Mark 5

1 Yesu ana tauvotaghotagho maitehi hi damana Galili topana au tupo gehauna, mepa mai Gerasa ravahi hi maêemaêeyana. 2 Marainana Yesu wageêi i hopuhopu, oroto kokowagei i hopuêi. Weêi orotona yamna aruwa-apoapoena ivi howaêi ma ivi taniwagei. 3 Egha tagotagogina da aiyaêi ita vovai-hubai, mara maghamaghauna, tauhi aiena ma urana seiniyei hi raghiraghihi, wate mara anataputapuna hi raurau-seini ma seinihi i raurau-tuituinihi, aubaina egha tagotagogina da hita raghita dawai. Waguvarai da madeghai i mahimahirinae, i garagarara ma ghaêimei i hapihapi meyei. Au oya ma au kokowaga i maêamaêae. 6 Oroto kokowagei tauna au uwama ma Yesu i inanai ma i ruba da au naona i peêu. 7 Ma ponana ghaeghaeneêi i garara, “Yesu, God au aidamo maemaema natuna, am ghohana awariêu aiwaêi? God wavanei, avivi baghaim, egha ma rau-iviêapoapoyeêu." 8 We nanaêarena i riwa, aubaina au naona Yesu aruwa-apoapoena i hegahegari da orotona ita hoputawaneêi. 9 Yesu i rau-bayadei, “Wavam aiyaêi?” I paribeyana ipa, “Tauai a magha, aubaina aêu wava yamna Legion ." 10 Tauna Yesu ivi bagha maeyei da tauhi havena da naêi dobuna hita hopu-tawaneêi. 11 Au barabara, poro maghamaghauhi hi yabayaba, 12 aubaina aruwa-apoapoehi, Yesu hivi baghai hipa, “Ma pari-tawaneyai poro auwarihi da tauai, tauhi ana ruinihi." 13 Yesu ivi aninehi, anina ma aruwa-apoapoehi, oroto hi hopu-tawaneêi ma poro hi ruinihi. Porohi au aihariri hi ruba da Galili au topana hi harere. Tauhi maghauhi me 2000. 14 Tau-vighamoghamo, hi rovo ma hi ruba au meyagaigheha dobugheha da rava maghamaghauhi hi pari-verehi. Rava hi nae da aiwaêi i tuputupuwa hita inanai, 15 Marainana hi naêe Yesu awarina, tauna orotonana aruwa-apoapoehi hi riruiniya, yamna i tughutughura, gara i oteni ma ana nota ahiêahina. Ma tauhi hi rovo kauwa. 16 Aiwaêi oroto ma aruwa-apoapoena da poro auwarihi i tuputupuwa, tau-inanahi, rava ghehauhi hi riwehi. 17 M tauhi Yesu hivi baghaêi da ahi dobu ita hopu-tawaneêi. 18 Marainana Yesu i gerugeru au waga, orotona aruwa-apoapoena i ruiruiniya, Yesu ivi baghai da maiteni hita nae. 19 Yesu egha itavi aninei ma i riwei ipa, “Manaeme, am au numa ma am rava ma pariverehi, weêi kauwana ghaeghaena Bada i kaukauweiya tam aubaim ma tauna ana ivi ahiahi tam awarim." 20 Anina ma orotona, tauhi ivo terehi ma i naeme au Dekapolis (meyaghai 10) ma meyagai maghamaghauhi i naenihi ma rava i pari-verehi, aiwaêi Yesu i kaukauweiya tauna awarina. Ma tauhi tau-rautanighana, hi bahei. 21 Yesu wageêi i damaname Galili topana au navanavagheha, marainana i damana vivira au navanavagheha, tauna yohora au geraha ma rava maghamaghauhi hi gariwabui. 22 Oroto tagogi i neêi awarina, tauna ana wava Jairus ma tauna pari numana tau paêinina. Marainana tauna Yesu i inanai, i nae da au aiena i peêu ma i rau-duneyei, 23 ma ivi baghaguratei, “Natuêu totopana i doria kauwa, maneêi da ma vodadani ma tauna ina yawahana ma ina maêae." 24 Anina ma Yesu maiteni i naêe. Rava maghamaghauhi hi neêi da hi gariuêumi. 25 Wavine ghehauna tara i doridoriei, borima 12 au horana, tauna maiteni kampa. 26 Wavinena money ghaeghaena i tawanei tau viyawahana auwarihi ma egha tagotagogina da hita hagu kauwei, doriana egha ita kwahakwaha ma i raêaraêata. 27 Tauna Yesu tuyeghana i nonori ma ivi mayavaina meyei ipa, “Ana gara ava ana vodadani, apo ana yawahana.” Yamna aubaina da wavinena rava maghamaghauhi horahiyei i nae da Yesu murineêi ana gara ivo dadani. 29 Mara tagogi tara doriana i kwaha ma tauna au horana mayana i vaina meyei da ana doria i kwaha. 30 Yesu mayana i vaini da ana boyaboya i hopu tawaneêi, anina ma i maetavirei boru au pouhi ma ipa, “Aiyaêi aêu gara ivo dadani?" 31 Ana tauvotaghotagho hipa, “Ma inanaêi, weêi ravahi hi gariuêumim, yamna aubaina apo me mariwanei da aiyaêi ivo dadanim?" 32 Ma Yesu i inana viravira, i ghoheghohei da naêi ravana ita inanai. 33 Wavinena i haramaneêi da aiwaêi i tupuwa awarina ma i rovo kauwa da i tatatava. Anina ma i neêi da Yesu au aena i peêu ma aiwaêi anataputapuna riwa vaimahiei i riwana pahiyei. 34 Anina ma i riwei ipa, “Natuêu, am tumaghana awariêu, ivi yawahanim, am doria i kwaha nonowa. Nuwahubei ma nae." 35 Yesu yohora i bababani ma, Jairus ana tau vituyetuyegha hi neêi da hi riwei hipa, “Natum totopana i kwaha. Havena da tau viharaharamana utavi sinaviravirai?" 36 Tauhi aiwaêi hi ririweiya, Yesu egha itavi ponavowehi ma Jairus, i riweêi ipa, “Egha marovo mavi tumaghaneêu." 37 Rava maghamaghauhi ivi ghaehi da hi maêae, Peter, James ma varehina John, tauhi ava i taravainihi ma hi nae. 38 Jairus ana au numa hi gheêeta ma Yesu tauhi i inanahi da hivi nuwa ragharagha, hivivi nuwaboya ma hivivi touwana. 39 Yesu au numa i rui ma i riwehi ipa, “Aiwaêi aubaina o toutou? Weêi teverana egha ita hiraghe, tauna e enoeno." 40 Tauna, hi inana vai diboghi ma hivivi namei, yamna aubaina da tauhi ivi hopunihi ma teverana amana, ayona ma ana tauvotaghotagho tonugha i taravainihi ma hi rui teverana i enoenoyana. 41 Tevera au urana ivo wa ma i riwa ipa, “Talita koum,” anona yamna, “Totopa, taêu a ririwem ma vomahiri." 42 Tauna yaghiyaghina ava ivo mahiri ma i babaranae. (Tauna ana borima yamna 12) Weêi ghohana hita inanai, yamna tauhi anataputapuhi hi ghohorihi. 43 Yesu ivi ghaêanaghagharehi havena da, rava ghehauhi hita riwehi ma ipa, “Aiwaêi ona verei da ina am."