LUKA 1

1 Muzitu Thyofila, Batu ba lawu baÌmeka kusonika meni dya mambu mana maÌluta ha kati kya betu. 2 BaÌsonikama bwosu baÌtuzimbwala betu, batu bana baÌmona mambu mana yi mesu ma thona tuka ku luyandiku, amana phi babana basadi ba ndinga ya Nzambi. 3 Ihana ni kwena meni phi, phyudiki bwa bukheti, meni dina dyosu, buna dyaÌlutila, tuka ku luyandiku yi kuna tsuka, ihana mbonibwa bwa bukheti mu kukusonikina ngeyi muzitu Thyofila, 4 tsadibwa ndangu wazaya hika tsikiningi ya malongi mana waÌtambula. 5 Tangwa dina, Eloti kaÌkala pfumu wa mulambu wa Yuteya. KwaÌkala yi nganga Nzambi mosi, khumbu yandi Zakadiya, wuna waÌkala mu mukanzu wa Abiya. Mukhetu wandi kakala mosi muna butuka dya Loni, yi mbuta wa theti, wa banganga Nzambi, bakala tela: Dizebeti. 6 BaÌkala bawu bodi batu basungama ku thwala ya Nzambi, bakala lemvuka phi buna bufwani ku mitsiku yi malongi moosu ma Pfumu. 7 Kaasi baÌkalaku yi mwana, mukuma Dizebeti kisita kaÌkala, amana bawu bodi phi binunu baÌkala. 8 Kilumbu kimosi, Zakadiya kakala sala bisalu byandi bya kinganga ku thwala ya Nzambi mukuma dyaÌkala tangwa dya mukanzu wa yandi mu kusalakya. 9 Bwosu yaÌkala tsadidi ya banganga Nzambi, hanga babetini zeki mu kumusola ndangu kakota mu kikumbu kya Nzambi, kayoka phi pfwabidi. 10 Mulumba-lumba wa batu wosu wakala lombila ku phenza, mu tangwa dya kuyoka pfwabidi. 11 Hanga wanzyo mosi wa Pfumu wumulubwakidi Zakadiya: wutelamiki kuna lweka lwa kitata lwa mesa mana ma kuyokila pfwabidi. 12 Zakadiya buna kamuÌmona, hanga mabanza mamuvwalangani, bweya bumukwatini. 13 Kaasi wanzyo wumuzimbwadi: «Yukaku bweya, Zakadiya, mukuma Nzambi wuyuki lombilu lwaku: mukhetu waku, Dizebeti, mwana wa yakala kakuÌbutila; wamuÌheka khumbu, Yowani. 14 KakaÌla tho ya kyesi kya lawu yi tsambu kikuma kya ngeyi, amana batu balawu phi basaÌngwala kikuma kya lubutuku lwandi. 15 Mukuma yandi kakaÌla mutu wa mbuta ku thwala ya Pfumu. Kanwikiku vinu keti malafu ma kufundika lo. KakaÌla wabasa yi Kitembu kyatoma tuka mu vumu dya ngudi wandi. 16 KavuÌtula batu ba lawu ba Kiseledi kwena Pfumu Nzambi wa bawu. 17 KakwiÌsa hanga mbambala wa Nzambi yi kitembu yi ngolu hanga mbikudi Diya, kikuma kya kukhundikisa batata yi bana ba bawu amana kasaÌdisa batu bana baÌhakuka, mu kutambula ngangu za batu basungama; ndangu kayidika kikanda kya batu kina kyaÌyilama kikuma kya Pfumu.» 18 Kaasi Zakadiya wuzonzi kwena wanzyo: «Abweti yizaÌyila ni mambu mana menina ma kyedika? Mukuma meni yekina mbuta, mukhetu wama phi wekina mbuta.» 19 Wanzyo wumuvutwadi: «Meni yenina Ngabudyela; wuna wisi telama ku thwala ya Nzambi mu kumusadila; yandi kathumini ndangu yikuzimbwala amana yikunatina Musamu wa Bukheti wawu. 20 Kaasi ngeyi, wukwikidiku mu ndinga za meni zina zakwiÌsa lungila mu tangwa dyandi; ihana ni kamama wakiÌtuka, kilumbu yikuna maluÌngila mambu mama.» 21 Muna tangwa meni dina, batu bakala hingila Zakadiya, hanga bekayituka bwosu kaÌzingidila mu kati dya kikumbu. 22 Kaasi ha kaÌlubuka, kaÌlendaku kubazonzisa amana batu babakisa ni mbona mesu kaÌmoni mu kikumbu. Kakala basongila mu bidimbu, kuna yandi mutu, wusadi kamama. 