MARK 15

WBT

‹ Chapter 14 MARK — All Chapters Chapter 16 ›

1 Chaapi�ikiiman, faadaanao zowaunaanao baokopatinan kazowautapainao Jewnao tuma, na�iki tiichaapauzonao Moses kakinaori dau�u, na�iki ipai kootowapa-kidauzonao pidannao tuma. Ĩnaou�u naa baokopatan padi�itinpan kadimana�o ida�an na�apam kizi pasha�apatan uruu. Uruu dauna�an ĩdodotan Jesus anoba kida chain idi, na�iki�o ĩna�akan naazu Pilate di�iti. 2 Na�ia�a naa Pilate pishaanuzu, ukian Jesus ati, “Pugaru mishi Jewnao naobanaa king?” Jesus kian u�ati, “Na�apa�o kaiwuru�u pukianuz." 3 Udauna�an faadaanao zowaunaanao kian Jesus dau�an, “Usha�apatauzonii iriba oii kida�o aimaakan." 4 Udauna�an Pilate pishaan koshan Jesus, ukian u�ati, “Aonaa na�apam pukian pukazannaatin-kinaa nii? Puabata na�apam ĩparadan kida pudau�an." 5 Mazan aonaa na�apam Jesus kian powa�a. Uruu idi Pilate di�itinpan tuukii. 6 Ipai wunu, wuru kaawan dono�o baokopainapa-karuz (ĩnyukunuitapauzonuz da�i pakazannaatauzo-kao kamoon), Pilate kodita-kidauzonii bauda�apa pidan taraa-kizai iki, pidannao aipan kawana�ati da�i. 7 Uruu dono kaina�a�o pidannao mizaataakapauzonao tiwautauzo pawaatan Romannao pawiizi ai, na�iki ĩzowiinii pidannao; uruu idi ĩtaraa-kao. Ĩbii�i kaina�a pidan Barabbas kia�o u�uu. 8 Ipai kasaba�ukinpainao pidannao wa�atin Pilate kanaapu ati, ĩpishaan uruu ĩaipan ukodita-kidan bauda�apa taraapa-kariwai pidan, na�apa usha�apatauzonii kawana�ati ipai wunu. 9 Pilate pishaan ĩnao, “Uaiapa sha�a õmuudan na�iki õkodita-kidan wuru�u Jewnao naobanaaz?" 10 Uaitapan idi�o wuru�u faadaanao zowaunaanao kishauzin wuru�u ĩkaakapaanuz Jesus u�ati. 11 Mazan faadaanao zowaunaanao dyuudan ipai pidannao pishaan Pilate, ĩaipan Barabbas kodita-kida-kao. 12 Pilate kian koshan kasaba�ukinpainao pidannao ati, “Na�apam mooko uaipan õsha�apatan wuru�u Jewnao naobanaa, king ukii kiziz?" 13 Ipai ĩparadan diiwa�o ida�an koshan Pilate ati, ĩkian, “Marii utauka-kao Cross di�iti!" 14 “Kanom mooko oia�o nii usha�apatan?” Pilate kian. Powa�a zii manawun ĩdiwadan paparadan, ĩkian, “Marii utauka-kao Cross di�iti!" 15 Pilate aipan idi pakaimandan wuru�u iriba�oraz pidannao nyukunuu, uruu idi ukodita-kidan naa Barabbas ĩ�ati taraa-kizai iki. Uruu dauna�an udyuudan soldyaanao ba�izian Jesus atii shashota umada, na�iki udyuudan naa kapam ĩtaukanuzu Cross di�iti. 16 Na�iki�o soldyaanao morota-kidan Jesus Romannao dapunaa nazo iti, na�ii ĩdapadan ipai baokopa ba�oran soldyaanao. 17 Ĩkaiwada-kidan wuza�o chaakita Jesus ati, udauna�an ĩtoman kowamai kawanu�o kaiwada-karu kadunaa idi, udauna�an ĩmuudan naazu uzowau paawa ati. 18 Ĩbanikiitan Jesus kaikapa�a, ĩkian, “Pugaru King, umanawunu�o Jewnao naobanaa!" 19 Ĩba�iziinuzu pazowau an kida atamun idi, ĩsopiautapanuzu, ĩkodoru�ukan na�iki ĩdawukan ukanaapu ati. 20 Ĩipaian dauna�an pabanikiitan Jesus, ĩso�otan naa wuru�u wuza-za�oraz chaakita u�ai, ĩkaiwada-kidan ukamichan powaa iti u�ati. Uruu dauna�an ĩna�akan naa uruu, ĩtauka�anan naazu cross di�iti. 21 Ĩmakopa-kizi an ĩikodapan pidan Simon kia�o u�uu, Cyrene san, uruu Alexander na�iki Rufus daru. Soldyaanao dyuudan una�akan Jesus crossannaa. 22 Ĩna�akan Jesus Golgotha iti, (amazada Pidan-Zowau-Niwa�uz-naawa, kia�o wuru�u udakota-kao). 23 Na�ia�a naa ĩtiwaan patuza-kidan u�ati wine, kawiki�ita-kariwai kibia�o myrrh aiba idi, mazan aonaa Jesus tuzanuzu. 24 Udauna�an ĩtaukan naa Jesus cross di�iti. Udauna�an ĩbuutan naa ukamichan pakawana�ati kida, ĩmakinaotan makinaonii ĩtukapa�azon na�ia�oram nii kida, bauda�apa�o pidan zaamatan. 