Mark 11

1 Tauhi Jerusalem hi tutugheregherei, au Bethphage ma Bethany, Olives oyana au gheregherena ma ana tauvotaghotagho ruwagha i aiparitawanehi, 2 Ma we nanaêarena i riwehi, “Ona nae meyagaina au naota awarina ma marainana au meyagaina ona ruirui, apo donki ghaubona raghiraghitana ma egha aiyaêi ita gerugeruiya ona inanai, ona kaiweni ma weka ona neiyai. 3 We kauwana ona ghohaghohai ma aiyaêi ina rau-bayademi da aiwaêai aubaina o ghohaghohai, yamna ona riwei, ‘Bada i ghoheghohei, mara tupona ava aubaina ma inapari tawanana meyeiyai.’" 4 Tauhi hi nae da donki raghiraghitana, metaeta au naona hi inanai ma hi kaiweni. 5 Taumahiri, hi inanahi ma hipa, “Aiwaêi aubaina donkina o kaikaiweni?" 6 Yesu ponana hi pari-verehi ma tauhi hivi aninehi. 7 Donki hi naiyei Yesu awarina ma gara au uputuwana hi hesi ma tauna i geru. 8 Rava maghamaghauhi gara au etanai hita uri ma ghehauhi ai ruguruguna hi yavahehi. 9 Ma rava ghehauhi etanai hi raveni ma ghehauhi hivi muri ma hi garagarara: “Hosanna, viahiêahinana, aiyai tauna God wavanei, i neêi, 10 Viêahiêahinana, e nenei da inavi bada me amata David; Hosanna au aidamo." 11 Yesu au Jerusalem i rui ma i ghae au temple, aiwaêi anatapuna i tuvirevirei ma madegha i kwahakwaha aubaina ana Aposel 12 maitehi hi nae au Bethany. 12 Mara tomgheha, tauhi au Bethany da hi ghaeghae au Jerusalem ma Yesu am i hiraghe. 13 Au uwama ma kaiyaha ana ruguruguna i inanai, i nae da ita inanai, anaêanona bo eêegha. Kaiyahana ruguruguna ava aubaina ai uwauwa egha ahi mara. 14 Ana tauvotaghotagho, hi rau-rautanighana ma kaiyahana i kuvari, “Egha meyanai aiyaêi anom ina ammeyei!" 15 Maranana au Jerusalem hi gheêeta ma Yesu au temple i rui ma tauvi gimagimara ivi yaghaghana hopunehi. Mane tausenisihi ma kiu taugimarehi ahi teiboro ma ahi anitughura ivi touvirahi, 16 ma ivi ghaêa da temple au orana egha aiyaêi inavi gimagimara. 17 Viharaharamana ivi kareni ma i riwehi, “God riwana hi girumi da, aêu numa yamna pari numana aubaihi ma taumi o ghohai da me taudanedanene ahi gabu." 18 Pirisi ghaeghaehi ma raugagayo tauvi haraharamanahi hi nonori mavi hiraghenana ogatarana hivi kareni, anona tauhi hi rovowei aubaina patara ghaeghaenana ana viharaharamana hi bahebahei. 19 Aubigai, Yesu ana tauvotaghotagho maitehi Jerusalem hi netawanei. 20 Hubahubanai tauhi hi naenaeme ma kaiyahana hi inanai da i poi. 21 Peter Yesu ana dede i notai ma i riwei, “Ma inana! Kaiyahana u kuvakuvariya i hiraghe." 22 Yesu i pari-beyehi, “God awarina onavi tumaghana. 23 A ririwana kauwemi, aiyaêi da wei oyana ina riwei da inavo mahiri ma ina tawanana meyei au boga ma egha ina nuwahaburu ma aiwaêi i yatoyatoniya inavi tumaghanei apo i ririweiya ina tupuwa. 24 Wei yamna aubaina a riwemi, maranana o rau-raupari ma aiwai ovivi baghei ma ovi tumaghana da o vaini ma aiwai ovivi baghei God ina veremi. 25 Ma marainana o rau-raupari, maeturaturam ahi ghohaboa awarimi ona nota tawanei, yamnei amam au mara taumi ami ghohaboêa ina nota tawanei. Ma ina pa egha ona nota tawanei apo amami au mara egha ami ghohaboêa ina nota tawanei." 27 Tauhi hi nememei au Jerusalem ma Yesu temple au horana i rui, piripirisi ghaeghaehi, raugagayo tauvi haraharamanahi ma babada ghehauhi hi nei Yesu awarina, 28 ma hi rau-bayadei, “Aiwaêi riwapananei wei ghohahi e ghohaghohahi? Aiyaêi riwapanana i verem?" 29 Yesu i pari-beyehi, “Taêu raubayada tagogi ana raubayademi ma ina pa onapari beyeêu, yamna ana riwemi da aiwaêi riwapananei we ghohahi a ghohaghohai. 30 Ona riweêu, John mepa ana riwapana i vaini da i bababataito: yamna Godei bo ravei?" 31 Tauhi hivi tarapiri vivira, “Aiwaêi tana yatoni? Ina pa tana riwa da Godei; apo ina pa, aiwaêi aubaina da John egha otavi tumaghanei? 32 Ina pa tana riwa da ravei…” Tauhi rava hi rovowehi aubaina rava anataputapuhi hi ririwa da John anina peroveta. 33 Yamna aubaina tauhi Yesu hi pari-beyei hipa, “Tauai egha ata haramanei.” Yesu tauhi i riwehi, “Yamna aubaina da taêu egha ana riwemi, aiwaêi riwapananei we kauwahi a kaukauwehi."