John 7

1 Iesu mo hahau rÌalihi Galilee, pani mo sopo vano mariviti Judea matan tamlohi tavera nona Jew la opoia vara la vilimateia. 2 Hanhani tavera nona Jew la tovia Tabernacle, pongina mo lo mai mariviti. 3 Ale tasin Iesu la lo verea isana lara, “O vano Judea matan vara nom tamlohi usuri la pa erÌi hite na nom matamata tavera sei ko lo vaira. 4 Vara tamlohi matea mo opoia vara tamlohi la levosahia, i pa turu na naho tamlohi, i pa sopo jarohi na nona vavahinau. Vara ko lo vai la hinau atu vararÌuhu, mo rÌuhu vara o vai na nom vavahinau na naho tamlohi." 5 Tasina sohena la sopo lo rasua. 6 Pani Iesu mo rÌaramira mara, “Noku pongi mo sopo lo mai, pani kamim ka tatamahu na rani tari. 7 Tamlohi varama la pa sopo tipahi kamim, pani la pa tipahiau matan na lo vereuli na nora sasati la lo vaira. 8 Kamim hasemim, ha sahe hin hanhani tavera atu. A pa sopo sahe nakerihi matan noku pongi mo sopo lo pala vevuhi." 9 Iesu mo vere hinau atu, ale mo lo toho atu Galilee. 10 Ale tasin Iesu la sahe hin hanhani tavera atu, Iesu mo pa lo sahe hitahu, tea mo sopo levosahia. 11 Hin hanhani tavera atu tamlohi tatavera nona Jew la lo ale Iesu lara, “Enia nene?" 12 Vao tamlohi atu sohena la lo vasvas matana. Hai lara, “Iesu enia tamlohi rÌuhu matea.” Ale hai lara, “Enia mo lo halu na tamlohi." 13 Pani tamlohi la matahuni na tamlohi tatavera nona Jew ea, ale la sopo sorahi Iesu na naho vao. 14 Na sope rani matan hanhani tavera atu, Iesu mo unu na Temple, ale mo tapulo vujangi. 15 Tamlohi tavera nona Jew la marÌurahi hinia, ale lara, “Tamlohi nike, mo pa patuha sohena sava? Tea mo sopo vujangia!" 16 Iesu mo rÌaramira mara, “Enau na sopo vujangi na sava vara a haseku rÌomrÌomia. Sava na lo vujangia mo tai isan haratu mo lo rÌuleau. 17 Vara ha pa lo opoia vararÌuhu vara ha oloolo hin God, ha pa levosahia vara enau na lo vujangi na sava mo tai isan God, pani mo sopo isaku haseku. 18 Haratu mo opoia vara tamlohi la sile na oloolo isana matan mo lo rÌomrÌomia vara nona retireti mo tai isana hasena enia hapahapa, pani haratu sei mo opoia vara i sile na oloolo isan haratu mo lo rÌulea, enia tamlohi matea mo lo vere na vararÌuhu, ale mo sopo te hehe isana. 19 Moses mo sile kamim na Leu teni mo vono? Pani mo sopo te vonamim hatea i oloolo hinia! Ka opoia vara ha vilimateiau mata sava?" 20 Vao atu la rÌaramia lara, “Ko putu! Sava tanume mo unu hiniho mo vaiho ko rÌomia vara tea mo opoia vara i vilimateiho?" 21 Iesu mo rÌaramira mara, “Enau na vai na matamata tavera matea purongo, ale kamim mo isoiso ka marÌurahi tavera hinia. 22 Moses mo retileu vara ha pa tairÌalihi na natumim, pani retileu atu mo sopo tai isan Moses, mo tai isan pimim tuai atu Abraham, pani nake kamim ka lo tairÌalihi na natumim na Sabbath, 23 Ale vara ha tairÌalihi te tamlohi hatea na Sabbath matan vara ha pa sopo tope na Leu non Moses, mata sava ka lo lolokoru hiniau matan enau na lo vai na tamlohi rojoa epena tari la mele rÌuhu na Sabbath? 24 Ha sopo ari na tamlohi na nomim kilakilau purongo! Ha ari na malele tataholo." 25 Mara Jerusalem hai, la lo verea lara, “Avei, mo sopo tamlohi nike natu, sei la lo vaihitea vara la pa vilimateia? 26 Pani enia nahai! Mo lo retireti isana naho vao, pani la sopo vere te hinau hatea isana, la tamlohi tavera nike la toma? Korong la pa hitevosahia vara enia natu, KrÌisto atu? 27 Pani tamlohi nike, enrÌa rÌa levosahi na jarana, pani hare i pa levosahi na sava jara KrÌisto i pa tai hinia?" 