23 Ha kaÌmanisa, Zakadiya, tangwa dyandi dina kafwana kasala bisalu mu nzu ya Nzambi, hanga wuvutuki ku nzu yandi. 24 Kunima dya matangwa, mukhetu wandi Dizebeti waÌyimita vumu amana wuswami ngonda tanu muna nzu. Wudizonzidi yandi meni ni 25 «Tala mambu kasadi Pfumu kikuma kya meni: buthwena, wutambwasini kukhutumuna mu dyambu dina dyakala pheka tsoni ku mesu ma batu.» 26 Muna ngonda ya sambanu, Nzambi waÌhitika wanzyo Ngabudyela muna mbanza mosi ya Ngadidi, khumbu ya yawu Nazaleti, 27 kwena ndumba wa mukhetu mosi baÌzitikila mu kimbayi kwena yakala mosi bakala tela Yozefu. Mutu yandu kaÌkala mosi muna butuka dya kyamvu Tavidi. Khumbu ya ndumba wa mukhetu wuna Madiya. 28 Wanzyo waÌkota muna nzu yandi, wumuzimbwadi phi: «Mboti Madiya! Pfumu wukusadidi mamboti ma lawu, yandi kenina yi ngeyi.» 29 Madiya buna kaÌyuka mambu mana, wekina yangalakanu; wekadihyula thendula ya mboti meni yina. 30 Hanga wanzyo wumuzimbwadini: «Tekitaku , Madiya, mukuma Nzambi wukusadidi mambu ma bukheti. 31 Ka thama ku, vumu wayiÌmita, wabuÌta mwana mosi wa yakala amana wamuÌheka khumbu, Yesu. 32 KakaÌla mutu wa mbuta amana bamuÌtela ni mwana wa Nzambi wa Phungu wuluti. Pfumu Nzambi kamuÌheka, yandi, kiti kya kipfumu kya khaka wandi Tavidi 33 amana yandi, kayadiki mu matangwa moosu muna kikanda kya Yakobi, kipfumu kyandi kyakaÌlaku yi tsuka.» 34 Madiya wuhyudini kwena wanzyo: «Abweti mahaÌngamina, mambu mana kikuma meni, nzayiku kedi yakala?» 35 Wanzyo wumuvutwadini: «Kitembu Kyatoma kakuÌkulumukina amana ngolu za Nzambi wa Phungu wuluti zakuÌfidinga hanga kivula. Ihana ni Mwana wuna wabuÌtuka, bamuÌtediki: watoma, Mwana wa Nzambi. 36 Kiwutu kyaku Dizebeti, yandi phi ku vumu kenina, mwana wa yakala kabuÌta, mbatanana kinunu; yandi wuna bakala tela ni kisita, buthwena, vumu dilungisini ngonda sambanu. 37 Mukuma heku kima kyakonda lendakana kwena Nzambi.» 38 Hanga Madiya wuzimbudini: «Meni, yenina musadi wa Pfumu; yambula moosu malungila kikuma kya meni, bwosu wuzimbudibwa.» Amana wanzyo wumusisi. 39 Muna bilumbu byaÌlanda, Madiya wubwi mu nzila wendi tswasu ku malondi ma Yuteya. 40 WaÌkota muna nzu ya Zakadiya amana waÌmuheka Dizebeti mboti. 41 Muna tangwa meni dina kaÌyuka, yandu, mboti ya Madiya, mwana wuzatukini muna vumu dyandi. Dizebeti kaÌkala wabasa yi Kitembu Kyatoma 42 amana wuzimbudi mu ndinga ya ngolu: «Nzambi wukusakumuni kuluta bakhetu boosu, mwana wuna wabuÌta phi kenina wa kusakumuna. 43 Nani yenina meni ndangu, ngudi wa Pfumu wama, kisa thala? 44 Mukuma, tala, muna tangwa meni dina ngyukiki mboti yaku, mwana wuningani mu kyesi muna kati dya meni. 45 Mu kyedika, mu kyesi wenina, mukuma wukwikidini mambu mana kazonzikini Pfumu kikuma kya ngeyi ni maluÌngila.» 46 Hanga Madiya wuzonzi: «Yibati mutsikisa Pfumu yi mbundu yama yosu, kikuma kenina wa mbuta, 47 Moya wama, wenina wabasa yi kyesi kikuma kya Nzambi muhuludi wama; 48 Mukuma wuthadi meni musadi wandi wadikulumuna. Yi bwabuna ni, tuka lelu, batu boosu bayaÌndika kuthela ni mukwa kyesi, 49 mukuma Nzambi mukwa ngolu zoosu wutsadidi mambu ma mbuta. Khumbu yandi yenina yatoma, 50 matangwa moosu kisi songila khenda zandi kwena batu bana bisi muzitisa. 