25 Doko�o za�ora�a naa kamoo chaapi�iki wuru�u ĩtaukanuz Jesus cross di�iti. 26 Kaina�a saada-kariwai ĩmanamikitin-kinaa, “Dii wuru�u King, Jewnao ati,” kii. 27 Na�a udazaba�a ĩtaukan kapam dya�utam koidimikinao, bauda�apa udiwa�oran antanapu na�iki ba�oran uwashabaron antanapu. 28 [Kaikapa�o ida�ana�a saada-kariwai kaarita ida�a�oraz mishiinan, “Oia�o pidan kawanu�o utukapa-kao,” kia�oraz.] 29 Pidannao dobaapainao kida udazaba an banikiitanuzu, ĩwa�uan pazowau, “Kasha�a!” ĩkian. “Pukian pukaboobi�ian nii Tominkaru Dapu, udauna�an pukadishita-kidan niizu idikinautan kamoo dauna�an. 30 Aizii putoka�a naa pucrossannaa di�iki pukazannaatina�a naa puaipan ati!" 31 Na�apa kapam faadaanao zowaunaanao, na�iki tiichaapauzonao Moses kakinaori dau�u banikiitan Jesus, ĩkiitaakapan pa�atiaaka kida, “Ukazannaata ba�oran pidannao, mazan aonaa turuu ukazannaatinan paaipan ati. 32 Watukapa kizi Christ, wuru�u king, Israelitenao naobanaaz tokan aizii Cross di�iki, uruu ida�an kizi wamishidan uruu!” Upu�u zii kapam wunao dakoopan uruu�u, tauka-kariwainaouz udazaba�a. 33 Sakitapa kamoo di�iki, ipai amazada maruta�akan, atii daawadata kamoo. 34 Udauna�an aka, uru�u naa Jesus kadakon diiwa�o ida�an. Ukian, “Eloi, Eloi, lema sabachthani?” Kaikapa�o wuru�u ukianuz: “�Tominkarun, õTominkarun, kanom nii aonaa punyukunuupan õgaru?" 35 Ba�orainao pidannao kadishitapainao udazaba�a abata wuru�u uparadanuz. Sariapa ĩkian, “Aushaa uabata, udapadan pa�ida�ati prophet Elijah." 36 Sariapa bauda�apa pidan dima�akan, udamotan sponge katama�o riwunii di�iti. Udauna�an usawadan naa Jesus dako itiz atamun saba ida�an. Sariapa ukian, “Mashaapa zii! Watukapa kizi panaadon Elijah wa�atin nii utoka-kida�ananuzu." 37 Udauna�an Jesus kadakon ma�ozaka�o ida�an, uruu mawaka�akan naa. 38 Na�apain na�a�o udaru�o kamicha mada kazadinpa�o Tominkaru Dapu nazo ii, sariapa ukuzuuta�akan pazikon an doko iki atii apowa iti. 39 Na�a�o soldyaanao zowaunaa kadishitapan Jesus kanaapu�u. Utukapan idi na�apam Jesus mawakan, sariapa ukian, “Mishi�o mishi Tominkaru Danin wuru�u di�ora�a pidana�a." 40 Na�a�o kapam zunnao munapo zaa ĩawunuutapan. Ĩbii iainao na�ii Mary, Magdala sanaaba; na�iki ba�oran Mary, oroo James na�iki Joseph daro; na�iki Salome. 41 Ĩnao da�anapatinainaouz Jesus ukaudinankan dono�oraz Galilee Baara ii, na�iki ĩnao kaminka�uupauzoz da�i uruu. Na�iki iriba kapam baokoinao zunnao na�ii, wa�atiinao utuma Jerusalem ati. 42 Wachuupun di�iti�i naa, uruu dono minziiwatin-karu kamoo kapam wuru�u, ba�oran kamoo tannaa, uruu Sookapa-karu Kamoon. 43 Kaina�a Joseph Arimathea san, na�iki uruu umanawunu�o nii pidannao taapan, na�iki uruu zaudapa�o kapam Tominkaru Naobanai-tinan kamoon kaawan. Kamoo tipitan ua�ii uma�ozakada�akan panyukunuu na�iki umakon, upishaa�anan Pilate Jesus nanaa dau�an. 44 Sariapa Pilate di�itinpan, uabatan idi Jesus mawaka�aka�a naa. Sariapa udapadan soldyaanao zowaunaa na�iki upishaanuzu, ukian u�ati, “Mawaka�aka�a naa mishi Jesus?" 45 “Oo, mawaka�aka�a naazu,” ukian u�ati. Uruu idi�i naa Pilate taapada Joseph na�akan Jesus nanaa. 46 Uruu idi Joseph torian naa kawinipina�o kamicha mada, na�iki utoka-kidan naa Jesus nanaa. Udauna�an upapidan naazu kamicha mada idi, na�iki umuudan naazu kichada-kariwai kuba nazo ii. Udauna�an utarata�akan naaz udaru�o kuba idi. 47 Mary Magdala sanaaba na�iki Mary Joseph daro tukapanii na�ia�oram Jesus nanaa muuda-kao.

‹ Chapter 14 MARK — All Chapters Chapter 16 ›

MARK 15

Cite / Share This Page