Yuba Sora 20

1 Nama kaan Sofara mɔn yi a fala, a naxa, 2 “N xaminxi ɛ miriyane fe yi na nan n karahanma, n xa yabin ti, n mi fa nɔɛ diɲɛ. 3 N bata n konbi xuine mɛ, koni, n yabin tima nɛn xaxilimayani. 4 I mi a kolon ba, waxatin birin, xabu adamadiine lu bɔxɔn fari, 5 a ɲaxudene xunna kenla mi buma, a Ala kolontarene sɛwan ɲanma nɛn mafurɛn? 6 Hali a te han kore, hali a xunna sa so kundani, 7 a lɔma ayi nɛn habadan alo a gbiina. Naxanye yi a toma, ne a falama nɛn, e naxa, ‘A minɛn?’ 8 A danguma nɛn alo xiyena, a funfun yi lɔ ayi, a ɲanma nɛn alo xiyen kɔɛɛn na. 9 Muxun naxan yi a matoma, na mi fa a matoma sɔnɔn, hali a dɔxɔden mi fa a toma sɔnɔn. 10 A diine karahanxin yi yiigelitɔne yii raxɛtɛ, e tan yɛtɛɛn yi a nafunle raxɛtɛ na muxune ma. 11 Hali a siimayaan to munma yi xunkuya, a yi sa a gaburun na." 12 “Fe ɲaxin ɲaxun a dɛ alo sukana, a naxan luxunma a lɛnna bun, 13 a naxan madunxunma a dɛ, a mi waxi naxan xa ɲan, 14 koni a donseen kunma nɛn a kui, a findi fɔdɔgɔɔn xɔlɛn na. 15 A bata nafunle magerun, koni a e baxunma nɛn, Ala e raminima nɛn a kui. 16 A yi fɔdɔgɔɔn xɔlɛn nan madunxunma, saɲin xɔlɛn nan a faxama. 17 Kumin nun nɔnɔn gbo yamanani alo baa igena, koni a mi fa na toma sɔnɔn. 18 A tɔnɔn naxan sɔtɔxi, a na raxɛtɛma nɛn, a mi a donma, a mi fa a yulaya seene tɔnɔn sɔtɔma sɔnɔn. 19 Na birin ligama nɛn bayo a yiigelitɔne ɲaxankata nɛn, a yi e rabeɲin, a yi banxina nde tongo a mi naxan tixi." 20 “A mi yi wasama a kunfani, nanara, a nafunla sese mi yi luma. 21 Muxu yo mi tangama a kunfan ma, koni a hɛrin mi buma. 22 A kɔntɔfilima nɛn hali a hɛrini, tɔrɔyaan sifan birin yi fa a ma. 23 A na a kuiin nafe, Ala a xɔlɔn nafama nɛn a xili ma, a godoma nɛn a ma alo tulena, a findi a balon na. 24 Xa a gi wure silanfanna bun, xalimakuli sula daxin nan sa a yisɔxɔnma. 25 A xalimakunla botinma nɛn a fatini, naxan ɲɔɛ bata sa a bɔɲɛn sɔxɔn, koni sayaan magaxuna a suxuma nɛn. 26 A nafulu ramaraden nafema dimi gbeen nan tun na. Tɛɛn yi fa a halagideni muxe mi naxan nadɛgɛxi, muxun naxanye mɔn na lu a konni, tɛɛn yi ne fan gan. 27 Kore xɔnna a hakɛne raminima nɛn kɛnɛnni, bɔxɔ xɔnna yi keli a xili ma. 28 A nafunle yi makuyama a ra nɛn, Ala na a xɔlɔn nagodo a xili ma lɔxɔn naxan yi. 29 Ala fe ɲaxi rabane raɲanma na kii nin, Ala na nan findixi a kɛɛn na."