Yaburin Sora 96
PBT1 Bɛti nɛnɛn xa ba Alatala xa! Dunuɲa muxune birin xa bɛtin ba Alatala xa. 2 Bɛtin xa ba Alatala xa, a xinla yi tantun! Ɛ yi lu a raliyɛ waxatin birin yi fa fala a bata en nakisi. 3 Ɛ a binyena fe fala siyane birin xa, ɛ yi a kabanako feene rali muxune birin ma. 4 Alatala gbo, a lan a xa matɔxɔ han! A lan a xa binya dangu alane birin na. 5 Siyane alane birin findixi ala fuune nan na, koni Alatala tan bata koren da. 6 A rabilinxi nɔrɔn nun gboon nan na. A yire sariɲanxin nafexi sɛnbɛn nun binyen nan na. 7 Ɛ tan dunuɲa siyane birin, ɛ fa Alatala tantun, ɛ yi a tantun a binyen nun a sɛnbɛna fe ra. 8 Ɛ fa Alatala tantun a xili binyena fe ra. Ɛ fa kiseene ra a Batu Banxini. 9 Ɛ Alatala batu a nɔrɔ sariɲanxini. Dunuɲa muxune, ɛ xuruxurun a yɛtagi. 10 Ɛ yi a fala siyane xa, a Alatala nan mangan na. Nanara, dunuɲa a kiini, a mi yigisanma. Ala siyane makitima tinxinna nin. 11 Kore xɔnna nun bɔxɔ xɔnna xa sɛwa han! Fɔxɔ igen xa a xuini te e nun seen naxanye a xɔrɛ ra. 12 Burunna xa sɛwa e nun a yi seene birin. Fɔtɔnna wudine birin xa sɔnxɔ sɛwani, 13 e sɔnxɔ Alatala yɛtagi, amasɔtɔ a fama nɛn. A fama nɛn a kitin sa dunuɲa yi. A dunuɲa muxune makitima nɛn tinxinni, a siyane kiti a ɲɔndini.