Yuba Sora 19
PBT1 Yuba yi a yabi, a naxa, 2 “Ɛ luma n ɲaxankatɛ han waxatin mundun yi, ɛ n sɔxɔlɛ ɛ falane ra? 3 Ɛ bata n konbi han sanɲa ma fu, ɛ mi yagɛ n tɔrɛ sɔnɔn ba? 4 Hali n bata tantan, n ma tantanna goronna luma n tan nan xun ma. 5 Xa ɛ ɛ yɛtɛ yite n xili ma, ɛ yi n mafala n yagi feen na, 6 nayi, ɛ xa a kolon a Ala nan tɔrɔni ito ragidixi n ma, a n mafilin a yalani. 7 Xa n gbelegbele tɔrɔni ito bun, n mi yabi sɔtɔma. N na xinla ti n mali feen na, kiti kɛndɛn mi sɛ. 8 Ala bata kiraan suxu n yɛɛ ra, n mi nɔɛ danguɛ, a yi dimin naso n ma kiraan xɔn. 9 A bata n ma binyen ba n yi, a yi n ma xunna kenla ba n yi naxan yi luxi alo manga kɔmɔtina n xa. 10 A bata n kala yiren birin yi, n naxɔrima nɛn. A bata n yigin kala alo wudin talaxina. 11 A bata xɔlɔ n xili ma han, a yi n yatɛ a yaxun na. 12 A yɛngɛsone bata e malan, e fa n xili ma, e yi n konna rabilin." 13 “A bata ngaxakedenne masiga n na, naxanye n kolon, ne bata siga ayi pon. 14 N kon kaane bata n nabeɲin, n lanfane yi ɲinan n xɔn. 15 N ma muxune nun n ma walikɛ ɲaxanle birin n yatɛxi alo xɔɲɛna, n bata findi xɔɲɛn na e yɛɛ ra yi. 16 N na n ma walikɛɛn xilima, koni a mi n yabima, hali n na a mafan. 17 N ma ɲaxanla mi fa tinɲɛ n dɛɛn xirin ma, n ma fe bata raɲaxu n ma denbayaan ma. 18 Hali dii ɲɔrɛne, n naɲaxu e birin ma, n na keli, e n mafala. 19 N naɲaxu n xɔyi kɛndɛne birin ma, hali naxanye rafan n ma, ne bata e xun xanbi so n yii. 20 N bata doyen, n kidin nun n xɔnne nan gbansan fan n ma. 21 N xɔyine, ɛ kininkinin n ma, ɛ kininkinin n ma, bayo Ala sɛnbɛn bata n ɲaxankata! 22 Nanfera ɛ n sagatanma alo Ala? Ɛ munma wasa n ɲaxankatadeni ba?" 23 “N yi waxi a xɔn ma nun n ma falane yi sɛbɛ, e yi sa kɛdini, 24 e yi sɛbɛ yɔxɔ lefaan ma wure ɲɔɛ ralemunxin na, e yi kɛrɛndɛn fanyen ma han habadan! 25 N na a kolon a n xunbamana a nii ra. Dɔnxɛn na, a kelima nɛn, a ti bɔxɔ xɔnna ma. 26 Hali n fati kidin birin na kun fureni, n gbindin sa Ala toma nɛn. 27 N na a toma nɛn, n na a tan nan toma, gbɛtɛ mi a ra. N kunfaxi na waxatin xɔn! 28 Ɛ a falama, ɛ naxa, ‘En na a sagatanma di? En fa fɛɛn mundun toma a ra a yalagi xunna ra?’ 29 Anu, ɛ yi lan nɛn, ɛ gaxu silanfanna yɛɛ ra, amasɔtɔ Ala ɛ saranma nɛn ɛ ɲaxankatane ra sayaan na. Nayi, ɛ a kolonma nɛn a Ala kitin na."