Yaburin Sora 47

1 Koraa diine bɛtina, bɛti baane kuntigin xa. 2 Ɛ tan, siyane birin xa ɛ yiin bɔnbɔ, ɛ sɔnxɔ, ɛ xuini te sɛwani Ala xa! 3 Alatala, Kore Xɔnna Ala magaxu han! Manga gbeen na a ra dunuɲa birin xun na! 4 A bata nɔɔn fi en ma siyane xun na, a yamane raso en ma nɔɔn bun. 5 A bɔxɔn sugandi nɛn nxu xa, Yaxuba bɔnsɔnne sabatima dɛnaxan yi, a naxanye xanuxi. Bɛti xuini te. 6 Ala bata dɔxɔ a mangaya gbɛdɛni. Yamaan sɔnxɔma sɛwani, xɔta xuine yi mini Alatala xa. 7 Tantun bɛtin ba Ala xa, bɛtine ba han! Tantun bɛtin ba en ma mangan xa, bɛtine ba han! 8 Ala nan mangan na dunuɲa birin xun na, ɛ a tantun bɛtini. 9 Ala dɔxi a manga gbɛdɛ sariɲanxini, a mangayaan nabama siyane xun na. 10 Siyane mangane sama nɛn Iburahimaa Alaa yamaan fari. A tan nan gbee dunuɲa ganle birin na. Ala gbo han!