Mark 12

1 Anina ma Yesu awanaêinei auwarihi i dede, “Mara tagogi oroto grape vaovaona i vaghoi, i gari, grape anibuyona i gharai ma anivipaêipaêi numana ivo wai.” Anina ma rava ghehauhi auwarihi i am verenei da grape vaovaona hitavi bagibagi ma tauna i nae au dobugheha. 2 Marainana grape tamana ana mara i gheêeta, ana taunoya i pari-tawanei da ana ruva vainana aubaina. 3 Grape vaovana tauvi bagibagina ravahi, taniwaga ana taunoya hi vunuboêai ma kwakwavina hi pari-tawanana meyei. 4 Taniwaga, taunoya ghehauna i pari-tawanei ma grape vaovaona tauvi bagibagina ravahi, koyana hi rau-mutumutui ma hivi tepahubai. 5 Ma taunoya ghehauna i pari-tawanei ma tauna hivi hiragheni ma kauwana tagogina hi kauwei taunoya ghehauhi auwarihi, ghehauhi hi rau-mutunaiyehi ma ghehauhi hivi hiraghenihi. 6 Rava tagogiava i maeterei yamna taniwaga natuohohina ma au damona taniwaga natuohohina ana nuwavainana, i pari-tawanei ma ipa, “natuêu, hinavi virei." 7 Ma grape vaovaona tauvi bagibagina ravahi, hi riwanameyehi hipa: weêi taniwaga natuna, ona neêi, tana vunui ma ana grape vaovaona tanavi taniwagei. 8 Anina ma tauhi taniwaga natuna hi vunui ma hivi hiragheni ma tupuwana hi tawanana hopunei. 9 Yesu i rau-bayada, “Grape vaovaona taniwagana aiwaêi ghehauna ina ghohai?” Tauna ina nei da grape vaovaona tauvi bagibagihi inavi pupuhi ma grape vaovaohi rava ghehauhi ina verehi. 10 Taumi warihagha hi girugirumiya o hiyavi bo eêegha? “Tau raunuma tuwatuwaêoroto hi paripari-viraiya muriyaêi hi inana da tauna tuwatuwa kauwa." 11 Weêi yamna Bada i ghohai; ma au matata inanana i ahi kauwa. 12 Jew babadahi hi ghohei da Yesu hita pani, anonana tauhi hi haramanei da wei awanaêina yamna tauhi e dededehi. Wate tauhi patara hi rovowehi aubaina hi voterei ma hi nae. 13 Parisis ma Herod ana rava, ghehauhi hi pari-tawanehi, da Yesu hita rau-dadani. 14 Hi nei awarina ma hi riwei, “Tauviharaharamana, tauai a haramanei da tam egha uta morumoru, ma utavi bainaenae. Anonana tam egha rava uta rovorovowehi ma riwa kauwei God ana ghoha evivi haraharamanei. Ma riweêai da raugagayo e maêamaêae bo eêegha da Rome ahi guyau wavana Sisa ana takisi atavi maihei? Tauêai ana vimaiha bo eêegha?" 15 Ma Yesu ahi moru i haramanei, aubaina i pari-beyei, ipa, “Aiwaêi aubaina o rau-raudadaniu? Roman manena ona neiyaêi da ana inanai." 16 Mane tagogi hi neiyaêi Yesu awarina ma i rau-bayadehi, “Weêi ayaêi aruwana ma wavana?” Ma hi pari-beyei, hipa, “Sisa wavana ma aruawana” 17 Yesu i riwehi, “Yamna aubaina, aiwaêi da Sisa gharinei, Sisa ona verei ma aiwaêi da God gharinei, God ona verei.” Ma Yesu hi bahei. 18 Sadusi ghehauhi, hiragheyei vomahirina egha hitavi tumaghanei yamna aubaina hi nei Yesu awarina ma hi rau-bayadei. 19 “Tauviharaharamana, Moses ana raugagayo wenanaêarena i girumi aubaita: mepada oroto ina hiraghe ma hiwapena egha itavi natuna, orotona ana teverana hiwapena ina ravaghi da rowarowa hinavi tupui da turana hirahiraghena aubaina. 20 Mara tagogi oroêoroto 7 (ayohi tagogi) ma hi maêamaêae. Tautuwagha i tavine da egha natunatuna ma i hiraghe. 21 Ma viruwaina wavinena tagogina iravaghi. Wate nanaêarena egha hitavi natuna ma orotona i hiraghe. Kauwana tagogina turahi vitonuina awarina i tupuwa, 22 maemae terenahi 7 wavinena tagogina hi ravaghi ma egha hitavi natuna ma hi hiraghe. Au damona wavinena i hiraghe. 23 Maranaina vomahirime ana au mara metauna orotona apo awana?" 