Mark 1

1 Weêi yamna God natuna Yesu Keriso Tuyeghana Ahiahina me ivi karenanei. 2 Warihagha peroveta Aisaiya, wenanaêarena God ponana i girumi: “Ona rau-tanighana! Taupariverena ana aipari-tawaneêi da am etanai inavo kaukauwei.” (Mal 3:1) 3 “Taupariverena au mutuyuwa evivi ghoreghore, ‘Taumi ana aninae ona vokaukauwei, ana eta ona vovai-didimani.’” (Isa 40:3) 4 Anina ma taupariverena John i neêi au mutuyuwa da rava i bababataitohi ma God riwana i dimedimei ipa, “Ghohaêapoapoe kauwana ona voterei ma ona wanavira-meyemi God awarina. Maranai ana babataitomi, yamna inavi matakiraha da taumi, God ami ghohaêapoêapoe ina nota-tawaneêi." 5 Ma rava anatapuhi, Judiya au paratana ma mai Jerusalem hi nae da John hita rau-tanighanei. Naêi marana ahi apoapoe hivi heghai ma tauna, Jordan wairana au horana i babataitohi. 6 Ma John, ghamoghamo ana wava kamel aparana metametanana i oteoteni ma ana tairoro ghamoghamo opina. Tauna ana yam kapaêu ma tawaya. 7 Ma tauna, rava i ririwehi ipa, “Muriyai rava ghehauna e neneêi, tauna i ghe vavahagha, egha me tau. Tau egha tagotagogiu da ana aehuma ghuravana ata rupeni. 8 Tau wairei a bababataitomi ma tauna, Aruwa Vivivireinei ina babataitomi." 9 Naêi maranaina Yesu Nasaretei, Galili ana au parata i voterei ma i ghaêira, mepa John i bababataito-yana. Ma John au waira Jordan, Yesu i babataitoi. 10 Ma maranaina Yesu wairei i gheêegheêeta, i inana da mara i wana-tawaneêi ma Aruwa Vivivireina me gabubu i ghaêiraêi ma horana ivi howai. 11 Ma God ponana marei i hopui ma i riwa ipa, “Tam, tau natuêu au nuwavaina ma uvi nuwa-ahiahiniu." 12 Ma yamna au murina God Aruwana Vivivireina, Yesu i pari-tawanana hopuneêi au mutuyuwa. 13 Ma maratom 40 Yesu au mutuyuwa i maêae ma Satan, tauna i rau-dadani. Tauna, ghamoghamo moduwei maitehi nai au dobuna hi maêae ma God ana aneya marei, tauna hi paêini. 14 Ma Guyau Herod, John i pani da deri au numana i terei. Ma au murina Yesu i nae au Galili ma rava auwarihi, God Riwana Ahiahina i dimei. 15 Ma Yesu i ririwa ipa, “God ana mara i ririweiya i gheêetai. God ana vibadana vouna, rava aubaihi yamna i turiyai. Ami ghohaêapoapoena ona rupeni ma riwana ahiêahina onavi tumaghanei." 16 Ma mara tagogi maranaina Galili topana au gerahana i bababara nae; ma tauyebagha ruwagha i inanahi. Simon ma ana tevera Andrew, ahi hagida hita yetayei au boga. 17 Yesu i riwehi ipa, “Ona nei ma ona votaghou. Ma me marina o yebayebagha; nanaêarena anavi haraharamanimi da rava ona tuaruhi da hinavi tumaghaneu!" 18 Ma maratagogi ahi hagida hi voterei ma Yesu hivo taghotaghoi. 19 Ma tauhi gerahei hi veraunae ma Yesu, Zebedi natunatuna i inanahi James ma John ahi auwaga; ahi hagida wanawana-rorona hi yaruyarumi. 20 Ma maratagogi tauhi i ghorehi ipa, “Taumi ona neêi ma taêu ona votaghou!” Ma tauhi, amahi Zebedi ana taunoya maitehi hivo terehi ma Yesu hivo taghotaghoi. 21 Yesu, ana tauvotaghotagho maitehi hi nae au Kapernaum. Ma Sabate au marana i ruipari au numana ma God Tuyeghana Ahiahina, viharaharamanana ivi kareni. 