2 Corinthians 4

1 Matan haratu, matan kama lavi vavahinau nike usuri na rÌomopoia non God, rÌomimam la sopo erÌi jovi. 2 Pani kama rÌohu na hina luhu mata mahanuhanu, ale kama sopo vaihitea vara kama halu tea teni kama sopo posileji na reti non God. Pani kama lo retivujavujangi na retivararÌuhu na jara tavera matan vara tamlohi la pa hitevosahia vara kama lo vararÌuhu na nahon God. 3 Pani hina purongo vara God mo tavuhoro na norÌa RetirÌuhu, mo tavuhoro purongo isan la haratu sei la pa tihai sei, 4 Setan, god matan varama nike, mo vusohi na rÌomin la haratu sei la sopo rasu, ale la pa sopo erÌi hitevosahi na meran RetirÌuhu sei non KrÌisto â enia niniun God tataholo. 5 Kama sopo retivujavujangi hin kamam hasemam, pani hin Iesu KrÌisto sei enia Moli, ale kama verea vara kamam nomim slev mata sava Iesu mo vaia matamam. 6 Matan God sei mo verea mara, ‘Malarani i mera na rÌorÌoha.’ Gen 1.3 enia haratu sei mo lo mera na mapurÌa matan vara i silerÌa na mera mata lelevosahi rÌuhurÌuhu non God rÌa hitea na maurin Iesu KrÌisto. 7 Pani kama lo lavi la hina rÌuhurÌuhu nike na jilivi lepa purongo, matan vara suiha tavera sei tamlohi la erÌi hitea mo lo malue hin kamam mo sopo nomam pani non God hasena. 8 Kama lo lavi na rani rÌilangi na malele tari, pani la sopo lomolomo kamam. Kama sopo levosahia vara kama pa vai na sava, pani kama sopo hilu atu, 9 la tipahi kamam, pani God mo sopo rovo hin kamam, la vili sati kamam, pani kama mele turu. 10 Kama lo lavi na rani rÌilangi tarea na epemam hin mauri nike, ale la lo lavi na rÌungara mata mateia non Iesu matan vara tamlohi la pa erÌi hite na maurin Iesu na epemam. 11 VararÌuhu kama lo toho tarea na matarua mateia matan kama lo volitusi isan Iesu matan vara maurin Iesu i pa mera na jara tavera na epemam sei mata mate. 12 Matana, kama lo nahoi na mateia, pani vuana enia nomim mauri tui tui. 13 Pani kama pa lo retivujavujangi matan nomam rasua mo tataholo na sava la ulia na psalm mara, ‘Na rasua, ale matana, na pa retireti.’ Psa 116.10 Ale kamam sohena, kama rasua, ale matana, kama pa retireti. 14 Kama pa vaia sohena matan kama levosahia vara God sei mo sauteterahi Iesu, i pa lavi kamam peresi kamim rÌa turu na nahona. 15 Hinau rÌilangi kama lo lavira na maurimam nake enira mata la tueni kamim. Ale sohen rÌomrÌuhu non God mo lo lavi na tamlohi matuvana la lo mai isan KrÌisto, tamlohi la pa mele hasohaso God i tavera jea. 16 Enia matan haratu natu mo vaia kama sopo hilu taleu. Hina purongo vara suiha epemam mo lo majara, pani maurimam la lo ulua na rani hatehateahi. 17 Hina purongo vara rÌa hite na norÌa rani rÌilangi matan nake sohena hina tavera, pani enira la varihi purongo matan enira mata makomo rani purongo. RÌa levosahia vara norÌa rani rÌilangi nake la pa silerÌa na hasohaso tavera sei i pa toho jejeu hin mauri atu mo lo mai. 18 Ale rÌa sopo rÌomrÌomi na norÌa rani rÌilangi matan nake, mo vono, pani rÌa lo kilau toho mata hinau rÌa sopo erÌi hitera. Matan sava sei rÌa erÌi hitera, enira la pa toho mata makomo rani purongo, pani sava rÌa sopo erÌi hitera la pa toho jejeu.