1 Corintios 16
TBL1 Nee equie cuendaê bee dimi nú rquiêña quieteêsaêhua para nú riêihua elietsa lubeelá bee saêahua enu nzeli arquiê Jesucristo, uquieteêsaêhuane tucu nú unibiyaêa luhua nú riêihua lubee saêahua enu nzeli arquiê Jesucristo lu iliu Galilea. 2 Rquiêña nú cada domingo deteê cada tucuhua lleêna dimi equie bichia riñaêhua calutse nú uriêihua ana tucu xmana, para nú la riêihua scua chenu riñalá luhua. 3 Nu chenu riñaa, xeêla bene enu cañihua para nú che zaêna dimi cuaê eyeche Jerusalén, nu xeêlane cuna tucu carta nú ixiuleêe ti neca beella. 4 Nu tunu rquiêña nú nzelaa, che nzelayua beella. 5 Rluti deteêxua lu iliu Macedonia chela riña lu eyeche Corinto para nú nzelabiêya liêihua. 6 Talabese yaêna cuna liêihua tucu tiembu. Diqui tiembu nú nucuaa, che chu duê inzahua liêá elu riala nzaêa. 7 La niarquia nú nzelabiêya liêihua chiucu chunatsia bichia, sino que niarquia nú xee nzela luhua tunu zela Diose nú acane scua. 8 Pero nee rquiêña nú riaêna eyeche Efeso hasta nú riña eliñi pentecostés. 9 Xne caêa eyeche Efeso nuê beyaê yeneê bee bene Stichiaê Diose nu seêca nú huaxi bee bene chili arquiê Stichiaê Diose, añinzuca nú huaxi bee bene rlee lua equie cuendaê Stichiaê Diose. 10 Chenu riña Timoteo luhua uriêihua nú tsu nzeêca arquiêlla, xne leêca riñaê Diose nú rriêá rriêilla. 11 Enzeêe nia luhua nú niêtucuhua la huachuhualla, sino que uriêihua elietsa lulla, nu uduê inzahualla para nú riñalla elu nzucuêquiealla caêa sin nú chenu arquiêlla cuna beelá bee saêahua enu nzeli arquiê Jesucristo enu nzeêtayulla. 12 Nu chiquiê uzequiaa lu saêahua Apolo nú chenulla bee saêahua enu nzeli arquiê Jesucristo, pero lá zelalla achalla nee, pero chálla chenu riêilla ana. 13 Ucuaêa tsiñiahua nu utsutaê arquiêhua lunú nzeli arquiêhua Jesucristo. Uriquiêhua lu xitse nú secahua nu utsutaê arquiêhua. 14 Nu ye nú rriêihua ñia utsu arquiêhua riêihuane. 15 Bee saêa enu nzeli arquiaêahua Jesucristo, liêihua nediyaêhua nú Estefanas cuna yebee beneêlla, liêibeella rlutilá uchili arquiê beella Jesucristo lu iliu Acaya, nu liêihua nediyaêhua nú xneca rriêibeella elietsa lubee saêahua enu nzeli arquiê Jesucristo. 16 Enzeêe nia luhua nú uriêi casohua bee bene enu rriêi xi rriêi bee benequieê cuna ye beelá bee bene enu rriêi xi rriêi beella, nu cuna bee enu rriêi elietsa nú reca riñaê Diose. 17 Chiquiê ñia utsu arquia chenu uriña Estéfanas cuna Fortunato nu Acaico xne tucu nú ñia nzu arquia lubeella. Leêca scua ñia nzu arquia luhua. 18 Liêibeella uduêbeella ana arquia cuna nú rduêbeella ana arquiêhua, nu bee bene enu rriêi scua uluêcuhua ulaêna lubeellla. 19 Yebee saêahua enu nzeli arquiê Jesucristo lu iliu Asia quieê, xeêla beella saludo luhua. Nu Aquila nu cuna unaêlla Pricila cuna ye beelá bee bene enu nzeli arquiê Jesucristo, bee enu rietesaê niêbeella, xeêla beella saludo luhua lunú necaêahua beneê Jesucristo. 20 Ye bee saêahua enu nzeli arquiê Jesucristo xeêla beella saludo luhua. Nu liêá nia luhua xitse hora nú xaêcahua saêhua, uniêhua Diose lubeella tucu nú rialane. 21 Liêá Pablo, liêi eêcua rquieêa letra quieê luhua para nú riêá saludar liêihua. 22 Tunu nuê bee bene enu la zeca Jesucristo, liêilla rialalla castiyaê Diose. Nu Jesucristo la leaê nú nzeêtanu. 23 Nu Jesucristo riêi nú cha nzeêca lu cuendaê yehua. 24 Nu lunú tucutse beneê Jesucristo necaêahua chiquiê seêca yehua. Amén.