24 Yesu i pari-beyehi ipa, O nota boêa ghagha! Ma o haramanei aiwaêi aubaina? Anonana taumi God riwana ana riwapana egha ota haramanei. 25 Maranaina hirahiraghehi, hiragheyei, hina vomahiri, yamna tauhi me aneya au mara ma egha hina tavine. 26 Ma marina, hirahiraghehi ahi vomahirime, vitarapirina. Moses ana buka o hiyavi bo eêegha; eyagi i araêarahiyana awarina, kampa i girumi da, God, Moses i riwei, “Tau Abraham ana God, Isaac ana God ma Jacob ana God. 27 Yamna yawayawahanihi ahi God ma egha hirahiraghehi. Anina o nota boêa kauwa." 28 Anina ma raugagayo tauvi haraharamanana tagogi, i neêi ma aiwaêi hivivi tarapiriyei i nonori ma i inanai da Yesu, Sadusi, i pari-beyana kauwehi. Yamna aubaina i nei Yesu awarina ma i rau-bayadei, “Metauna raugagayona i gheêeta guratana?" 29 Yesu i pari-beyei ipa, “Raugagayo ghaeghaena ma gheghe guratanana weêi: ‘Mai Israel ona rau-tanighana! Bada ata God yana tauna ava ata Bada. 30 Nuwanuwami taputapunei, horami taputapunei, ami nota taputapunei ma ami riwapana taputapunei onavi nuwavainei.’ 31 Raugagayo gheghe guratanana, viruwaina yamna weêi: ‘Rava ghehauhi mavi nuwavainei me tam evivi nuwavaina meyem nanaêarena. Weêi raugagayohi ruwaghahi i ghe vavahagha, egha me ghehauhi nanaêarena.’" 32 Raugagayo tauvi haraharamanana, Yesu i riwei, “U riwa kauwa, God tagogiava ma egha mepa ghehauna ita maêamaêae." 33 Yamna aubaina God mavi nuwavainei, horam taputapunei, am nota taputapunei ma am riwapana taputapunei ma maeturam mavi nuwavainei me tam evivi nuwavaina meyem, nanaêarena. Wei raugagayohi ghe guratana egha me puyo apuêapunana bo puyo ghehauhi nanaêarena. 34 Yesu ravana, mayana i vaini da nuwahuyehuyei i pari-beyana aubaina da i riwei, “Wei raugagayohi i raêata guratana egha me puyo araêaratana bo puyo ghehauhi nanaêarena.” Wei au murina, egha ayaêi ghehauna, ita rau-tepatora da Yesu ita rau-bayadana meyei. 35 Yesu au temple ivivi haraharamana ma wenanaêarena i rau-bayada, “Aiwaêi aubaina, raugagayo tauvi haraharamanahi, he ririwa da Mesaiya yamna David, natuna? 36 Aruwa Vivivireina David i rau-hepai da we nanaêarena i riwa: ‘Bada aêu Bada, i riweêi. Weka, au ahuohohiu ma tughura, da maranana am ghaviya, aem au gabaurina ana terehi.’ 37 “David taunei e ririwa da au Bada menanaêarena ma Mesaiya, David natuna?" 38 Yesu ana au viharaharamana, ipa, “Raugagayo tauvi haraharamanahi ona inana kauwehi. Tauhi hi ghohei da gara manamanaihi hina oteni ma hina bababaranae, boru au gabuhi ma au maketi rava anavi virahi, hina nenebeyehi. 39 Pari au numana tauhi anitughura, vinevinena he vaivaini ma au toreha, gabu ahiahihi he vaivaini. 40 Tauhi hiwahiwape he rau-kwayekwayehi ma he rau-iviêapoapoeyehi ma pari manamanainei au matamata hevivi morumoru. Tauhi ravahi nanaêarena ahi kovogha ina raêata guratana." 41 Maranaina Yesu mane aniterenana au ririvana i tughutughura ma ivi neneghana ma rava hi puyopuyo. Rava mahumahurahi mane ghaeghaena ma maghamaghauhi hi tereterei. 42 Anina ma hiwape dabudabuêarana, i nei ma ana puyo mane haburuna i terei. 43 Yesu ana tauvotaghotagho i rau-ghoreghorehi ma i pari-verehi, “A ririwana kauwemi, Weêi hiwapena dabudabuêarana ana puyo i teretereêiya yana i raêata guratana egha me rava ghehauhi. 44 Rava ghehauhi ahi mahura maemaeterenana hi puyowei ma wei wavinena dabudabuêarana, aiwaêi da awarina i maêamaêae, anatapunana i amverenei."