tapu matea, ka vao tavera matea God mo tapuhi kamim vara nona, matan vara ha pa vereuli na nona vavahinau rÌuhurÌuhu matuvana, enia mo tovi kamim ka malue na rÌorÌoha, ale ka mai na nona malarani rÌuhurÌuhu. 10 ‘Tiroma ka sopo nona vao tamlohi matea, pani nake, ka tamlohi non God, tiroma ka sopo lavi te rÌomopoia, pani nake, ka lavi na rÌomopoia non God.’ Hos 1.6, 9; 2.23 11 La tapalaku rÌuhurÌuhu, kamim ka sohena vinano hin varama nike, ale na lo retituetueni kamim hinia vara ha toho asau na masalo sasati sei mo lo vai na vuro na maurimim. 12 Ha vai na posposi tataholo na naho tamlohi rÌorÌoha, hina purongo vara la pa verea vara kamim tamlohi sasati, matan la pa hite na nomim vavahinau rÌuhu, ale la pa tahe na hijan God aulu matana hin pongi atu vara mo pala. 13 Ha vai Moli i avulahi tarea na nomim oloolo na tamlohi tari la aulu, vara isan te Supe nona mara Rome sei mo lo tauri na suiha, 14 teni isan te nona tamlohi tatavera sei mo lo rÌulera vara la sile na talai isan la haratu la vai te hehe, ale vara la sile na hasohaso isan la haratu la vai te vavahinau rÌuhu. 15 Matan enia masalon God, vara ha vai na vavahinau rÌuhu matan i pa horo na rÌomvono non la haratu la rongorongo vono. 16 Ha lo toho sohena tamlohi materi, pani ha sopo rÌomrÌomia vara enia masapa matea mata vai te hina hehe, pani ha lo toho sohena volitusi non God. 17 Ha sile na oloolo isana tamlohi tari, ha opoi la haratu la rasua, ale ha matahun God, ha sile na oloolo isan supe matan Rome. 18 Volitusi, ha hase tau kamim na liman nomim tamlohi tavera na nomim oloolo tari, mo sopo isan la haratu la rÌuhu teni la rÌommalum purongo, pani isan la haratu la tamlohi rÌilangi sohena. 19 Matan God mo avulahi hin kamim matan nomim rÌomrÌomi hin God mo vai kamim ka lo turu rÌilangi na rani ka lo lavi na rani rÌilangi mata nora posposi rÌilangi sei mo sopo matan te hinau ka vai mo sati. 20 Ka hite na sava hinau mo rÌuhu hinia vara ka lo turu rÌilangi na rani ka lavi na talai matan te nomim hehe? Pani vara ha vai na vavahinau rÌuhu, ale ha lavi na rani rÌilangi matana, pani ka turu rÌilangi hinia, haratu natu, God mo avulahi hin kamim matana. 21 God mo tovi kamim matan harihi, matan KrÌisto sohena mo lavi na rani rÌilangi matamim, mo tau na tovongi matea vara ha pa erÌi usuri na palona, 22 enia mo sopo vai te hehe teni te halu i malue na jingona. 23 Na rani la lo veresasatia, mo sopo kelera, ale na rani la silea na rongohaji, mo sopo talaira, pani tarea mo lo hase taua na liman God sei mo lo ari tataholo tarea. 24 Enia mo hasena lavi narÌihi na norÌa hehe na epena hin rani atu mo sevu na talopeilopei matan vara rÌa pa mate na norÌa mauri hehe, ale rÌa mauri na posposi tataholo. Ka mai ka rÌuhu matan rongohaji atu mo lo lavia na epena. 25 Matan kamim ka jalio sohena sipsip, pani nake ka mele mai isan tavuimim, enia haratu mo lo matahi na maurimim.