Guyeiti 130

1 Tɛɛ wo guyei. Ee, Ɠɔoɠɔ GALAGI, kidaaʋiligi zu nà wooɠulazu è ma, è ɓɔ bà. 2 Màliɠii, woilo gòo ma! Woilo, nà-maanɛɛnɛ wooiti ma ga pagɔ! 3 Ee, Ɠɔoɠɔ GALAGI, ni ɗa gi zona ga gá-vaaɠaaza golaiti, Màliɠii, ɓɛ ɠa a yɛ vulua? 4 Kɛlɛ è-ʋo ka ga maavaayɛgi, naa ɠa a kɛ, nu lua è ʋa. 5 Nà Ɠɔoɠɔ GALAGI maaɓɔunsu ga zìimaʋɛ pɛ, ta kìtogɛ daawooi ʋa. 6 Nà Maliɠii maaɓɔunsu, é leʋe maaɓɔungi ʋa nii salaʋusuiti ta ɗa bo, é lo sobui zeeli vai ʋa, ungo, é leʋe maaɓɔungi ʋa, nii salaʋusuiti ta ɗa bo, é lo sobui zeeli vai ʋa. 7 Ee, Izilayɛle nuɓusɛiti, à ɠito Ɠɔoɠɔ GALAGI ʋa! Mazɔlɔɔ Ɠɔoɠɔ GALAGI ɠa ga wooɠɛɠila GALAGI, unmɔɔgi ma zobogi kpein ka tɔun zea. 8 Toɠa a Izilayɛle unmɔɔ, é kula ná-faaɠaaza golaiti kpein su.