22 Ma taurautanighana, tauna ana viharaharamana hi bahei; aubaina tauna ana riwapaneêi ivi haraharamana, egha me Raugagayo Tauviharaharamanahi. 23 Maranai Yesu, pari au numana ivivi haraharamana ma oroto aruwa-apoapoena horana i ruiruiniya i garara 24 ipa, “Yesu Nasaretei! Am ghohana awariêai aiwaêi? Tam weka u neêi da ma rau-iviêapoapoyeêai bo? Tau, a haramanei tam aiyaêi; tam, tagogi vivivireim Godei!" 25 Ma Yesu i rau-gamopotai, “Ma genuwana! Na orotona ma hopu-tawaneêi." 26 Aruwa-apoapoena, orotona ivo vaitatatavi ma ana gararana i hopu tawanei. 27 Ma rava anatapuhi hi bahei ma tauhi hivi tarapirivivira, “Aiwaêi kauwana e tuputupuwa? Weêi vihegha vouna, ravana ana rewapana e maêamaêae. Yamna aubaina aruwa-apoapoehi e ririwehi ma hevivi ponavowei!" 28 Yesu ana vighegha vouna tuyeghana, maratagogi Galili dobuna i howai. 29 Ma pari au numana hivo tereêi. Yesu ana tauvotaghotagho maitehi hi nae Simon ma Andrew ahi au numa; James ma John maitehi hi nae. 30 Simon pohiyana wavinena ana gaugaururuna ana au anieno i enoeno. Maranaina Yesu i neêi; numana ravahi, doria tuyeghana hi pari-verei. 31 Tauna i nae wavine i enoeno yana; ma nimana i vaini, ivo haguêi da ivo mahiri. Maratagogi gaugaururu i voterei ma wavinena, tauhi i inana vaitetehi. 32 Madegha i harere ma raviraviyai, tauhi ahi rava doridoriahi ma tauhi aruwa-apoapoena i ruiruinihi, hi neiyahi maêi Yesu awarina. 33 Meyagai ghaeghaena ravahi anatapuhi, numana au naona hivi tagogiyehi. 34 Rava maghamaghauhi ahi doria tapuna da tapuna ivi yawahanihi ma aruwa-apoapoehi rava i ruiruinihi ivi hopunihi. Ma aruwa-apoapoehi hi haramaneêi da tauna aiyaêi. Yamna aubaina i rau-gamopotahi. 35 Au maratomtom, Yesu enowei ivo mahiri; numa i hoputawaneêi ma i nae gabu au rauraugovaghana. Ma kampa, God maiteni hi dedede. 36 Ma muriai, Simon varevarehina maitehi hi nae da hi baihei. 37 Ma maranai Yesu hi tuhaghai; hi riwei hipa, “Rava anatapuhi he baibaihem." 38 Yesu i pari-beyehi ipa, “Tana nae meyagai ghehauhi au ghereghere. Ma kampa, God Tuyeghana Ahiahina ana rau-guguyei. Taêu yamna aubaina a neêi." 39 Ma Galili meyagaihi anatapuna i naenihi ma pari au numahi, God tuyeghana i rau-guguyehi ma aruwa-apoapoehi rava au horahi ivi hopunihi. 40 Maratagogi oroto opina pagapagana i nae Yesu awarina, au naona i peêu, i rau-duneyei ma hagu ivi baghei ipa, “Inapa am ghohaghohana; yamna mavi ahiahiniu. “ 41 Yesu, orotona ivi nuwaboyei da urana ivi yoyoi ma ivo dadani ma i riwei ipa, “A ghohei. Ma ahi!" 42 Ma maratagogi, paga doriana orotona i voterei ma tauna i yawahana. 43 Yesu ivi ghaêana guratei ma i pari-tawaneêi, 44 “Tam, aiwaêi i tuputupuwa awarim; rava egha mavi heghehi! Didimanim ma nae da metauna pirisina. God, rava ahi puyo e amêamverenei, tauna awarina mavi atataiyana meyem! Ma Moses yawahana puyona i ririweiya, ma ghohai da yamna inavi heghehi da tam u ahi. “ 45 Ma orotona i nae da ana viyawahana tuyeghana, meyagai ravahi anataputapuhi i pari-verenaiyehi. Yamna aubaina, Yesu egha au meyagaihi ita rui ma i nae da au mutuyuwa i maêamaêae. Wate meyagai ravahi hi naenae awarina.