51 Wusongidi ngolu za koku dyandi: wukudi batu bana benina yi mbundu za lulendu, 52 Wubakatudi bapfumu mu biti bya bawu bya kipfumu amana wubahingisi kwena batu badikulumuna bakala mu ndonga ya theti. 53 Wuhani mamboti ma lawu kwena batu bana bakala mawu nzala, amana wubakukwasi bamvwama moku ma khatu. 54 Wisa yakidila kikanda kya Kiseledi, musadi wandi: kaÌzimbakanaku mu kusongila khenda zandi 55 kwena Bulahami yi kikanda kyandi, mu matangwa moosu bwosu kaÌsila kwena bakhaka betu.» 56 Madiya waÌnanga yi Dizebeti, ngonda tatu, ku nima waÌvutuka kuhata dyandi. 57 Ha dyaÌlunga tangwa dya kubuta, Dizebeti waÌbuta mwana wa yakala. 58 Bakwa mukombu wandi yi biwutu byandi bu bayuka ni Pfumu, wumusongidi khenda zandi mu mambu ma mbuta, ma bukheti kamusadidini, baÌsangwala lawu ha kimosi yi yandi. 59 Kilumbu kya nana ha kyaÌlunga, ku nima lubutuku, bisa ndangu bamukotisa mwana mukhanda; bazodi bamuheka khumbu ya tata wandi Zakadiya. 60 Kaasi ngudi wandi, kuna kaÌkala, wuzimbudi: «Loni, khumbu yandi yakaÌla Yowani.» 61 Bawu bamuvutwadini: «Muna kikanda kyaku mweku mutu wenina yi khumbu yina!» 62 Hanga bahyudi, mu bidimbu, kwena tata keti khi khumbu kazodi bamuheka mwana. 63 Zakadiya waÌlomba dibaya wusonikini: «Khumbu yandi Yowani.» Batu boosu baÌyituka. 64 Muna tangwa meni dina, Zakadiya waÌvutukila kuzonza: wekamukumisa Nzambi mu ndinga ya ngolu. 65 Bakwa mukombu boosu baÌyuka bweya amana mu kinzunga kina kyosu kya malondi ma Yuteya, baÌyandika kudimenika mambu mana maÌsalama. 66 Batu boosu bana bakalama yuka, baÌyandika kuyindula muna mbundu ya bawu yi kudihyulaka: «Buthwena bwabu, nani kakwisa kituka mwana meni yandu?» Mu kyedika ngolu za Pfumu, wakala zawu mwana wuna. 67 Zakadiya, tata wa mwana meni yandu, kakala wabasa yi Kitembu Kyatoma; waÌyandika kubikula bwabu: 68 «Lukumu kwena Pfumu, Nzambi wa kikanda kya Kiseledi, mukuma yandi kisa, ndangu kayakidila kikanda kyandi amana kahululakya phi. 69 Kahangi wisi lubula Muhuludi wa ngolu kikuma kya betu, mu kati kya kikanda kya kyamvu Tavidi, musadi wandi. 70 Mamana katekila zonza kwena bambikudi bandi ba Nzambi: 71 luhulusu lumosi lwisi tukatula kwena bambeni betu yi mu luyalu lwa batu bana bisi tumenga. 72 WaÌsongila kyadi kyandi kwena bakhaka betu amana kaÌzimbakanaku kuyukana kwandi kwatoma. 73 Ihana ni Nzambi waÌzenga ndefi kwena Bulahami, tata wetu, 74 ni waÌtuhulula mu luyalu lwa bambeni, ndangu twamusadila konda bweya, 75 ndangu twalenga kala batu ba Nzambi yi batu ba masonga ku thwala yandi mu bilumbu byosu bya luzingu lwetu. 76 Amana kwena ngeyi mwana wama, bakutediki ni mbikudi wa Nzambi wa Phungu wuluti, mukuma wahiÌta ku thwala Pfumu mu kwenda muyidikila nzila 77 yi kusamuna kwena kikanda kyandi ni wisi bahulula mu kubalolula masumu ma bawu. 78 Nzambi wa betu, wabasa yi lungongu yi kyadi: katuÌkenzula mu mwini wandi wuna wisi tuka ku zilu bwosu kisi lubuka tangwa, 79 Kikuma kya kukenzula baba benina mu phipa yi mu kivula kya lufwa, mu kutwadisa bitambi byetu mu nzila ya ngemba.» 80 Mwana kakala kola, kakala phi ngolu mu kitembu. Kakala zingila mu nganga tii yi kuna kilumbu kina kisa disongila kwena batu ba kikanda kya Kiseledi.