Yaburin Sora 97

1 Alatala nan mangan na! Dunuɲa xa ɲaxan! Ɛ sɛwa ɛ tan fɔxɔ ige tagi bɔxɔne! 2 A rabilinxi kundaan nun dimin nan na. A mangayaan sɛnbɛ soxi tinxinyaan nun sariya kɛndɛn nan na. 3 Tɛɛna a yɛɛ ra, naxan a yaxune ganma a rabilinni. 4 A kuyen na a ɲinna masɔxɔn, dunuɲa birin yi yalan. Bɔxɔn yi a to a xuruxurun. 5 Geyane xuyama ayi Alatala yɛtagi, dunuɲa birin Marigina, alo kumi dolen na xulun. 6 Koren xɔnna a tinxinyaan nalima nɛn, siyane birin yi a binyen to. 7 Suxure batune yagima nɛn, naxanye suxurene matɔxɔma. Alane birin e xinbi sinma nɛn a bun. 8 Siyon kaane a mɛma nɛn e sɛwa. Yuda taane yi ɲaxan i ya kiti saxine fe ra, Alatala. 9 Alatala, i tan nan Kore Xɔnna Ala ra dunuɲa birin xun na. I tan gbo dangu alane birin na. 10 Alatala rafan naxanye ma, fe ɲaxin xa raɲaxu ne ma. A tɔgɔndiya muxune kantanma nɛn, a yi e xunba muxu ɲaxine yii. 11 Kɛnɛnna minima nɛn tinxin muxune xa, muxu sɔndɔmɛ faɲine sɛwama nɛn. 12 Ɛ tan naxanye birin tinxin, ɛ sɛwa Alatala a fe ra, ɛ a xili sariɲanxin tantun.