1 Timothy 3

1 Reti nike o erÌi rasua, vara tea mo tau na rÌomina vara i pa patu tamlohi rasua matea mata tamlohi rasua, mo opoi na vavahinau rÌuhu matea. 2 Ale matana, o kilau vara mo sopo te hinau na maurina, mo lahi na harÌai matelete, mo hase taurilatia, enia tamlohi rÌomrÌomi, o hitea vara tamlohi la lo sile na oloolo isana moiso, enia mo avulahi vara i lavi na tamlohi tinapua na imana, ale enia mo levosahi na posposi mata vujangi mo rÌuhu, 3 Ale, enia mo sopo tamlohi inu hajavua, mo sopo tamlohi valum, pani rÌomina mo malum, mo sopo tamlohi vasvas, ale mo sopo tamlohi rÌomjea na mania, 4 ale mo lo kilau mamahuni na lolo imana, ale natuna la sile na oloolo isana, ale la oloolo hinia. 5 Matan vara tea mo sopo erÌi kilau mamahuni na imana, i pa kilau mamahuni na vao kalesia non God sohena sava? 6 Enia i pa sopo tamlohi matea mo pa mai purongo na mauri kalesia, matan patuna i pa sosohi na mangisi tavera, ale i jovi sivo na talai non Tiapolo. 7 Moiso aulu hin haratu, tamlohi na jingoima la verea vara maurina mo tataholo, ale matan i sopo erÌi jovi hin te vuna non Tiapolo, ale i mahanuhanu matana. 8 Deacon sohena, o hitea vara tamlohi la lo sile na oloolo isara moiso, ale enira la sopo meme masanga, la sopo tamlohi inu hajavua, la sopo rÌomtutuni na mania. 9 Ale la tauri rÌilangi na hinau luhu mata rasua na posposi sei tarea rÌomira la tataholo na nahon God. 10 Ale o vaihitera tiroma vara ko sopo hite te hinau na maurira, ale o pa majinga hinira vara la volitusi sohena deacon. 11 HarÌai sohena, vara la deacon, o hitea vara tamlohi la lo sile na oloolo isara moiso, la sopo sorasora tamlohi, la lo hase taurilatira, tarea la lo usuri na masalon God na hinau tari la lo vaira. 12 Deacon la lahi na harÌai matelete, la lo kilau mamahuni na natura peresi na imara. 13 Matan la haratu la lo volitusi rÌuhu sohena deacon la pa lavi na hija rÌuhu nora, ale la pa lavi na rÌomrÌilangi na nora rasua hin KrÌisto Iesu. 14 La hinau sei na lo ulia isam, na lo rÌomtoho vara a pa vano isam vila, 15 pani vara te hinau mo tauriau, leta nike i pa tueniho vara o levosahi na posposi mo tataholo na vaon God. Vaona enia vao kalesia non God mauri, vao kalesia enia peri, ale enia lapiti retivararÌuhu. 16 Hina tavera matea kama taviti hinia, pulo norÌa rasua enia hina luhu matea: KrÌisto, mo pala mo mai tamlohi, Tanume Tapu mo vujangia vara enia natu KrÌisto, angelo la hitea, ale tamlohi la vereulia na mara jara tinatinapua tari, moiso tamlohi na varama la rasua, ale God mo lavia mo sahe aulu na hasohaso na tuka.’