28 Iesu mo lo vujangi na lolo Temple atu, ale mo ulo mara, “Kamim ka rÌomi vara ka levosahiau, ale sava jara na tai ea. Enau na sopo mai na masaloku. Haratu mo rÌuleau enia mo vararÌuhu, pani kamim ka sopo levosahia. 29 Pani enau na levosahi haratu mo lo rÌuleau, matan enau na tai isana." 30 Tatua tamlohi la vaihitea vara la taurilatia atu natu, pani pongina mo sopo lo masese. 31 Pani tamlohi matuvana hin vao atu la tau na nora rasua hinia lara, “Avei, vara KrÌisto atu i pala, ka rÌomi vara enia i pa erÌi vai te matamata tavera i jeu tamlohi nike?" 32 Pharisee lara la rongo na vao atu la lo ngutungutu hin Iesu moiso la pulutahi peresi na moli prÌis, ale la rÌule na police mata Temple atu vara la taurilatia. 33 Pani Iesu mo verea isara mara, “Enau a pa mele toho isamim i peravu makomona purongo, moiso enau a pa sahe isan haratu mo lo rÌuleau. 34 Ha pa aleau, pani ha pa sopo erÌi hiteau. Ha pa sopo erÌi vano na jara enau a pa vano ea." 35 Ale tamlohi tavera nona Jew la lo usiusira hinia lara, “Enia i pa vano epu vara rÌa pa sopo erÌi tapaia? Korong i pa vano hin te jara tinapua sei norÌa tamlohi la lo toho ea vara i vujangira peresi na mara Greek teni mo lo verea sohena sava sei?" 36 RÌaramin nona retireti atu, enia sava sei mo verea mara, “Ha pa aleau, pani ha pa sopo hiteau. Ha pa sopo erÌi vano na jara enau a pa vano ea." 37 Isoiso rani matan hanhani tavera atu, enia rani tavera matara, ale Iesu mo turu mo ulo aulu mara, “Vara tea mo marÌohu, i mai isaku i inu! Isa 55.1 38 Vara ha rasuau, i pa sohena Retitapu mo verea mara, ‘Wai mauri i pa roro malue na mapumim sohena wai roro matea’.” Isa 58.11 39 Iesu mo lo retireti hin Tanume Tapu atu God i pa silea i pa sopo tuai isan la haratu la rasua. God mo sopo lo sile na Tanumena isan tea matan Iesu mo sopo lo turu na nona mateia. 40 Tatuan vao atu la rongo Iesu mo vere hinau sei, ale lara, “Avei, enia natu, prÌovet atu Moses mo lo verea!” Deut 18.15 41 Tatuara lara, “Enia natu, KrÌisto atu!” Pani tatuara la lo verea vara, “KrÌisto atu i pa sopo erÌi tai Galilee! 42 Retitapu mo sopo verea vara KrÌisto atu i pa vora na vaon Supe David na vanua Bethlehem?” Psa 7.12; Mic 5.2 43 Vao tamlohi atu la tapulo hase asera matan Iesu. 44 Tatuara la opoia vara la taurilatia, pani tea mo sopo tau na limana hinia. 45 Police mata Temple la mele hilu lekoleko, la vano isana prÌis tatavera peresi na Pharisee, ale Pharisee la usi na police lara, “Mata sava ka sopo lavi Iesu i mai nike?" 46 La rÌaramira lara, “Tea mo sopo lo vujangi i sohen tamlohi atu." 47 Pharisee la kilau rÌalihi isara, ale lara, “Mo halu kamim sohera? 48 Avei, tea hin la haratu la lo tauri na suiha teni te Pharisee la rasua? 49 Ka levosahia vara la jararÌoha nike la sopo levosahi te hinau hatea na Leu. La lo toho na ruhuruhu lesati non God moiso." 50 Hin rani atu, Nicodemus mo lo toho peresira matan enia mo lo sakele na nora pulutahi, nona tamlohi tatavera atu, enia natu, tamlohi tiroma mo mai isan Iesu. Mo verea mara, 51 “Avei, norÌa Leu mo vara rÌa sopo erÌi sile na talai isan te tamlohi vavano rÌa sakele rÌa rongo na nona retireti tiroma matan vara rÌa pa levosahi na sava mo vaia." 52 Ale la verea isana lara, “Nicodemus, engko ko tai Galilee teni mo vono? O vano o evi na Retiulia! O sopo erÌi hitea vara te prÌovet hatea i pa tai Galilee!" 53 Ale tamlohi tari atu, la mele mule.